Find job
Dette jobopslag er udløbet
Kalaallit Nunaanni inuussutissarsiornermi piujuaannartitsinermik tunngavilimmik inerititaqarfiusumi sinaakkutissanik pitsaanerpaanik pilersitseqataarusuppit?
Nunanut Allanut, Inuussutissarsiornermut Niuernermullu Naalakkersuisoqarfik akisussaaffimmik tigusinissamut piareersimasunik inuussutissarsiutinik niunermilu nunatsinni ingerlatsinermi ineriartortitsinermik siuarsaaqataarusuttunik sulisussarsiorpoq. Kalaallit Nunaanni ukiuni aggersuni annertuunik nutaanik pissanganartunillu unammilligassaqarfiusussaavoq. Timmisartunut mittarfiit nutaat piviusunngortinneqalerput, inuussutissarsiutillu arlaqartut, tamatumani ilaatigut takornariartitsineq ukiuni aggersuni kalaallit aningaasarsiorneranni aningaasaqarnikkut tunniussueqataalersussaapput malunnaatilimmik. Inuussutissarsiutit pilersitsiviullutillu ineriartortitsiviusut Kalaallit Nunaata ineriartortinneqarnerani qitiulissapput aningaasarsiornikkut assigiinngisitaarnerujartortunik ingerlatsiviusumi, tamakkualu piumasaqarfiussapput unammilleqatigiinnikkut killiliussanillu allanngujaatsunik peqarnissaanik. Soqutigisaqarfigigukku peqataaffigissallugulu kissaatigigukku qorsuusumik ineriartortitsinermik taaneqartartup piviusunngortikkiartuaarneqarnera, piujuaannartitsinerup Issittumi suliffeqarfinnik pilersitsiortornermi nipilersoqataaffigisaanik ingerlatsiviunera, taava atorfik una immaqa ilinnut soqutiginaateqassaaq.
Atorfik pillugu
Inuussutissarsiornermut immikkoortortaqarfimmi ilaatigut suliarisartakkagut tassaapput nunamut tamarmut inuussutissarsiornikkut nuernikkullu politikki, sermimik aamma imermik avammut niueruteqarneq, nunat tamalaat akornanni niuernikkut ingerlanneqarsinnaasunik siuarsaaneq kiisalu inuussutissarsiornikkut niuernermullu tunngassuteqartunik periarfissanik avammut nittarsaassineq. Suliat tamakkua ilaattut immikkoortortaqarfipput nunatsinni inuussutissarsiornermik ingerlatsisunut suliassaqarfiit assigiinngitsut akimorlugit attaveqartuuvoq, Naalakkersuisoqarfinnut allanut, kommuninut, soqutigisaqaqatigiit kattuffiinut il.il. Sulissutigineqarput siammasissumik periusissianik ineriartortitsineq atortuulersitsisarnerlu, suliassanik ataasiakkaanik suliaqartarneq kiisalu suliassaqarfitsinni politikkikkut sullissineq.
Suleqatigiikkaatut sulineq atugarilluarparput, piareersimaffigissavalli aamma nammineerlutit akisussaaffimmik tigusisinnaanissat suliassaqarfitsinni pineqartumi immikkoortortami ataatsimi imaluunniit arlalinni. Illit suliassatit aaliangersimasut soqutigisannut, piginnaasannut aamma misilittakkannik tunngaveqassapput. Ilaatigut makkua suliannut ilaalersinnaapput:
- Politikkikkut ingerlatanut sullissineq, tamatumali aamma Naalakkersuisut isummernissaannut tunngavissanik suliaqartarneq, allakkiat tunuliaqutaasut, oqalugiaatissat, § 37 naapertorlugu apeqquteqaatinut akissutissat il.il.
- Inuussutissarsiornermi niuernermilu politikkissamik suliaqarnermi aqutsisunut siunnersuineq
- Inuussutissarsiornikkut periusissiassanik ineriartortitsisarneq aammalu atortuulersitsiartuaartarneq
- Naalakkersuisoqarfiit, oqartussaqarfiit inuussutissarsiorfiillu akimorlugit ataqatigiissitsineq
- Kalaallit Nunaanni inuussutissarsiortunik aammalu inuussutissarsiorfiusinnaasutut inerisakkanik nunat tamalaat akornanni niuerfinnillu nittarsaassineq
- Suleqatigisanut avataaneersunut, soorlu Visit Greenland, Nalik Ventures, Sulisitsisut, illoqarfinni inuussutissarsiortut peqatigiiffii assigisaatalu akornanni ataqatigiissaarineq
- Aningaasanik missingersuusianillu aqutsineq, sulianik ingerlatsineq allattoqarfittullu suliaqarneq
Illit pillutit
Illit ujarpatsigit ajornanngippat imaattunik piginnaaneqaruit:
- Suliassanut attuumassuseqarluartumik ilinniagaqarnissaq, kisianni inuit allamik naleqquttumik ilinniagaqarsimasut imaluunniit tunuliaqutaqartut aamma qinnuteqarnissamut kaammattorneqarput
- Politikkikkut aqutaasumi ingerlatsivimmi aamma /imaluunniit namminersortuni inuussutissarsiortuni misilittagaqartoq
- Inuussutissarsiornermut niuernermullu tunngasunik ilisimasaqarluartoq
- Inuussutissarsiornermut aamma imaluunniit inuiaqatigiinni aningaasarsiornermut ilisimasaqarneq iluaqutaassaaq
- Nunatsinni inuiaqatigiinnik inuussutissarsiornermilu pissutsinik ilisimasaqarneq
- Iluaqutaassaaq kalaallisut, danskisut tuluttullu oqaaseqarneq
Immikkoortortaqarfik pillugu
Inuussutissarsiornermut niuernermullu immikkoortortaqarfimmi sulisut tassaapput immikkoortortaqarfimmi pisortaq ataaseq, piffissaq tamakkerlugu sulisussatut atorfillit sulilluartut arfineq-pingasut qulingiluallu tungaaniittut kiisalu ilinniagartik saniatigut sulisut ikinnerulaartut. Immikkoortortaqarfitsinni sulisut tamaasa immikkut annertuumik akisussaaffeqarput. Taamaakkaluartoq suleqatigiittut ajunngeqisumik ataqatigiissuseqarpugut, suliassarpassuatsinnik kivitseqatigiissinnaasuseqarluta nuannersumillu tamanna atortarlugu.
Atorfininnissaq pillugu
Kissaatigineqarpoq atorfiit inuttalerneqassasut immikkut siunnersortimik imaluunniit siunnersortit pisortaannik. Taamaattumik takorloorparput ukiuni arlaqartuni illit misilittagaqarfigisimassagit naalakkersuinikkut aqunneqartumi ingerlatsivimmi kommunimi Naalakkersuisoqarfimmi assigisaaniluunniit suliffeqarneq. Qitiuvoq illit akisussaaffimmik illit tigusisinnaanerit, suliassannillu ingerlatsisinnaanerit ilutsinni aamma avataani.
Nutaamik ilinniakkamik naammassisaqaqqammersut aamma qinnuteqartut allat allaanerusumik misilittagallit aamma atorfinitsinneqarsinnaapput aallaavittut fuldmægtigitut.
Kissaatigineqarpoq atorfiup ulloq 1. maaji 2023 imaluunniit immikkut isumaqatigiissuteqarnikkut atorfinittussamut naleqquttumik inuttalerneqarnissaa.
Sukumiinerusumik paasissutissat:
Atorfik pillugu annertunerusunik paasisaqarumaguit tikilluaqqusaavutit Inuussutissarsiornermut immikkoortortami pisortamut Marte Lona-mut saaffiginninnissannut atorlugu e-mail: mlon@nanoq.gl imaluunniit oqarasuaat 346568.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfiup aappaanut atatillugu periarfissat ilagaat sulisunut inissiamik pequsersorsimanngitsumik innersuussisoqarsinnaanera malittarisassat qaqugukkulluunniit atuuttut naapertorlugit. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job