Skip to main content
91

Dette jobopslag er udløbet

Isumaginninnermut Aqutsisoqarfik Immikkut Suleqatigiissitamut isumaginninnermut siunnersortimik pissarsiorpoq

Inuuit malunnaatilimmik aaqqissuussaanermik pingaartitsisoq, meeqqanut inuusuttunullu suliassaqarfimmi qaffasissumik sullissisinnaasoq? Inuuit inunnik allanik suleqateqarninni siunnersuisarlutillu tapersersuisartoq? Suleqatigiiusunut ilaarusuppit, Kalaallit Nunaat tamakkerlugu kommunini sullissisut meeqqanut inuusuttunullu suliassaqarfimmi piginnaasaannik kivitseqataanikkut allanngueqataarusussuseqartoq? Taamaappat Immikkut Suleqatigiissitami Isumaginninnermut Aqutsisoqarfimmiittumi immaqa suleqatissaraatsigit.
 
Atorfik pillugu
Sulisussarsiorpugut,  kommuninut pilertortumik ikiorneqarnissaminnik pisariaqartitsisunut sanileriilluni ilinniartitsinikkut siunnersuinikkut ilitsersuinikkullu ikiuussinnaasumik, taamaalillutik meeqqat sakkortuumik sumiginnarneqarsimasut pillugit suliassanut piukkunnarnerulerlutillu iliuuseqarsinnaalerniassammata, taamaaliornikkullu meeqqat ilaqutaasullu piginnaatitaaffii nukittorsarniarlugit inatsisillu eqquutsinniarlugit. Immikkut Suleqatigiissitamut immikkoortoq kommunimi sullissinermi sulisunut sanileriilluni ilinniartitsisinnaassaaq tapersersuisinnaassallunilu aamma oqartussaasunut ilitsersuut, nalunaarsuiffiit aamma ilisserutissanut atortut suliassaqarfimmut suliarineqarsimasut atorneqarnissaannut ilinniartitsillunilu ikiuutissaaq.
 
Tunuliaqut
Naalakkersuisut danskillu naalakkersuisui Nunatsinni meeqqat inuusuttullu atugarliortut nukittunerulersinnissaannut susassaqarfiit akimorlugit suleqatigiiffigisaminnik suliniuteqalersimapput.  Sulinermi suliniutinut angusassaqarfiusunut kaammattuutit 16 pilersinneqarput, tassani Immikkut Suleqatigiissitamut immikkoortoq meeqqanut inuusuttunullu suliassaqarfimmi piginnaanngorsaanissaq suliassaanut ilaalluni. Taamaattumik atorfik danskit kalaallillu susassaqarfiit akimorlugit suleqatigiiffigisaannit aallaaveqarpoq, aallaaviatigullu 2023-p naaneranut piffissalerneqarluni, sivitsorneqarsinnaajumaarporli.

Atorfimmut naleqqutissaguit ammasuussaatit suliassallu assigiinngitsorpassuit suliarisinnaassavatit, namminersorlutit sulisinnaassaatit, misissuisinnaassaatit allanillu siunersiorluarsinnaassallugit, aamma pinasuartumik ikiorserneqarnissamik pisariaqartitsilernermi sulisinnaassaatit pimoorussilluarsinnaanerit atorlugu.  Atorfimmut atatillugu annertuumik angalasarnissaq naatsorsuutigisariaqarpoq aammalu piffissaq sivikitsoq atorlugu aallariataarsinnaasoqassaaq.
 
Suliassatit ilaatigut makkuussapput:

  • Meeqqanik inuusuttunillu sumiginnagaasimasunut aamma/imaluunniit kinguaassiutitigut atornerlunneqarsimasunut sullissisunut attuumassutilinnut kommuninullu tunngatillugu suliani aalajangersimasuni ilitsersuisarneq siunnersuisarnerlu
  • sanileriilluni ilinniartitsinerit sulianillu suliarinnittartunut ikiuinerit
  • Isumaginninnermut Aqutsisoqarfimmi suliffiup iluani avataanilu suliassaqarfiit akimorlugit suliaqarnernut peqataasarneq
  • immikkoortortaq suleqatigalugu isumaginninnermi sulianut tunngasutigut ilisimasanik ingerlatitsinissaq, periutsinik suliniutinillu ingerlaavartumik nutarterinissaq qulakkeerneqassaaq
  • suliareqquneqartut nukinginnartut, assersuutigalugu ajornartoornermi upalungaarsimasunut peqataaneq, ineriartortitsinermi suliniutinut atatillugu suleqatigiissitami peqataaneq.


Naatsorsuutigaarput, illit:

  • isumaginninnermi siunnersortitut ilinniagaqartutit
  • pisortaqarfinni suliaqartarnermik misilittagaqartutit – pingaartumik meeqqanik inuusuttunillu suliassaqarfimmi sulianik sullissisarnerup iluani
  • immikkoortut akimorlugit suleqatigiittarnernik ilisimasaqarluartutit
  • ataqatigiissaarillaqqittuullutillu suleqatikkuminartuusutit
  • inoqatinnut akuersaartumik nukissallu qitiutillugit isummersuisinnaasutit
  • atassuteqartarnernik pilersitsinissamut pitsaasunik piginnaasaqartutit
  • aaqqissuulluakkamik ilusilersugaasumillu sulisartutit, aaqqiissuteqarsinnaassuseqartutillu
  • marluinnik kalaallisut danskisullu oqaaseqartuusutit.


Illilli makku pissarsiarissavatit:

  • atorfik aqutsisoqarfimmi kommuninilu piginnaasannik naleqartitsisoq pisariaqartitsisorlu, tamatigoortoq assigiinngitsunik pissanganartunik suliassaqarfiusoq
  • meeqqanut inuusuttunullu suliniummik nukittorsaasinnaasutit
  • suliassaqarfiup annertuumik ilisimaneqarluartup kivitseqataaffiginissaanut sunniuteqarfigisinnaavat
  • suliffeqarfik ilisimasaqarluarfiusoq, siunersiuinermik pingaartitaqarfigisarput pitsanngoriartuinnavinnissarlu anguniarlugu immitsinnut ikioqatigiiffigisarput peqataaffigilissavat
  • aqutsisoq suliamut tunngasunik piginnaasannut tatiginnittoq, piviusorsiortunik piumasaqaateqartartoq ineriartornissannillu salliutitsisoq
  • suleqatit pitsaasut suleqatigiilluarnissamik pingaartitsisut - aamma ulapaarfimmi,
  • persuarsiorpalaanngitsumik attaveqarneq sulinissamullu tunngavissanik nammineq sunniuteqarsinnaaneq,
  • sulininni nunarput tamakkerlugu angalaffiginissaanut misiginissaanullu periarfissaqarputit.


Atorfik Isumaginninnermut Aqutsisoqarfiup Oqartussaaffeqarfiani inissisimavoq, illillu Immikkut Suleqatigiissitap immikkoortuani sulissaatit, kommunini meeqqanut inuusuttunullu suliassaqarfimmi sullissisunik sanileriilluni ilinniartitsinikkut Kalaallit Nunaanni tamarmi sullissinerup pitsaassusaata qulakkeerneqarnissaanut iluaqutaassaatit. Taamaammat Immikkut Suleqatigiissitami sulininni annertoorujussuarmik akisussaaffeqassaatit nuna tamakkerlugu kommunit ingerlatsiviini inatsisitigut isumaginninnermillu suliaqarnerup ineriartortinnerani ikorfartuissaatit.
 
Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfimmi Isumaginninnermut Aqutsisoqarfik immikkoortortaqarfinnut arfinilinnut agguarsimavoq: Pitsaaliuinermut immikkoortortaq Paarisa, Aningaasaqarnermut immikkoortortaqarfik, Ulloq unnuarlu aamma Innersuussisarnermut Immikkoortortaqarfik, Oqartussaasunut immikkoortortaqarfik, Innuttaasunut Immikkoortortaqarfik aamma Allattoqarfik. Immikkoortortaqarfiit qanimut suleqatigiittarput, suliffiuvorlu suliffimmi pitsaasumik avatangiiseqarnissamik assigiinngissutitsinnillu pingaartitsiffiusoq.
 
Ulloq sulilerfissaq
1. april 2021 isumaqatigiissuteqarnikkulluunniit.
 
Qinnuteqarfissaq kingulleq tassaavoq tallimanngorneq ulloq 5. marts 2021 nal. 12.00 (Nunatta nal.).
Atorfinitsitsiniarluni oqaloqatiginninnerit tamatuma kinguninngua ingerlanneqartussatut naatsorsuutigineqarput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Piffissaq suliffiusoq aallaavittut sapaatip akunneranut nalunaaquttap akunnerinik 40-nik sivisussuseqarpoq.

Ineqarneq
Atorfimmut atatillugu inissiamik pisatsersugaanngitsumik inissaqartitsisoqarsinnaavoq. Qinnuteqartorli Namminersorlutik Oqartussani atorfeqarnerminut atatillugu sulisutut ineqareersimaguni, sulisunut inissiamik innersuussiffigineqarsinnaanini attatiinnassavaa. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfiullu atorfigiunnaarnerani kingusinnerpaamillu pilersaarut naammassineqarpat qimanneqassalluni.
 
Paasissutissat sukumiinerusut
Atorfimmut tunngatillugu paasissutissat amerlanerusut pisariaqartikkukkit Immikkoortortaqarfimmi pisortaq Stina Sværd attaveqarfigisinnaavat  oqaras.: +299 34 60 70 imaluunniit e-mailikkut stin@nanoq.gl-imut.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk