Tusarnaallaqqippit nunalu tamakkerlugu innuttaasut inuunerinik allanngueqataarusussuseqarpit? Tusaannga oqarasuaatikkut sms-ikkullu siunnersuisartumik aalajangersimasumik unnuarsiortartussamik pissarsiorpoq. Siunnersuisartutut pingaarnertut oqaloqateqarnernik tapersiisuusunik neqerooruteqartarnissat aamma innuttaasut inuunerminni artornartorsiortunut siunnersuisarnissat suliassarissavatit.

Tusaannga tassaavoq Kalaallit Nunaat tamakkerlugu meeqqanut, inuusuttunut inersimasunullu oqarasuaat 801180 aamma sms 1899 aqqutigalugit siunnersuisarfik. Tusaannga innuttaasunut tarnimikkut atugarliortunut imaluunniit nalinginnaasumik inunnit qanimut avatangiisiminnit imaluunniit najukkaminni inuiaqatigiinnit ikiorserneqarsinnaanngitsutut misigisimasunut, ajornartorsiutitik pillugit arlaannik oqaloqateqarnissaminnik pisariaqartitsisunut neqeroorutaavoq.
Ajornartorsiutit isumagineqartussat assigiinngitsorpassuusinnaapput. Taamaattumik illit siunnersortitut misiginneqataasinnaanissat, pisumut naleqqussallaqqittuunissat, nukittuujunissat aamma pisuni uisakajaarfiusuni eqqarsarluarsinnaanissat pingaaruteqarput. Oqaloqatiginnittarneq siunnersuisarnerlu misilittagaqarfigigukkit aammattaaq oqaloqatiginneriaatsit pillugit ilisimasaqaruit misilittagaqaruilluunniit iluaqutaassaaq.

Tusaannga Isumaginninnermut Aqutsisoqarfiup ataaniippoq aamma Innuttaasunut immikkoortortaqarfimmut ilaalluni.

Oqarasuaatikkut siunnersortitut suliarisassatit pingaarnerit tassaapput:

• Oqarasuaatikkut oqaluttariarsorluni oqaloqatiginninnerit aamma sms aqqutigalugu allattariarsorneq.
• Meeqqat/inuusuttut inersimasullu ajornartorsiortut tusarnaarluaqqissaarlugit oqaloqatiginninnernik tapersiisuusumi ingerlatsineq, assersuutigalugu ajornartorsiutit tassaasinnaapput qinngasaarneqartarneq, persuttarneqartarneq, perorsarneqarneq, inooqatigiinnikkut ajornartorsiuteqarneq, imminut toqunnissamik eqqarsaateqartarneq, kinguaassiuutitigut kanngutsaaliorneqartarneq, atornerluisarneq ilaalu ilanngullugit.
• Innuttaasut ajornartorsiutiminnik qaanngiiniarlutik iliuuseqarnissaannik kaammattornissaat siunnersornissaallu.
• Katsorsaanikkut neqeroorutinut allanut innersuussisarnissaq.

Illit makkunannga piginnaasaqartutit atorfinitsikkusuppatsigit:

• Inunnik artornartorsiortunik sullisserusussusilik aamma allanngueqataarusussusilik.
• Innuttaasut sanngiilliortut pillugit allanngueqataarusussusilik.
• Unnuami sulinermik nuannarisalik.
• Naliliisinnaassuseqarluartoq aamma pisuni ulapaarfiusuni iliuuseqarsinnaassusilik.
• Aalajaatsoq aamma siunissami ungasinnerusumi imminut atorfimmiissinnaasutut isigisoq.
• Aaqqissuulluakkamik sulisinnaasoq, akisussaassuseqarluartoq, inerisimasoq nukittoorlu.
• Oqaluttariarsornikkut allattariarsornikkullu attaveqatiginnillaqqissoq.
• Teknikikkut piginnaasaqarluartoq.
• Peqqissaanermik, perorsaanermik imaluunniit isumaginninnermik ilinniagalik.
• Danskisut/kalaallisut marluinnik oqaasilik. Ilassutitut Tunumiusut oqalussinnaaguit iluaqutaassaaq.
• Nuummi najugaqalik.

Suliffik imaattoq ilinnut neqeroorutigisinnaavarput:

• Inoqatinnut malunnaatilimmik allanngueqataasassaatit atorfimmi isumaqarluartumi pissarsiffiulluartartumilu.
• Annertuumik akisussaaffeqassaatit.
• Suleqatigiit tunniusimasut ataqatigiilluartullu.
• Inuttut suliatigullu ineriartornissamut periarfissat pitsaasut.

Atorfik piffissaq tamakkerlugu atorfiuvoq (sapaatip-akunneranut nalunaaquttap akunneri 40-t suliffiuvoq) aalajangersimasumik unnuakkut pigaartutut atorfinitsinneqassaatit.
Atorfik ulloq 1/4 2023 imaluunniit periarfissaqarpat piaartumik inuttalerneqarnissaa kissaatigaarput.

Tusaannga aamma atorfik pillugu paasissutissat sukumiinerusut Mette Lange-Nielsen oqarasuaataanut saaffigineratigut pissarsiarisinnaavatit +299 346023 imaluunniit mailianut uunga allaffigalugu: mlan@nanoq.gl imaluunniit Ellen Johansson oqarasuaataanut saaffigalugu +299 346010 imaluunniit mailinut allaffigalugu eljo@nanoq.gl paasissutissat pissarsiarisinnaavatit.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk