Meeqqat atugaannik siuarsaataasussanik suliniutinik  ineriartortitsillutillu atuutsilersitsisarusuppit? Ineriartortitsinikkut sulineq sungiusimaviuk naleqqussariaannaavillu? Taamaappat Meeqqanut ukioqanngitsuniit 18-it angullugit ukiulinnut pilersaarummut tunngatillugu illit pissarsiarerusuppatsigit.

Erninermut atatillugu paarlattaaffissap sivitsornissaanut periarfissaqarpoq.

Pilersaarut pillugu Meeqqat ukioqanngitsuniit 18 angullugit ukiullit

Pingaarnertut siunertaavoq Meeqqat ukioqanngitsuniit 18-it angullugit ukiullit tamarmik pitsaasumik inuuneqarlutik, atugarissaarlutik ineriartornissaat. Suliaqarfiit assigiinngitsut akornanni eqaatsumik suleqatigiittoqarnissaa siunnillugu sulissutigineqarpoq, aamma isumaginnermut tunngasut, ilinniartitaanermut tunngasut peqqinnissamullu tunngasut isumaqarluartumik ataqatigiissaarneqarnissaat sulissutigineqarpoq. 

Pilersaarummi meeqqap inuusuttullu inuunerani ikaarsaarfigisai qitiutillugit suliniutigineqarput; angerlarsimaffimmiit ulluunerani meeqqeriviit ikaarsaarnera, ulluunerani meeqqerivimmiit atuarfimmut ikaarsaarnera, nunaqarfiup atuarfianit illoqarfiup atuarfianut ikaarsaarnera (ilinniartut angerlarsimmaviat). Aammattaaq suliaqarfimmi inatsisit atuuttut naapertorlugit meeqqat inuusuttullu ukioqanngitsuniit 18-it angullugit ukiullit tamarmik sulianik ilisimasalimmit imaluunniit inummit isumalluutaasumit ukiumut marloriarlutik takuneqartarnissaat suliniutigineqarpoq. Tamassuma qitiutinneqarnerani siunertaavoq aaqqissuussamik, sinaakkusersukkamik akisussaaffimmillu agguaassinikkut meeraq pillugu paasissutissanik attuumassuteqartunik atorneqartussanik tunniussinikkut siunnerfilinnik siusissukkut suliniutinik pilersitsisoqarnissaanut periarfissaqarnersoq qulakkiissallugu. Pilersaarummi suliniuteqarfiit siunertaraat kommunimi aaqqissuussaanerit, sakkussat suliniutillu pioreersut atorneqartullu nukittorsernissaat qaffassarnissaallu.
Qulaani sinaakkutit allaaserineqartut tunngavigalugit pilersaarummi kommunimi misiliutaasumi suliallit suleqatiginerisigut , ingerlatassat qulaani taakkartorneqartut digitalimik ingerlanneqarnissaanni tapersersuutaasussaanni IT-systemimik ineriartortitsisoqarpoq misileraasoqarlunilu.

Meeqqat ukioqanngitsuniit 18-it angullugit ukiullit Meeqqat Ineriartornerannut Immikkoortortaqarfimmi inissisimavoq.
Meeqqat, inuusuttut, suli atualinngitsut aamma ilaqutariit pillugit suliniutit nukitttorserneqarnissaat immikkoortortap pingaarnertut siunniussaraa.  Immikkoortortaqarfik Meeqqanut, Inuusuttunut Ilaqutariinnullu Naalakkersuisoqarfiup ataani politikkikkut inissisimavoq.

Atorfik pillugu
Suliaqarfinnit assigiinngitsuniit suleqatigiinni suliniutinik aqutsisut marluk suliatigullu pisortaq ataaseq suleqatigilissavatit. Suliniutinik aqutsisut allat kommunillu qanimut suleqatigalugit pilersaarummi suliniutit ineriartortinnissaat atuutsilersinneqarnissaallu suliassarissavatit. Taamaattumik naatsorsuutigaarput paarlakaattumik namminersorluni sulisinnaaneq aamma suliniummik ingerlatseqatigiit, kommunini pingaarnertut ingerlataqartut aamma aqutsisoqarfiit, aammattaaq suleqataasut sinneri qanimut suleqatigisarsinnaasassagitit.

Suliassatit ilaatigut makkuupput:

• Suliniutinik pilersaarummut tapersersuutaasunik inerisaaneq atuutilersitsinerlu
• Kommunit, aqutsisoqarfiit allallu akornanni suleqatigiinnermik ataqatigiissaarineq
• Kommunini suliniutinik atuutilersitsinissaq attassinissarlu, atuutilersitsinissamut paasissutissanik suliaqarneq ilaalu ilanngullugit.
• Naalakkersuisoqarfimmut allakkiorneq suliallu ingerlanneri pillugit nalunaarusiorneq
• Ataatsimiinnernik aamma workshopinik ingerlatsineq aamma kiffartuussineq
• Immikkoortortami suleqatigiiaat sinneri suleqatiginerisigut suliassaalertut assigiinngitsut allat pillugit aaqqiissuteqateqartarneq

Makkuninnga piginnaasalimmik suleqatissarsiorpugut:

• Suliniutinik ineriartortitsinermillu suliaqarnermik misilittagalik
• Allattariarsornikkut oqaluttariarsornikkullu paasissutissiineq nukittuffigalugit piginnaasalik
• Suli atualinngitsut, atuarfiit, isumaginninneq aamma/imaluunniit peqqinnissaqarfik pillugit ilisimasalik misilittagalillu, Kalaallit Nunaannut aamma atatillugu
• Naleqquttumik ilinniagalik
• Tunniusimasoq aamma kattuffiit, suliaqartartut immikkoortullu assigiinngitsut akornanni pitsaasumik suleqatigiittoqarnissaanik qulakkeerinnissinnaasoq
• Allattariarsornikkut oqaluttariarsornikkullu kalaallisut danskisullu piginnaasaqaruit iluaqutaassaaq.

Sapaatip akunneranut akunnerni 40-ni sulisassaatit.

Piffiit ilaanni atorfimmut atatillugu angalasarnissaq naatsorsuutigineqassaaq.

Ulloq atorfiniffissaq:
1.marts 2023 isumaqatigiinnikkulluunniit. 
 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat  sukumiinerusut
Atorfik pillugu sukumiinerusumik paasisaqarusukkuit, Meeqqat Ineriartornerannut Immikkoortortaqarfimmi pisortaq Maliina Junge Jørgensen uunga allaffigalugu;  maju@nanoq.glimaluunniit oqarasuaammut uunga sianerlutit attavigisinnaavat: 523286
Imaluunniit suliatigut pisortaq Aviaaja Pedersen Lynge; Avpl@nanoq.gl  tlf. 346873

Qinnuteqarnissamut piffissaliussaq:
06.02.2023

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk