Skip to main content
122

Dette jobopslag er udløbet

Isumaginninnermut Aqutsisoqarfiup Oqartussaaffia AC-fuldmægtigimik ataatsimik ilaqutariinnermut tunngassutilinnut, misissugassanut paasiniaaqqissaarnermik pilersaarusianullu ineriartortitsinermik piginnaanilimmik pissarsiorpoq

Isumaginninnermut Aqutsisoqarfiup Kalaallit Nunaanni meeqqat inuusuttullu atugarliortut pillugit suliniutaannik nukittorsaaqataallutillu ineriartortitseqataarusuppit? Namminersorsinnaavit, nassaarniallaqqippit suliniuterpassuillu akuuffigissallugit kajumittuuit? Taamaappat uagutsinnut piukkunnartuusinnaavutit! 
 
Isumaginninnermut Aqutsisoqarfik Meeqqanut, Inuusuttunut, Ilaqutariinnut inatsisillu atuutsinnerannut Naalakkersuisoqarfiup ataani aqutsisoqarfiuvoq. Atorfik Isumaginninnermut Aqutsisoqarfiup Innuttaasunut Immikkoortortaqarfianiippoq (Borgerrettet Afdeling). Innuttaasunut Immikkoortortaqarfik innuttaasunut toqqaannartumik attaveqartarpoq psykolog-it atorlugit ikiuisarnikkut, aammattaaq ilaqutariinnut isumaginnittunut sinerissami isumaginninnermik suliaqartunut attaveqartarnikkut. Innuttaasunut immikkoortortaqarfiup psykolog-inik ikiuisarnera pisarpoq ilaatigut angalaqatigiittartut inersimasunik katsorsaasartut, kinguaassiutitigut atornerlunneqarsimanermik kingunerluutinut katsorsaasartut, Alliaq, inatsisitigut ataataqanngitsut, innarliisimasunik katsorsaaneq, angalaqatigiittartut meeqqanik katsorsaasartut aqqutigalugit.
 
Suliassat assigiinngiiaaqaat fagillu akimorlugit suleqatigiittarnissamik piumasaqaateqarput, namminersorlunilu nammineq suliassat suliniutillu pillugit akisussaaffeqartumik sulisarnissaq pisariaqarpoq. Sammisassanut nutaanut pulapallassinnaanissat, eqaatsumik pissuseqarnissat, ilaannikkullu suliffeqarfimmi ulluinnarni ulapaarfiusinnaasartumi suliassat annikitsut annertuullu  paarlakaassinnaasarfiini akuusarnissat piareersimaffigisassavat. AC-fuldmægtigitut sulinerni akisussaaffimmik annertuumik tigummisaqartartussaavutit, Kalaallillu Nunaanni ilaqutariinnermut tunngasunut ineriartortitseqqiinissamut piginnaanngorsaqqiinisamullu tapersiinissamut periarfissaqassallutit.

Atorfik pillugu
Suliassat ilaatigut makkuninnga imaqarput

  • Suliniutit iliuuseqarfissallu ineriartortillugillu siuttuuffigalugit, suliniutinilu suliassat tamaasa akuuffigissallugit
  • Ilitsersuutit naqitat atuakkallu najoqqutassiat pilersinnissaat kukkunersiornissaallu suleqataaffigalugit
  • Inunnik isumaginninnerup iluani misissuisarnerit, nalilersuisarnerit il.il. siuttuuffigigisarlugit peqataaffigisarlugillu
  • Suleqatigiiffinni Isumaginninnermut Aqutsisoqarfimmiittuni peqataasarnissaq taakkulu suliassaasa piareersarnerini ataqatigiissaarisarneq
  • Misissueqqaartoqartillugu aamma suliniutit iliuuseqarfissallu ineriartortinneqarnerini kommuneqarfiit akuutittarlugit
  • Siunnersuutitta ilitsersuutittalu tigusisartuini nalilersuinermik suliaqartarneq kursusertitsisarnerlu
  • Nittartakkatsinnut allaatigisassanik aaqqissuisarneq allattarnerlu
  • Ataatsimiinnerni imaqarniliortarneq allakkiortarnerlu ataatsimiinnissanullu piareersaasarneq isumagisarlugu
  • Utaqqiisaasumik suliassat isumagisarlugit

Piginnaatsit:

  • Inuiaqatigiilerinermi naapertuuttumik assigisaanilluunniit kandidateqassaatit
  • Suliniutit iluanni pilersitsiortornermilu, taamatuttaaq suliniutini siuttuusarnermik misilittagaqassaatit
  • Namminersorlutit, ataqatigiissaarisinnaallutit ineriartortitsisinnaasumillu suleriaaseqassaatit
  • Suliap pitsaasuunissaanik pingaartitsisuullutillu nutaaliorsinnaassuseqassaatit
  • Allattariarsornermi oqaluttariarsornermilu piginnaassuseqarluassaatit
  • Pissutsit allanngoratarsinnaanerinut piareersimasuussaatit suliassanullu nutaassanut ammasuullutit
  • Avammut ammasuussaatit, ikiuiumatuujullutit, suleqatigiillu akornanni attaveqartitsisarnermut pilersitsisinnaassuseqarlutit
  • Suliffeqarfimmi avatangiisit fagit kulturillu assigiinngitsut akimorlugit suleriaaseqartuni akuusut tamarmik sianigalugit aaqqiissutissanik nassaarniaqatigiittartunut kajumillutit sulissallutit akoorusussuseqassaatit kajumissuseqartuussaatit
  • Kalaallit Nunaanni inuiaqatigiinnut tunngassutilinnut kalaallillu kulturiannut ilisimasaqarnissat iluaqutaassaaq.
  • Marluinnik oqaaseqarnissat kissaatiginarpoq, piumasaqaataananili.
  • Inunnik isumaginninnermut tunngassutilinni atuagarsornikkut misilittagaqarnikkullu ilisimasaqarnerit kissaatiginarpoq piumasaqaataananili.

Ulloq atorfiniffissaq
1.  august 2021 imalt. immikkut isumaqatigiinnikkut.

Kingusinnerpaamik ulloq qinnuteqarfissaq tassaavoq 8. Juli 2021 nal. 12.00 (Kalaallit Nunaanni nalunaaqutaq naapertorlugu)
Atorfininnissaq siunertaralugu oqaloqatigiittarnissat tamatuma kinguninngua ingerlanneqassapput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat annertunerusut
Atorfik pillugu annertunerusumik paasisaqarusukkuit immikkoortortaqarfimmi pisortaq Naja Lund Kielsen attaveqarfigisinnaavat oqarasuaat una sianerfigalugu +299 34 60 64 imalt. e-mailikkut nalk@nanoq.gl  

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk