Skip to main content
94

Dette jobopslag er udløbet

Isumaqatigiissutit pillugit immikkoortortaqarfimmut inatsisileritooq

Akissarsiat pillugit isumaqatiginninniartarnernut peqataarusuppit isumaqatigiissitsiniartarnernik kiisalu eqqartuussivimi suliassanik suleqataasarlutit?
Isumaqatigiissutit allaganngortinneqartarneri eqqarsaatigalugit nassuiaallaqqissuuit, isumaqatiginninniaqataasarsinnaavit suleqataallutillu? Suliamut tunngatillugu isumaqatigiissitsiniarsinnaavit eqqrtuussivitsigullu suliassanik isumaginnissinnaallutit? Taava atorfissaqartippatsigit! Sulilersussaq piukkunnaatilik immikkut siunnersortitut atorfinitsinneqarsinnaanera periarfissaavoq. Atorfik Nuummiippoq

Atorfik pillugu
Aningaasaqarnermut Sulisoqarnermullu Aqutsisoqarfimmi Isumaqatigiissutit pillugit Immikkoortortaqarfimmi akissarsiat pillugit isumaqatigiissutit kattuffnnik isumaqatiginninniarsinnaatitaasunit Kalaallit Nunaaniittunit Danmarkimiittunillu isumaqatigiissutigineqarsimasunik naleqqussaanerit nutarterinerillu ingerlanneqartarput. Isumaqatigiissutit aqqutigalugit akissarsiat atorfeqarnermilu atugassarititat naleqqussarneqartarput taamaattumillu suliarinissai ajornakusoorsinnaasarlutik. Pisariillisaataasinnaasunik ujartuinissaq aammalu isumaqatigiissutit sapinngisamik assigiikkannersumik allassimasarnissaat taamaammat pingaaruteqartorujussuuvoq. Atorfigiligassanni suleqatit inatsilerituut, aningaasaqarnermik ilinniagartuut siunnersortillu ikittunnguit suleqatigalugit akissarsiat pillugit isumaqatigiissutit ingerlaavartumik nassuiarneqartarnissaat, piareersartarnissaat naammassineqartarnissaallu akisussaaffigissavatit. Tamatuma saniatigut pisortat suliffeqarnermut suliassaat eqqarsaatigalugit Namminersorlutik Oqartussat kommunillu isumaqatigiissitsiniarnermik eqqartuusiviillu aqqutigalugit suliassaat immikkoortortaqarfimmi inatsilerituut pisortaat peqatigalugu akisussaaffigissavatit.

Suliassatit pingaarnerit:

  • Kalaallit Nunaanni pisortat sinnerlugit isumaqatigiissutinik isumaqatiginninniutinillu nutarsaaneq pillugu isumaqatiginninniartarnernut peqataasarnerit
  • Suliassat eqqartuussivikkut suliassat suliarisarneri
  • Pisortanik suleqatigisanillu atorfinitsitsinermi inatsisit pillugit suliat pillugit siunnersortaasarneq
  • Sulinngiffeqartarneq pillugu inatsisit, tjenestemandit pillugit inatsisinut aammalu Inatsisartut inatsisaasa sinnerinut, nalunaarutinut kiisalu kaajallaasitat atorfinitsitsinermi inatsisinut tunngassuteqartut pillugit nassuiaasarnerit siunnersuisarnerillu
  • Qinikkat isummernissaanut tunngavissianik suliaqartarneq
  • Isumaqatigiissutinik isumaqatiginninniutinillu paasiuminarsaaneq.


Makku piginnaasaqarfigissavatit/piginaasaqarfigalugillu:

  • Cand. jur.-iunngikkuit sulisoqarnermi inatsisinik sungiussisimasuusaatit imaluunniit suliassaqarfimmi ilinniakkatigulluunniit assingusumik misilittagaqarlutit
  • Sulisoqarnermut tunngatillugu sulisut ataasiakkaat ataatsimoortullu pisinnaatitaaffiinik misilittagaqassaatit, ajornanngippat Kalaallit Nunaanni
  • Attaveqarfigisartakkanik isumaqatiginninniarnernilu eqqaatsumik aaqqiissuteqartarnissanut piginnaasaqassaatit
  • Oqaluttariarsorlutit allattariarsorlutillu qaffasissumik pitsaasumillu saqqummiisinnaasaatit
  • Kisitsisinik suliaqallaqqissuusaatit paasinnillaqqissuullutillu aammalu inatsisigut/aningaasaqarnikkut aarlerinarsinnaasunik takunnillaqqissuusariaqarlutit
  • Inuiaqatigiinnut kalaaliusunut tunngasunik ilisimasaqarluarneq aammalu inuaqatigiinnut kalaaliusunut tunngasunik oqaasiinillu paasinnissinnaasaatit.


Neqeroorutigaavut:

  • Suliffik pissanganartoq akisussaassuseqarfiusorlu
  • Isumaqatiginninniartarnerni peqataasarneq
  • Suliffik nammineq allaffeqarluni eqaatsumik suliffiusoq suliassaqarfiillu akimorlugit suleqatigiiffiusoq
  • Suliannut sunniuteqarluarlutit sulisinnaasaatit
  • Suliffik soqutiginartoq inussiarnersumik suleqatigiiffiusoq.

 
Kikkuuvugut
Aningaasaqarnermut Sulisoqarnermullu Aqutsisoqarfik Aningaasaqarnermut Naalakkersuisoqarfiup ataanni inissisimavoq Naalakkersuisunullu akuulluni.  Aningaasaqarnermut Sulisoqarnermullu Aqutsisoqarfiup qitiusumik allaffeqarfik tamakkerlugu sullitaraa. Isumaqatiginninniarnermut Immikkoortortaqarfimmi sulisut tassaapput aningaasaqarnermik ilinniagartuut, inatsisilerituut siunnersortillu. Akissarsiat pillugit isumaqatiginninniartarnerit saniatigut isumaqatigiissutinik pingaarnermik nassuiaanerit aammalu eqqartuussiviit aqquutigalugit aaqqiagiinngissutinut tunngasut immikkoortortaqarfimmi suliarineqartarput. Suliffittut immikkoortortaqarfittullu sulisutut ineriartortuarnissavit periarfissinneqarnissaa soqutigisaraarput.

Aningaasaqarnermut Sulisoqarnermullu Aqutsisoqarfimmut tunngasut tassanilu naleqartitat uani atuarsinnavatit: www.asa.gl

Annertunerusumik paasissutissat
Paasissutissat annertunerusut immikkoortortaqarfimmut pisortamut Frederik Schmidtimut oqarasuaat +299 34 66 81, mail fsch@nanoq.gl imaluunniit siunnersortit pisortaat Michael Würtz oqarasuaat +299 64 22, mail miwu@nanoq.gl aqqutigalugit saaffiginninnikkut pissarsiarineqarsinnaapput

Qinnuteqaat
Ulloq qinnuteqarfissaq kingulleq tassaavoq 28.09 2020 nal 12:00.
Atorfinitsitsipallassinnaanissaq siunertaralugu atorfininnissamut oqaloqatiginninnerit ingerlaavartumik ingerlanneqartassapput isumaqatigiinnikkullu atorfinitsitsisoqassalluni. Qinnuteqaat CV-imik ilalik aammalu ilinniakkamit tamarmiusumit soraarummeersimanermit uppernarsaatinik angusaasimasunillu tamanik ilalik nassiuteqquneqarpoq. Oqaloqatiginninnermut atatillugu misiligutinik atuisoqassaaq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk