Skip to main content
79

Dette jobopslag er udløbet

Isumaginninnermut Aqutsisoqarfik angajoqqaarsianut tunngasunut immikkoortortaqarfik siunnersortimik pissarsiorpoq

Pitsaassutsimik qulakkeerinninnissamut peqataarusuppit, Kalaallit Nunanni angajoqqaarsiaqartarnerup tungaatigut  nukittorsaassallutit ineriartortitseqataallutillu? Oqartussat suliaannik misilittagaqarpit, isumaginninnermullu tunngasunik ilinniagaqarpit imaluunniit perorsaanermut tunngasunik tunuliaqutaqarpit? Ataatsimut suleqatiinnut peqataarusuppit, piginnaasanillu kivitseqatigiinnissamut peqataarusuppit, Kalaallit Nunaanni kommunini tamani angajoqqaarsiaasunut siunnersortit piginnaanngorsarneqarnerannut sunniuteqaqataarusuppit? Taava immqa illit Isumaginninnermut Aqutsisoqarfimmi suleqatissaraatsigit.

Atorfik pillugu
Angajoqqaarsianut tunngasunut immikkoortortaqarfimmi ujartorparput suleqatissarput pikkorissoq misilittagartoorlu. Illit kommunit peqatigalugit angajoqqaarsiaasunut siunnersortit siunnersorlugillu aqqutissiuuttassavatit kiisalu angajoqqaarsiaqarnermut tunngatillugu ajornartorsiutaajumaartunut tunngasunut sulianut tapersiisassallutit. Atorfik ilinnut tulluassappat - ammasuussaatit, suliassanullu assigiinngiiaartorpassuarnut patajaatsuullutit, namminersorlutit sulisinnaassuseqassaatit, peqqissaarussisoq kiisalu allanik suleqatissarsiortuussallutit.

Suliassavit ilaat makkuupput:

  • Kommunit angajoqqaarsianut siunnersortaanik  siunnersuineq aqqutissiuinerlu
  • Angajoqqaarsiaqartarnermut tunngatillugu sulianut ajornartorsiutaajumaarsinnaasunut tapersersuineq
  • Ataqatigiissaarineq kiisalu tunngaviusumik pikkorissaanissamut pilersaarusiorneq kiisalu angajoqqaarsianik ilinniartitseqqiinerit
  • Angajoqqaarsiaqartarnermut tunngasunik immikkoortortaqarfiup aqunneqarneranik peqataaneq, suliaqarneq kiisalu ineriartortitsinermut suliaqarneq
  • Isumaginninnermut tunngasunik suliaqarnermut ilisimasanik ataavartumik takussutissiineq, periuutsit kiisalu suliniaqatigiit peqatigalugit suliniutit
  • Angajoqqaarsiaqartarnermut tunngasunik ilisimasanik katersineq ingerlatitseqqiinerlu
  • Isumaginninnermut tunngasunik Aqutsisoqarfiup iluani avataaniilu akimortumik suleqateqarnermut peqataaneq 
  • Suliassat allat assersuutigalugu ineriartortitsinermut tunngasunik suliniutinut atatillugu suleqatigiinnut peqataaneq


Siunnersorti piumasarput tassaavoq:

  • Inunnik isumaginninnermut siunnersortitut ilinniagaqarsimasoq imaluunniit isumaginninnermut tunngasunik naleqquttumik ilinniagaqarsimasoq
  • Isumaginninnermut tunngasumik ilinniagaqaqqissimasoq 
  • Politikkikkut aqunneqartumit kattuffimmi suliaqarnermut misilittagalik
  • Meeqqanik inuusuttuaqqanillu sumiginnagaasimasunik suliaqarnermik misilittagalik, matumani angajoqqaarsiaqartarnermut tunngasunik
  • Akimortumik suleriaaseqarnermi suleqatigiinnermik misilittagalik
  • Ilinniartitsinermik misilittagaqalik kiisalu ilisimasanik ingerlatitseqqiinermik
  • Suliniutinik ineriartuutaasunik suliaqarnermi misilittagalik
  • Namminersorluni sulisinnaassusilik, ataqatigiissaakkamik, ilusilersugaasumik kiisalu aaqqiissuteqarsinnaasoq
  • Oqaluttariarsornikkut allattariarsornikkullu piginnaasaqarluartoq 
  • Alapernaatsoq, suliumatussusilik ujartuisorlu kiisalu pitsaasumik suleqatigiinnissamik peqataarusussusilik
  • Suleqatikkuminartoq ataqatigiissaarilluartorlu
  • Attaveqaatinik pitsaasunik pilersitsisinnaassusilik
  • Nukissaqarluartoq kiisalu inunnut allanut nersuarpaluttoq
  • Marluinnik oqaasilik, kalaallisut danskisullu


Illit iluaqutissatit:

  • Atorfik tamatigoortoq pissanganartorpassuarnik assigiinngiiaartunik suliassalik, aqutsiveqarfimmi, kiisalu kommunini illit piginnaasannik qujarussisoq pisariaqartitsisorlu
  • Meeqqanik inuusuttuaqqallu angajoqqaasiallit pillugit suliniuteqarnermi nukittorsaanissamut periarfissaqarneq
  • Eqqummaarilluakkamik immikkoortortami kivitseqatigiinnissamut sunniuteqarneq
  • Suliamut nukittuumik avatangiiseqarneq, siunnersoqatigiilluarnissamik pingaartitsisut  kiisalu imminnut ikioqatigiittut pitsanngornerujuarumanermik pingaartitsisut
  • Aqutsisoq, illit suliannik tatiginnittoq, piviusorsiortumik piumasalik kiisalu illit ineriartornissannik salliutitsisoq
  • Suleqatit pitsaasut, ataatsimut peqatigiinnissamut pingaartitsisut – aamma ulapaarfimmi
  • Suliffik ilumoorsaarfiunngitsoq kiisalu suliassat nammineq sinaakkusersorneqarnissaannik sunniuteqarfiusoq
  • Sulianut atatillugu angalanissamut periarfissaqarneq


Isumaginninnermut Aqutsisoqarfik, Inunnik Isumaginninnermut, Ilaqutariinnermut, Inatsisinillu atuutitsinermut tunngasunik Naalakkersuisoqarfiup ataani aqutsiveqarfiuvoq. Atorfik Isumaginninnermut Aqutsiveqarfimmi Oqartussaasut immikkoortortaqarfianiippoq. Taamaattumik angajoqqaarsiaqarnermut tunngasunik siunnersortitut annertuumik akisussaaffilerneqarputit, inatsisitigut ikorfartuinissamut kiisalu angajoqqaarsiaqartarnermut tunngasunik immikkoortortap iluani isumaginninnikkut tunngasunik nuna tamakkerlugu ineriartortitsissallutit.
 
Ulloq atorfinititsinissaq
1.  maj 2021 imaluunniit isumaqatigiissuteqarnikkut.

Ulloq qinnuteqarfissap killiliussaq ulloq 15. April 2021 nal. 12.00 (kalaallit nunaata nalunaaqutaa malillugu)
Tamatuma kingorna atorfimmut atatillugu oqaloqatiginninnerit ingerlanneqarnissaat naatsorsuutigineqarpoq.

Akissarsiassat- atorfininnermullu tunngasut
Akissarsiassat- atorfininnermullu tunngasut, matumani atorfininnermut atatillugu angalanissamut- soraarnermullu atatillugu angalanissamut akiliunneqarnissamut tunngasut kiisalu pigisanik angallassinermut tunngasut, atorfininnerup nalaani isumaqatigiissutaasut naapertorlugit – Namminersorlutik Oqartussat kiisalu kattuffik isumaqatiginninniaqataasoq akunnerminni isumaqatigiissutaat atuuttut naapertorlugit ingerlanneqassapput.
Suliffik sapaatip akunneranut nalunaaquttap akunnerini 40-ni suliffiuvoq.

Inissaq
Atorfimmut atatillugu inissiamik innersuussisoqarsinnaanngilaq. Qinnuteqartorli Namminersorlutik Oqartussat iluanni atorfimmut atatillugu ineqartitaaguni – inigisap paariinnarnissaanut pisinnaatinneqarpoq. Atorfimmut inigisaq atorfinititsinermut  tunngatillugu  inissiaataavoq, taamaattumik atorfiup qimanneqarnerani inigisaq atorunnaarsinneqassalluni.

Paasissutissat allat
Atorfimmut tunngasunik paasisaqarnerorusukkuit, immikkoortortami pisortaq Stina Sværd attaviginissaanut tikilluaqqusaavutit, oqarasuaat  +299 34 60 70 imaluunniit e-mail atorlugu uunga stin@nanoq.gl

Qinnuteqaat nassiuguk, CV, ilinniagaqarnermut- pikkorissarsimanermullu uppernarsaatit ilanngullugit, kiisalu pappilissat allat attuumassutillit, “Qinnuteqaat nassiuguk” toorlugu.
Qinnuteqaatit e-mail aqqutigalugu tiguneqarneq ajorput.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk