Skip to main content
152

Inooqutigiinnut aningaasaqarnikkut kingunerisinnaasaanik misissueqqissaarneq – fuldmægtig imaluunniit Immikkut siunnersorti

Kalaallit Nunaanni inuiaqatigiit isumannaarnissaannut kiisalu Kalaallit Nunaannilu aatsitassarsiornerup ineriartorteqqinnissaanut peqataarusuppit? Aatsitassanut Suliffeqarnermullu Naalakkersuisoqarfik massakkorpiaq inooqutigiit aningaasaqarnerannut attuumasumik fuldmægtigimik/Immikkut siunnersortiimik pissarsiorpoq. 
 
Aatsitassanut Suliffeqarnermullu Naalakkersuisoqarfik fuldmægtigimik immikkut siunnersortimilluunniit aatsitassarsiornermik ingerlatsinermi inuiaqatigiit ”iluanaarutisiaasa” sapinngisamik annertunerpaatinneqarnissaanik nalilersuinernik isumaginnittussamik pissarsiorpoq.
 
Aatsitassanut Suliffeqarnermullu Naalakkersuisoqarfik
Kalaallit Nunaat aatsitassanik ujarlernermut iluaquteqarnermullu tunngatillugu pitsaasumik ineriartortuarsinnarpoq. Aatsitassanut Suliffeqarnermullu Naalakkersuisoqarfik ineriartornermi pingaarutilimmik inissisimavoq – oqartussaasutut, nunarsuup sinneranut nittarsaassinermi kiisalu nunatta aatsitassarsiornikkut periarfissaanik avammut siaruarterinikkut. Aatsitassarsiornermi periarfissanut soqutiginninnerup suli annertuup suliassat nutaat annertusiartortullu nassatarai.
 
Inuiaqatigiit kalaallit suliffissaqarnikkut, inuussutissarsiornermi ineriartornikut, akileraarutitigut isertitatigullu allatigut sapinngisamik annertunerpaamik pissarsisinneqarnissaat, Naalakkersuisoqarfiup aatsitassarsiornermik ingerlatsinernut atatillugu suliassaasa pingaarnerit ilagaat. Taamaammat fuldmægtigimik Immikkut siunnersortimilluunniit aatsitassarsiornermik ingerlatsinermi suliffissaqartitsinermik piffimmilu inuiaqatigiinnik inuussutissarsiortunillu qulakkeerinneqataasussamik pissarsiorpugut.
 
Aatsitassasiornermik Suliffeqarnermilu Naalakkersuisoqarfik aatsitassanik ujarlernissanut qalluinissanullu akuersissutinik aqutsivoq. Tamatuma saniatigut Naalakkersuisoqarfik ujarassiornermik suliniutinik arlalinnik aatsitassarsiornikkullu periarfissanik nunatsinni nunanilu allani nittarsaassinernik isumaginnippoq. Taamatullu minnerunngitsumik aatsitassarsiornernik ingerlatsinerit inooqutigiinnut aningaasaqarnikkut toqqaannartumik toqqaannanngitsumillu sunniutaasigut sapinngisamik annertunerpaamik pissarsinissaq qulakkeerniassavaa.
 
Suliffeqarfiuvugut pissanganartoq sukkasuumillu ineriartortoq. Ulluinnarni qiimasumik immitsinnut attaveqatigiittuuvugut, pisortat sulisullu toqqaannarnerusumik attaveqatigiillutik, taamaaliornermilu angusanut sunniuteqarnissamut inissaqartitsilluarluta.
 
Atorfik
Kalaallit Nunaanni aatsitassarsiornermik ingerlatsisut ujarlernernik aatsitassarsiornermilu suliniutinik annertusiartortunik ingerlatsipput. Ineriartornerup tamatuma inuiaqatigiinnut attuumassuteqartut aqutsinermi annertusiartornissaat nassataraa. Immikkoortumi sulisut allat suleqatigalugit Kalaallit Nunaata aatsitassarsiornikkut ineriartornermi sapinngisamik annertunerpaamik pissarsinissaanut qulakkeerinneqataassaatit.

Sulisutut nutaatut aatsitassarsiornermik immikkoortumi suliffeqarnermi, ilinniartitaanermi, aningaasaqarnermi inuiaqatigiinnullu tunngasunik  misissueqqissaarnernik kingunerisinnaasaanillu nalilersuinerni suleqataallutillu isumaginneqataassaatit.
 
Suliassatit ilaatigut makkuupput:

  • Inuiaqatigiinnut kinguneqaatit pillugit misissueqqissaarnernut malitassianik nutarterineq (Inuiaqatigiinni nungusaataanngitsumik toqqammaveqarnernik nalilersuinerit)
  • Suliffeqarfiit inuiaqatigiinnut kingunerisinnaasaanik misissueqqissaarnernik suliaqarnerinik ilitsersuineq
  • Tusarniaanernik innutaasullu ataatsimiitinneqarnerannik piareersaasiorneq ingerlatsinerlu
  • Aatsitassarsiornermik ingerlataqartut, kommunit Namminersorlutillu oqartussat akornani pingasuulluni isumaqatigiissutinik piareersaasiornernik isumaqatiginninniarnernilu peqataaneq (Impact Benefit Agreement)
  • Pingasuulluni isumaqatigiissutinik malitseqartitsineq
  • Aatsitassarsiornermut attuumassuteqartunik ilinniartitaanernut attuumasunik oqaloqatigiittarfinni peqataaneq
  • Piffinni inuussutissarsiortut aatsitassarsiornermik ingerlatsinermi akuunerannik siuarsaaneq

Atorfik ineriartortitsinermik suliaqarfiuvoq qinnuteqartumut inuiaqatigiinnut attuumasunik misissueqqissaarnernik assigiinngitsorpassuarnik paasisaqarnissamut periarfissiisoq, naalakkersuisoqarfinnilu/aqutsisoqarfinni, kommunini, aatsitassarsiorfiit suliffeqarnermilu illuatungeriinni atassuteqatigiiffinnik pilersitsinissamut periarfissiisoq.
 
Piginnaasat
Inummik inuiaqatigiit kalaallit aaqqissugaanerannut ajornanngippallu aatsitassarsiornermik ingerlatsisunik ilisimasaqarluartumik pissarsiorpugut, makkulu pingaartippavut:

  • Minnerpaamik bacheloritut qaffasissusilimmik ingerlaqqiffiusumik naleqquttumik ilinniagaqarneq
  • Naleqquttunik misilittagaqarneq, tassani inooqutigiit aningaasaqarnerannik inuiaqatigiinnulluunniit kingunerisinnaasaanik misissueqqissaarnernik suliaqarnermik misilittagaqarneq
  • Ineriartortitsinerni suliniutinullu tunngasunik suliaqarnermi piginnaasaqarluarneq, tassani suliat assigiinngisitaartut isumagisinnaanerat ajornartorsiutinilu allaanerusunut sukkasuumik iserfiginnissinnaaneq
  • Assigiinngitsunik ilinniagaqartunik suleqateqarumaneq suleqateqarsinnaanerlu
  • Ingammik ulapaarfiup nalaani Aatsitassarsiornermik Naalakkersuisoqarfiup suliaqarfiini allani suliassanik allanik isumaginninnissamik soqutiginninneq
  • Tuluit oqaasiinik piginnaasaqarluarnissaq
  • Suleqateqarluarsinnaaneq namminersorlunilu sulilluarsinnaaneq    
  • Qinnuteqartut kalaallisut/qallunaatullu oqaatsit atorlugit allassinnaanermik oqalussinnaanermillu piginnaasallit salliutinneqassapput.

 


Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqartut inooqutigiit aningaasarsiornerannut attuumasunik siuliani piumasaqaatigineqartuni ukiuni arlalinni sulisimanermik misilittagallit, nalileereernermi Immikkut siunnersortitut tapimik neqeroorfigineqarsinnaapput.   Qinnuteqaat
Paasissutissanik erseqqinnerusunik pissarsiniarluni attavigisassaq tassaavoq immikkoortumi pisortaq Pætur J. Niclasen oqarasuaat (+299) 34 68 31, e-mail: pjni@nanoq.gl
  Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut. Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk