Skip to main content
116

Dette jobopslag er udløbet

Ineqarnermut, Attaveqatigiinnermut, Aatsitassanut, Naligiisitaanermullu Naalakkersuisoqarfimmi ineqarnermut immikkoortortaqarfik misilittagalimmik, politikkimullu soqutigisalimmik A/C Fuldmægtigissarsiorpoq (cand.jur/cand.merc.jur)

Politikkikkut sullissinissat, inatsisilerinissat, inatsisinillu sukuiaaneq soqutigilluinnarpigit? Annikitsortai tappiffigalugit inatsisilerituujuit pikkorilluinnartoq? Sulinermi atorsinnaasunik aaqqiissutissanik pilersitseqataarusuppit? Isumassarsiat ineriartortinneqarnissaannut, politikkikkullu kissaatit inatsisiliarineqarnissaannut qitiusumik suleqataarusuppit? Taamaassimappat illit pisariaqartippatsigit!

Ineqarnermut Immikkoortortaqarfik pillugu
Ineqarnermut, Attaveqatigiinnermut, Naligiisitaanermullu Naalakkersuisoqarfiup ataani immikkoortortaqarfiit sisamaasut, ineqarnermut immikkoortortaqarfik ilagaat. Immikkoortortaqarfipput angisoorsuungikkaluarluni qanimut suleqatigiilluarpugut. Siammasissumik suliaqarpugut, matumani Namminersorlutik Oqartussat inissiaataat attartortittakkat, ineqarnermut tunngatillugu inatsit, immikkoortortaqarfiup suliaasa iluini tusarniaassutinut akissuteqaatit, innuttaasunit saaffiginnissutit, Ombudsmandimiillu saaffiginnissutit akineqarnissaat ilanngullugit. Ineqarnermut immikkoortumut tunngatillugu aningaasaliissutit aqunneqarnissaat immikkoortortaqarfiup aamma akisussaaffigaa. Immikkoortortat akimorlugit ineqarnermut tunngatillugu aaqqissuusseqqinneq Ineqarnermut immikkoortumut tamakkiisumik pilersaarut, Ineqarnermut Immikkoortortaqarfiup ataani pilersaarummut allatseqarfimmi tunngaveqarpoq.

Immikkoortortaqarfiup suliaat politikkikkut annertuumik eqqumaffigineqarput, soorluttaaq  inunnit tusagassiorfinniillu soqutigineqartut. Aaqqiissutissat tapersiissuteqarfigisagut innuttaasut tamagimmik ulluinnarni inuunerinut isumalerujussuupput, nunallu tamakkiisumik ineriartortinneqarnissaata piviusunngortinneqarnissaanut pingaarutilimmik aalajangiisuullutik.

Ineqarnermut immikkoortortami nutaamik aaqqissuusseqqinnerup ingerlanneqarnerani Naalakkersuisoqarfiit akimorlugit misissueqqissaarnerit ingerlanneqarput, taannalu “Ineqarnermut immikkoortumut tamakkiisumik pilersaarut”-mik taaguuteqarluni, tassanilu inuiaqatigiit aallaavigineqarlutik. Aserfallatsaaliisimannginnerit (kinguaattoornerit), siunissami pilersaarutaasumik aserfallatsaaliinissat, ineqarnermut akiliutit inissinneqarnissaat, ineqarnermullu tapiissutit ilaatigut misissorneqarput. Tassunga tunngatillugu nutarterinernut, nutaanillu sanaartornernut tunngatillugu siumut isigisumik sulisussat pisariaqartinneqarumaartussat qulakkeerumallugit, sanaartornermik suliaqartuni piginnaasat qaffassarneqarnissaat sammineqarpoq.

Namminersorlutik Oqartussani immikkoortortaqarfiit susassaqartut arlaqartut, kommunit, inuutissarsiutillillu akuutillugit, immikkoortortat akimorlugit suliniut soqutiginarluinnartoq annertoorlu pineqarpoq.

Suliassatit
Ineqarnermut tunngatillugu qitiusumik inatsisit, matumani nutaanik inatsisiliornerit, inatsisinillu pioreersunik naleqqussaanerit ilanngullugit akisussaaffigissavatit, soorluttaaq ineqarnermut tunngatillugu isumaqatiginninniarnernut, politikkikkullu ineriartortitsinernut ataavartumik suleqataassasutit.

Immikkoortortat akimorlugit ineqarnermut tunngatillugu aaqqissuusseqqinnermut Ineqarnermut immikkoortumut tamakkiisumik pilersaarummut ingerlasumut tunngatillugu nutaatut unammillernartunik suliaqartassaatit. Tassani Ineqarnermut immikkoortumut tamakkiisumik pilersaarummi anguniakkanut tunngavisseeqataallutik isumaginninnermut, inuutissarsiornermut, ilinniartitaanermut, suliffeqarnermut, piginnaanngorsaqqinnermut, selskabinullu tunngatillugit inatsisit ataqatigiinnissaat, tunngavisseeqataanissaallu
ukkataralugit taperseeqataasassaatit.

Ilaatigut suliassarissavatit:

  • Ineqarnermut tunngatillugu inatsisinik sukuiaaneq, inatsisinullu tunngatillugu ilitsersuineq
  • Inatsisilerineq, matumani inatsisissatut siunnersuusiorneq ilanngullugu
  • Politikkikkut aalajangiinissamut tunngavissanik il.il. suliaqarneq
  • Immikkoortumi Naalakkersuisumut ataavartumik sullissineq, matumani innuttaasunit saaffiginnissutinik akissuteqarnissaq, ataatsimiititaliamut sullissineq, inatsisiliornissamilu piareersaataasumik sulineq ilanngullugit
  • Immikkoortortaqarfiup iluani tusarniutinut akissuteqaasiorneq
  • Ineqarnermut tunngatillugu isumaqatigiissusiornerit, nakkutilliinerlu
  • Aaqqissuusseqqinneq; politikkikkut aalajangiinerit naapertorlugit kiisalu Ineqarnermut immikkoortumut tamakkiisumik pilersaarummut tunngatillugu inatsisiliorneq kiisalu aaqqissuusseqqinnermut tunngatillugu naalakkersuisoqarfiit isummersuutaannut siunersiueqatigiinneq

Naalakkersuisoqarfiup iluani sulianut allanut soorlu silaannakkut angallannermut, illuutinut oqartussaanermut, nalunaarasuartaaneqarnermut, Naligiissitaanermullu tunngatillugu inatsisinut tunngatillugu siunersiueqatigineqarsinnaanissat aamma naatsorsuutigissavat.

Suleqatissarput kissaatigaarput:

  • Persuarsiunngitsumik suliffimmi nammineq akisussaassuseqarluni sulisinnaasoq
  • Namminersorluni sulisinnaasoq, suliassallu naammassineqarnissaannut akisussaaffimmik tigusisinnaasoq
  • Angusaqarusussuseqartoq, suliatigullu unammillerneqarnissaminut piumassuseqartoq
  • Tamat isiginnissuteqarsinnaasoq, sulianillu arlaqartunik ataatsikkut ingerlatsisinnaasoq
  • Allattariarsornikkut oqaasiinnakkullu paasissutissiillaqqissoq
  • Nammineq piginnaasaminut upperinnittoq, siuttuunissaminullu sapiutinngitsoq
  • Qiimalluni suleqataasinnaasoq, suliartornissamullu qilanaarnissamut tapertaaqataasinnaasoq

Kalaallisut qallunaatullu oqalussinnaallutillu allassinnaaguit, Kalaallit Nunaannilu inuiaqatigiinnut tunngasunik ilisimasaqarluaruit iluassaqaaq, tamannali piumasaqaataanngilaq.

Neqeroorutigaarput:

  • Politikkikkut aalajangissat qanillugit Naalakkersuisoqarfimmi sulineq.
  • Suliat suliarineqarnerini aqqutissat arlaqaratik, piumassuseqartunillu suleqateqarluni persuarsiunngitsumik, ammasumillu suliffik.
  • Inuttut suliatigullu unammillernartut kiisalu ilinniaqqinnissamut periarfissat.

Suliassaminnik namminneerlutik suliaqartartunik, suliassaminnullu namminneq akisussaaffeqartunik Ineqarnermut immikkoortortaqarfik pikkorissunik sulisoqarpoq. Immikkoortortaqarfimmi pisortaq politikkikkut aalajangiisartunut, allaffiullu sinneranut siunnersuisinnaatillugu tunngaveqarluarnissaq, immikkoortortaqarfimmi sulisut peqatigalugit aqqutissiuussinissat, piukkunnarsaanissallu suliassarissavat.

Suliffimmi nuannaarneq, akisussaassuseqarnerlu ingiaqatigiillutik angusat tulluusimaarutigisinnaallutigit, suliffik ulapaarfiullunilu suliatigut unammillernarfiuvoq. Pitsaasumik persuarsiunngitsumillu suleqatigiit oqaluusseriaaseqarput, ulluinnarnilu nalinginnaasumik ulapaarfiusumi isumagissaarlutik sulisarlutik. Suliffeqarfiuvugut inissaqartitsilluartut, suleqatigiit ataatsimoorluartut, soorluttaaq suliffeqarnerup ilaqutariittullu inuunerup ataqatigiinnissaanik ataqqinniffiusoq.

Tusarfiginissat qilanaaraarput, Kalaallit Nunaannilu Naalakkersuisuni sulineq, ineqarnermut immikkoortortaqarfiup suliassai, suliffeqarfippullu nuannersoq pillugit ilisimasanik avitseqatiginissannut piareersimalluta.

Paasissutissat annertunerusut
Atorfik pillugu annertunerusumik paasisaqarusukkuit, immikkoortortaqarfimmi pisortaq Jeanette Holding oqarasuaammut 34 54 36-imut imaluunniit jeah@nanoq.gl-imut attavigisinnaavat.

Qinnuteqaat
Qinnuteqaammik kingusinnerpaamik tunniussivissaq tallimanngornermi aggustip 27-ani nal. 12.00-imut killeqarpoq.
 
Qinnuteqarnissamut killissarititaq qaangiunniariarpat, atorfinitsitsinissaq siunertaralugu oqaloqatiginninnerit ingerlanneqassapput.
 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk