Skip to main content
153

Dette jobopslag er udløbet

Kalaallit Nunaani nukissiuutinik pilersuisoqarfimmut Nukissiorfinnut pisortaaneq

Pisortat nukissiuutinik pilersuineranni nukissiuutit ataavartut sapinngisamik annertunerpaamik tunngavigineqarnissaat qulakkeereqataaffigerusuppiuk? Nukissiorfiit aningaasaqarnerat pitsanngueqataaffigerusuppiuk, aammalu innaallagissamik, imermik kiassarnermillu pilersuinerup pitsaassusianik qaffasissumik qulakkeereqataarusuppit? Nukissiorfiit nukissiornermut pisortaatut Kalaallit Nunaat tamakkerlugu innaallagissamik, imermik kiassarnermillu mingutsitsinngitsumik, piujuartitsiviusumik aningaasartuutinullu eqqummaarinniffiusumik pilersitsiniarluni suliani siunnerfileeqataassaatit.

Nukissiornermut pisortatut Nukissiorfinni, ulluinnarni Kalaallit Nunaanni illoqarfinni nunaqarfinnilu innaallagissamik, imermik kiassarnermillu pilersuisuusumi siuttuussaatit. Ukiut arlallit ingerlanerini Nukissiorfinni iluarsaassinissat annertunerusut kinguaattoorfiusimapput. Naalakkersuisoqarfik oqartussaasuusoq suleqatigalugu ukiut amerlanngitsut ingerlanerini tamatuma siumut aallarnissaa, taamaalillunilu innaallagissamik, imermik kiassarnermillu pilersuinerup isumannaannerulernissaa akisussaaffigissavat.

Tamatuma saniatigut ikummatissat nunap iluaneersut atorlugit nukissiornerup nukissiuutinik ataavartunik sapinngisamik annertunerpaanik taarserneqarnissaa Naalakkersuisut anguniagaraat. Ilaatigut erngup nukinga, anori seqinerlu, kiisalu nukissiornerup tamarmiusup teknologiimut tunngasortaanik piorsaaneq sakkussaapput. Tamatumunnga atatillugu Inatsisartut aalajangigaannit Nuup pilersorneqarneranut erngup nukinganik innaallagissiorfiup allineqarnissaata, aammalu Qasigiannguit Aasiaallu pilersorneqarnissaannut erngup nukinganik innaallagissiorfimmik sananissap qulakkeerneqarnissaat suliassani pingaarnersaapput – pisortat nukissiornermi pilersuinerini nukissiuutit ataavartut atorneqarnerinik 90%-inik annertusititsinissaq siunertaralugu.

Nukissiorfinni piffissaq tamakkerlugu sulisut, nunatsinni illoqarfinnut nunaqarfinnullu agguarsimasut 440-t missaanniipput. Nuummi qullersaqarfimmi, aqutsinerup allaffissornerullu annertunersaasa inissisimaffiani sulisut 90-it missaanniipput. Sulisut arlallit illoqarfinni nukissiorfinni inissisimapput.

Piukkussaq eqqortoq:

  • Attuumassutilimmik ingerlaqqiffiusumik ilinniagaqarpoq, kandidatitut ilinniakkaminik naammassinnissimalluni
  • Sullissineq periusissiornerlu eqqarsaatigalugit aqutsinermik misilittagaqarpoq
  • Nukissiorfiit niuerfii pillugit ilisimasaqarluarpoq
  • Aningaasaqarnermik paasisimaarinnilluarpoq aammalu niuerfinnik ineriartortitsinermi ingerlatsinermillu piorsaanermi uppernarsarneqarsimasunik angusaqarluarsimalluni
  • Sulianik annertunerusunik aqutsinissamut, ataqatigiissaarinissamut, tulleriiaarinissamut pitsaasumillu naammassinninnissamik qulakkeerinissamut piginnaaneqarpoq
  • Isumaqatiginninniarnerni nukittuujuvoq politikkimillu paasisimaarinnilluarluni
  • Oqaatsitigut kalaallisut, danskisut tuluttullu piginnaaneqarluarpoq
  • Isumaqatiginninniarnissamut, attaveqaqateqarnissamut suleqateqarnissamullu piginnaaneqarluarpoq.


Annertunerusumik paasisaqarusuppit?
Nukissiorfiit suliffeqarfiupput namminersortitaasut. Suliffeqarfik Namminersorlutik Oqartussani pisortat ingerlatsiviannut ilaavoq, kisiannili maleruagassat immikkut ittut naapertorlugit naatsorsuutinik saqqummiussisarluni. Nukissiorfinni pisortaanerup Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq qullersarissavaa.

Nukissiorfiit pillugit annertunerusumik atuagaqarit, uani: www.nukissiorfiit.gl.

Atorfik aammalu Nukissiorfinni periarfissat pillugit paasissutissat annertunerusut Naalakkersuisoqarfimmi pisortaaneq Mette Skarregaard Pedersen oqarasuaat +299 529844-imut, e-mail: mesp@nanoq.gl, saaffigalugu pissarsiarineqarsinnaapput.

Neqeroorutigaavut
Kalaallit Nunaanni nukissiamik pilersuisoqarfimmi atorfik unammillernartoq pissanganartorlu, niuerfimmut aaqqissuussaanermullu annertuumik sunniuteqarnissamut periarfissaqartitsiviusoq. Atorfimmi Nuuk aalajangersimasumik aallaaviusussaavoq.

Atorfeqarnermi atugassarititaasut
Atorfik maannarpiaq akissaateqarfik 39/40-mi inissisimavoq/akissarsiatigut aalajangersaaffiusimavoq.
Akissarsiat aalajangersimasunik immikkoortoqartut 1. apriili 2021-miit akit malillugit ukiumut 867.961,20 koruuninik, tassalu qaammammut 72.330,10 koruuninik annertussusiligaapput.

Isumaqatigiissutini atugassarititaasut malillugit atorfinitsitsisoqassaaq. Kisiannili qinnuteqartoq Kalaallit Nunaanni pisortani tjenestemandinut inatsisit naapertorlugit tjenestemandioreerpat, tjenestemandinut atugassarititaasut naapertorlugit atorfinitsitsisoqarsinnaavoq.

Atorfimmi piffissap suliffissap annertunerpaaffissaa aalajangersarneqarsimanngilaq, aammalu sulisunut ajunngitsorsiassaqartitsisarnermut aalajangersakkat aamma ullunik sulinngiffissanik annaasaqarnermut ajunngitsorsiassaqartitsisarnermut aalajangersakkat atuutsinneqanngillat. Tunngaviusumik sapaatit akunnerannut suliffiusussaq nal. ak. 40-nik sivisussuseqarpoq.

Akissarsiat atorfeqarnermilu atugassarititaasut, tassungalu atorfininnermut soraarnermullu atatillugu angalanissamut pequtinillu nassiussinissamut akiliunneqarsinnaatitaaneq ilanngullugu, piffissami atorfiniffiusumi Namminersorlutik Oqartussat aamma kattuffiup isumaqatiginninniarsinnaatitaasup ilaasortaaffiusup akornanni isumaqatigiissutit atuuttut atuutsinneqassapput.

Inissiaq
Atorfinittussaq sulisunut inissiamut pequteqanngitsumut maleruagassat sukkulluunniit atuuttut naapertorlugit innersuunneqarsinnaavoq. Inunnut sulisunut inissiami najugaqareersunut inissiamilluunniit kommunimit imaluunniit Namminersorlutik Oqartussanit pigineqartumi najugaqareersunut inissiamik innersuussisoqarsinnaanngilaq. Ineqarnermut akiliutit qularnaveeqqusiissullu inissiamut innersuunneqartumut maleruagassat sukkulluunniit atuuttut naapertorlugit akilerneqartassapput. Inissiaq atorneqarnermut atuuttuuvoq, atorfeqarnerullu naanerani qimanneqartussaalluni.

Inissiap pisoqaassusia, piginnittoqarnera il.il. apeqqutaallutik ineqarnermut akiliutit inissiallu pitsaassusii allanngorarsinnaapput. Sulisunut inissiamut najugarineqalivittussamut innersuunneqarnissamut utaqqisoqarsinnaavoq, taamaattumillu akileraaruserneqartussamik inissiigallartoqarsinnaavoq, taakkununngalu najugaqaqatigiiffiit minnerit akunnittarfinniluunniit inissiat ilaatinneqarput. Sulisunut inissiami imaluunniit inissiami inissiiviugallartumi annerusunik, soorlu qimminik qitsunnilluunniit uumasuuteqartoqarsinnaanngilaq.


Qinnuteqaat
Qinnuteqarfissaq kingusinnerpaamik nassiunneqassooq 10. februar 2022 nal. 23.59 Kalaallit Nunaata nalunaaqqutaa malillugu.
Atorfininnissaq pissooq 1. april 2022 imaluunniit isumaqatigiissuteqarneq malillugu piffissaq alla atortinneqarsinnaalluni.

“Qinnuteqaat nassiuguk” toorlugu qinnuteqaat, CV, ilinniarsimanermut pikkorissarsimanermullu uppernarsaatit kiisalu allakkiat attuumassuteqartut allat nassiutikkit.

E-mail-ikkut qinnuteqaatinik tigusineq ajorpugut.

Qinnuteqartut misilerarneqartussaassapput.

Naalakkersuisut pillugit
Unammilligassanik ujartuisuuguit aammalu sulinerit malillugu ulluinnarnut sunniinissamut siunissamillu ilusilersuinissamut piumassuseqaruit, Namminersorlutik Oqartussani atorfik ilinnut tulluuppoq.
Annertuumik akisussaassuseqartoqarnissaa naatsorsuutigaarput, aammalu suliatigut piginnaaneqarnissaq, pissutsinut peqqissumik misissueqqissaarsinnaassuseqarnissaq kiisalu sulisuni allannguinissamut annertuumik piareersimaffeqarnissaq pingaartipparput. Tamatuma saniatigut ulluinnarni ilusilersuisinnaanermut sulianillu paasisimaarinnissinnaanermut piginnaanitit pingaartippagut.

Namminersorlutik Oqartussat Qitiusumik Allaffeqarfeqarpoq, 650-it sinnerlugit Naalakkersuisoqarfinnut arlalinnut, kiisalu immikkoortortaqarfinnut siammasissunut arlalippassuarnut agguarsimasut sulisoralugit. Qitiusumik Allaffeqarfiup Naalakkersuisut politikkikkut aalajangiinissamut isumannaatsumik tunngavissaqarnissaannik, kiisalu politikkikkut aalajangiinerit piviusunngortinneqarnissaannik qulakkeeriffigineqarnissaat suliassarai.


Namminersorlutik Oqartussat pillugit annertunerusumik atugaqarsinnaavutit, uani: http://www.naalakkersuisut.gl/jb
 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk