Skip to main content
97

Dette jobopslag er udløbet

Ineriartortitsinermut immikkoortortamut ineriartortitsisoq

Qarasaasianut pitsaanerpaamik piginnaasaqarpit aammalu qarasaasiatigut aaqqiissutissanik iluaqusiullugit suleriaatsinik pisariillisaanernik suliaqarnissamut piumassuseqarpit?
Aningaasaqarnermut Sulisoqarnermullu Aqutsisoqarfimmi ineriartortitsinermut immikkoortortaq suliniummik aqutsisumik, aqutsisoqarfimmi suleriaatsinik pitsanngorsaanermik  digitalinngorsaanermillu qitiutitsillutik ineriartortitsinissamut suliniutinik suliaqartunut suleqatigiinnut ilannguttussamik pissarsiorpoq Qarasaasiatigut teknikikkullu suleriaatsinik pitsaanerulersitsiniarluni ineriartortitsinissamut periarfissat atorluarnissaat taamaasillutalu isumalluutinik piginnaasanillu atorsinnaasanik pitsaanerusumik atorluaanissaq anguniagarivavut.

Suliniutit suliarisartakkavut pingaarnertut  Aningaasaqarnermut Sulisoqarnermullu Aqutsisoqarfiup akisussaaffiinut tunngassuteqarput taamaattumillu pisortaqarfinni allaffissornerup iluani qitiusumik suliassanik ineriartortitsinernik ikorfartuinernillu suliaqartarnernut, soorlu akissarsialerinernut naatsorsuuserinernullu ilanngutissaatit. Aqutsisoqarfiup anguniagaasa angunissaannut ajornaatsumik tamakkiisumillu aaqqiissuteqarnissaq siunertaralugit: Isumalluutinik Kalaallit Nunaanni inuiaqatigiit ineriartortinnerinut atorneqarsinnaanngortitsinissaq.

Suliassatit
Suliniuterpassuaqarpugut - aallarteriikkat pilersaarusiorneqartullu. Maannakkorpiaq assersuutigalugu atorfinitsitsinermi suleriaatsit pitsanngorsarnissaat ASA-mullu attaveqarnerit pitsanngorsarnissaat sulissutigaavut.
Suliniutinut sorlernut suleqataanissannut akisussaaffeqarfissannullu tunngatillugu piginnaasatit soqutigisatillu aalajangeeqataasuussapput, pingaarnertulli suliassatit makkununnga tunngassuteqassapput:

  • Digitalinngorsaanermut suliniutinik ingerlatsisarneq aqutsisarnerlu
  • Ineriartortitsinissamut suliniutit naammassineqartarnissaat
  • Avataanit soqutiginnittut suleqatillu peqatigalugit maannakkut periutsinik atuuttunik unammillernerit periarfissarsiortarnerillu
  • Misissuinernut atatillugu periarfissarsiornermut tunngatillugu aaqqiissutissanik ilusilersueqataaneq.
  • Suleriaatsinik digitalinngorsaaneq – matumani paasissutissanik tigooqqakkanik nassiussukkanillu assersuutigalugu immersugassanik taakkununngalu attuumassuteqartunik suleriaatsinik digitalinngortitsineq
  • Suleriaatsinik nutaanik atulersitsineq – suliffimmi allanilu
  • Sulinerup pitsanngorsarneqarnera
  • Aqutsissutinik suleriaatsinillu allannguinernut atatillugu aarlerinaatinik misissueqqissaarneq
  • Podio-mik ingerlatsineq ineriartortitsinerlu (intranet, suliniutinik aqutsinermut atortussat, normumik tigusilluni sullinneqartarneq assigisaalu)


Ilinnut tunngasut

  • Qarasaasialerisarnerup tungaatigut ilisimasaqarluarlutillu misilittagaqartuuvutit, aammalu Java-mi PHP-millu paasiniaasarnernik kiisalu Photoshopimi suliaqarnermik ilisimasaqarneq iluaqutaassaqaaq. Tamannali piumasaqaataanngilaq.
  • Oqaatsitigut allattariarsornikkullu  paasiuminarsaallaqqissuuvutit.
  • Aqutsisarnernik suliniutinillu ingerlatsisarnernik misilittagaqartuuvutit.
  • Ingerlataqarusuttuuvutit, misissuillaqqissuuvutit, periaaserissuuvutit aaqqiissuteqarusullutillu eqqarsariartaaseqarlutit
  • Tamakkiisumik isiginnillaqqissuussasutit aamma ajornartorsiutinut imaannaanngitsunut tunngatillugu
  • Ineriartortitsinernik allannguinernillu suliaqarusussuseqarputit.
  • Suliffiup iluani avataanilu aaqqissugaaneq akimorlugu ingerlatsinernik suliassatigullu ineriartortitsisarnernik ingerlatsinissaq nuannarisuuat.
  • RPA-mik atuineq aqqutigalugu ingerlaavartunngortitsinermik misilittagaqarputit. Tamannali piumasaqaataanngilaq.
  • Allattariarsornermi oqalunnermilu marluinnik kalaallisut danskisullu oqaaseqartutit. Allattariarsornermi tuluttoorsinnaasutit


Aningaasaqarnermut Sulisoqarnermullu Aqutsisoqarfik
Namminersorlutik Oqartussat Qitiusumik Allaffeqarfiat suliffeqarfiuvoq pissanganartoq assigiinngitsunillu suliaqarfiusoq. Aaqqissussaanermiipput Naalakkersuisoqarfiit arlallit kiisalu Aqutsisoqarfiit tamarmik immikkut suliassaqarfiusut.

Ineriartortitsinermut Immikkoortortami, Sullissinermut Immikkoortortaqarfiup ataani Aningaasaqarnermut Sulisoqarnermullu Aqutsisoqarfimmi inissisimasumi, Aningaasaqarnermut Naalakkersuisoqarfiup ataaniittumi sulilissaatit. Atorfik pillugu paasisaqarnerorusukkuit suliassanik aqutsisumut Jacob Larsenimut oqarasuaammut 34 52 19-imut imaluunniit mailimut jala@nanoq.gl-imut saaffiginninnissannut tikilluaqqusaavutit.

Aningaasaqarnermut Sulisoqarnermullu Aqutsisoqarfimmi ataatsimoortumik naleqartitat:
ASA-p tunngavia tassaavoq "ASA pisortani oqartussaaffiuvoq uppernassusilik takussaasorlu. ASA immikkoortortaqarfiit, suliffeqarfiit innuttaasullu suleqatigiinnerat ineriartortinniarlugu sulissuteqarpoq”. Ima isumaqarpoq ASA suliassanut pingaarnernut tamanut tunngatillugu erseqqissunik anguniagaqartoq, ASA piginnaasanik ineriartortitsinernik salliutitsisoq kiisalu ASA Pisortat suliffeqarfiutaannik pisariillisaasoq.

ASA-p pingaartitai pingasut tassaapput:

  • Akisussaaffik - Qanoq iliuuseqarnivut, suliassavut sullitavullu eqqarsaatigalugit akisussaaffeqarpugut
  • Suleqatigiinneq - Suleqatigut sullitavullu pitsaasumik suleqatigaagut
  • Isumassuineq - Ikiuukkumatuujuvugut akunnitsinnilu paareqatigiilluta


Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk