Skip to main content
152

Inuit Innarluutillit illersuisoqarfiat Tilioq A/C medarbejderimik inunnik isumaginninnermik, inuiaqatigiilerinermillu ilisimasalimmik sulisussarsiorpoq

Inuit Innarluutillit illersuisoqarfiat Tilioq A/C medarbejderimik inunnik isumagininnermik, inuiaqatigiilerinermilu suliaqarnermut ilisimasalimmik sulisussarsiorpoq, sullarissut nutaarsiullaqqissullu allaffeqarfianni peqataarusuttumik.  

Inuit Innarluutillit illersuisoqarfiat Tilioq Sisimiuniittoq Naalagaaffiit Peqatigiit innarluutillit pillugit isumaqatigiissutaa aallaavigalugu innarluutillit atugaannik sunniuteqarnissaq ineriartortitsinissarlu siunertaralugu A/C medarbejderimik sulilertussamik pissarsiorpoq. Inuit allat ikiorserlugit pingaarutilimmik sulinissat eqqarsaatigaajuk? Taava Tiliup allaffeqarfiani suleqatit peqatigalugit inuit innarluutillit atugaannik ineriartortitseqataallutillu sunniuteqaqataanissannut periarfissaqarputit

Atorfik pillugu:
Immikkoortortaqarfitsinni pingasuulluta suleqatigiikkallarpugut, eqaatsumillu suleqatigiissinnaaneq pingaartinneqarluinnarpoq. A/C medarbejderip suliassaasa pingaarnerit ilagaat, inuit innarluutilkit illersuisuannik allaffissornikkut ikiortaanissaq, suliassallu ukuupput, aningaasarsiat tungaatigut siumoortumik missingersuusiorneq – missingersorsimasallu malittarineqarnerannik nakkutilliineq. Taassuma saniatigut ASAp Tiliullu suleqatigiinnerisa akornanni HR-tut attaveqartarnissat. Suliassat annerit ilagaat inuit innarluutillit qanigisaasalu siunnersortarnissaat ilitsersuuttarnissaallu. Allaffeqarfitsinni suliassatigut annertuumik immitsinnut isumasiortuuvugut, taamaammat inunnut innarluutilinnut tunngatillugit suliniutinut pilersaarusiornermi, tusarniaanermi akissutinik ass. suliaqartarnissat ilimagissavat. Taamaammat Tiliumi suliniutit assigiinngitsut ataatsikkut pisarsinnaaneri eqqarsaatigalugit, A/C medarbejderitut patajaatsuunissaq nukittuujunissarlu pingaaruteqarput.      

Inuit Innarluutillit illersuisoqarfiat nutaarluinnaq Sisimiuni allaffeqarpoq. Isumaginninnermut Inatsisinillu Atuutitsinermut Naalakkersuisoqarfiup ataani immikkut namminersortumik ingerlavoq. Tilioq inatsisit atuuttut malillugit suleriuseqarpoq. Uani Inuit Innarluutillit ilersuisoqarfiata inatsisai atuarsinnaavatit: 

http://inatsisit.gl/Lov?rid=%7bFFE58690-9A67-40BC-A12D-76052F88F5D9%7d&sc_lang=kl-GL

A/C medarbejderimik ima piginnaasalimmik pissarsiorpugut:

  • Oqaatsitigut kalaallisut, danskisut ajornanngippallu tuluttut piginnaanilimmik.   
  • Allaffissornikkut, naatsorsuusiornermik, HR-millu misilittagalik.    
  • Inuit pisinnaatitaaffiinit toqqammaveqarluni suleriuseqarsinnaasoq.
  • Atorfimmut attuumassutilimmik ilinniagaqarsimasuunissaq, soorlu inunnik isumaginninnermi, inuiaqatigiilerinermi, allaffissornermi politikkimilu attuumassuteqarsinnaasunik misilittagalik.  
  • Ajornanngippat inuit innarluutillit pillugit ilisimasalik, inunnik isumaginninnikkut, innarluutilinnik peqqinnissaqarfimmiluunnit sullissinermi ilsimasalik. 
  • Nammineersinnaasoq, pilersitsisinnaasoq, naleqqussarsinnaasoq,  akuliusimalluni suleqataasinnaasoq, sukkaannaq suleriuseqarsinnaasoq, qiimasoq suliamullu tunniusimasoq, eqeersimasoq ataqqinnittorlu.   
  • Allattariarsornikkut oqallorissaarsinnaasoq inatsisinillu toqqammaveqarluni suleriuseqarnissamut piginnaanigissoq, isumassarsianik suliniutinillu piviusunngortitsisinnaasoq
  • Suleqatiginnissinnaalluartoq, eqimattakkaarnermilu tamanik inissaqartitsilluni, inulerinermilu ammasumik suleriuseqarsinnaasoq.
  • Qarasaasialerinermi atuinissamik ilisimannittoq, office pakkimut ingammillu Excelimik atuinissamut. 
  • Sulinermi piffissat nikerartuunerannut naleqqussarsinnaasoq.

Immikkoortortatsinni inukitsunnguugatta pingaartipparput inummik atorfimmut eqqortumik suleqatitaarnissarput, taamaammat qinnuteqaatip ataatsimut nalilersornerani piukkunnarnersiuinermi piginnaasat pisinnaasallu isiginiarneqassapput.     

Neqeroorutigaarput:

  • Suliffeqarfiup atorfiullu nutaap pissanganarlunilu allanngorartup periarfissaqartipaatit, ulluinnarni sulinikkut immersuiffigineratigut ineriartortinneqarneranullu annertuumik sunniuteqaqataaffiginissaanut.
  • Suliffeqarfik illit peqataanikkut allannguiiffigeqataasinnaasat. 
  • Suliffeqarfik sulianut tunngasunik avatangiisilik, suleqatinik pikkorissunik, unammillernartunik pilersitsisinnaasunillu periarfissalik, illillu unammilleeqataasinnaallutit.  
  • Suliffeqarfik inuit innarluutillit atugaanni angusassanik pilersitsiviusoq, sulianullu ineriartortitsinermi nalinginnaasumik kivitseqataanikkut ineriartortitseqataaffiusoq.  
  • Suliffimmi assigiinngissuseq naleqartinneqartoq avatangiisillu pingaartinneqartut.  

Sapaatip akunneranut 40 tiimi suliffiusassaaq. Ulloq atorfiniffik/aallartiffik: 1/8- 2019 isumaqatiginninniareerfiusumiluunnit.

Annertunerusumik paasissutissiat: 
Atorfik pillugu annertunerusumik paasisaqarusukkuit Innarluutillit Illersuisuat Christina Johnsen oqarasuaat +299 55 19 50 atorlugu imlt. E-mail; cjo@tilioq.gl paasiniaanissannut tikilluaqqusaavutit.   
Nittartakkatsinni suliatsinnut tunngatillugu annertunerusumik paasisaqarsinnaavutit: https://tilioq.gl/da/

Namminersorlutik Oqartussat ataani sulerusukkuit annertunerusumillu paasisaqarusukkuit nittartagaq www.naalakkersuisut.gl ataani ”atorfiit” iserfigalugu atuarsinnaavat. Annertunerusumik Sisimiut pillugu paasisaqarusukkuit nittartagaq una: https://www.qeqqata.gl/Emner/Om_kommunen/Byer_bygder/Sisimiut?sc_lang=da iserfigalugu paasisaqarnerusinnaavutit.
 
Qinnuteqaat
Allagarsissut piffissami 19/7-2019 tikillugu saqqummiunneqassaaq.

Oqaloqatigiinneq nammineerluni ornigunnikkut imlt. Videokonference atorlugu sapaatip akunnera 30-mi ingerlanneqarnissaa naatsorsuutigineqarpoq. 

Atorfimmut qinnuteqaat ilinniarsimanermut uppernarsaatinik ilalik, siornatigullu suliffigisimasanik paasissutissartalik cjo@tilioq.gl imut nassiunneqassaput.
 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk