Skip to main content
91

Dette jobopslag er udløbet

Ineqarnermut Attaveqaqatigiinnermullu Naalakkersuisoqarfik Ineqarnermut Illuuteqarnermullu Immikkoortortaqarfimmi fuldmægtig-imik pissarsiorpoq

Ulloq atorfiniffissaq tassaavoq 1. juli 2019 imaluunniit tamatuma kingorna piaarnerpaamik.
 
Ineqarnermut Illuuteqarnermullu Immikkoortortaqarfimmi (BEA), Ineqarnermut Attaveqaqatigiinnermullu Naalakkersuisoqarfimmiittumi inummik misissueqqissaarsinnaassuseqarluni sunniuteqarluarsinnaasumik, aammalu Namminersorlutik Oqartussani sillimmasiinermi ineqarnermilu aqutsinermut pingaarnermut atatillugu misissueqqissaarsinnaasumik sulianillu ataqatigiissitsisinnaasumik pissarsiorpugut. Inummik aningaasaqarnermik paasisimaarinnilluartumik, tamatumalu saniatigut pisortat aqutsineranni sulinermik misilittagalimmik pissarsiorpugut.
 
Ineqarnermut Illuuteqarnermullu Immikkoortortaqarfik (BEA) Naalakkersuisoqarfimmi immikkoortortaqarfiit sisamaasut ilagaat, tassanilu ineqarnermi, illuuteqarnermi, sanaartornermi attaveqaqatigiinnermilu suliassat isumagineqartarput. Naalakkersuisoqarfimmi sulisut 30-t missaanniipput. Aamma immikkoortortaqarfiup ineqarnermut illuuteqarnermullu aningaasaliissutit akisussaaffigai.
 
Immikkoortortaqarfipput uatsinnut qanilluta suliffigisarput mikisunnguuvoq, tassanilu suliassat assigiinngitsorpassuit isumagisaraagut, taakkununngalu Namminersorlutik Oqartussat sillimmasiissutaat tamarmik, inissianik illunillu pisiniarnerit tunisinerillu, ineqarnermi inatsisit, immikkoortortaqarfimmi tusarniaanermi akissutit, Ombudsmandimit kiisalu innuttaasunit saaffiginnissutinut akissuteqartarnerit isumagisaraagut.
 
Ulloq atorfiniffissaq tassaavoq 1. juli 2019 imaluunniit tamatuma kingorna piaarnerpaamik.
 
Atorfik pillugu:
Inummik najugaqarfiit missingersuutaat naatsorsuutaallu pillugit INI A/S-imut ingerlaavartumik attaveqartartussamik, tassungalu ilanngullugu nakkutilliisussamik malinnaasussamillu, taamatullu nalunaarusiortartussamik immaqalu suliassaqarfimmut atatillugu naalakkersuinikkut isummernissamut tunngavissiaasinnaasunik suliaqartartussamik pissarsiorpugut. Kiisalu atorfimmi sulianut sillimmasiisarneq ilaassaaq, tassanilu Namminersorlutik Oqartussat pigisaat nalillit tamarmik ilaatinneqarput, tassanilu sillimmasiisarnermi aqutsinermut, taamatullu sillimmasiissutinut neqerooruteqartitsinissamut atatillugu tunngavissanik patajaatsunik qulakkeerisoqartassaaq. Namminersorlutik Oqartussat sillimmasiissutaannut Namminersorlutik Oqartussani immikkoortortat kiisalu suliffeqarfiit imminnut aquttut ilaatinneqarput. Taamatuttaaq Namminersorlutik Oqartussat inissiaataasa kommuninut tunniunneqarnissaannut atatillugu aqqissuusseqqinnernut ingerlasunut suleqataasassaatit.
 
Suliassat allat tassaapput:

  • Inatsisissanik siunnersuusiornermut imaluunniit ineqarnerup iluani nutaanik suliniuteqarnermut atatillugu aningaasaqarnermik misissueqqissaarnerit.
  • Ineqarnermi siunissami aalajangiinernik atuutsitsilertarnernut atatillugu aningaasaqarnermik misissueqqissaarnerit, taakkununnga Namminersorlutik Oqartussat inissiaataasa kommuninut tunniunneqarnissaannut atatillugu piareersaataasumik suliat ilanngullugit.
  • Naalakkersuisoqarfiup suliassaqarfiini tamarmiusuni suliassaalersut assigiinngitsut.
  • Naalakkersuisoqarfiit akimorlugit suleqatigiissitanut suleqataaneq.
  • Namminersorlutik Oqartussat sillimmasiissutinut paasissutissaasivissamik atuutsitsilerneq ingerlaavartumillu iluarsiisarneq.
  • Namminersorlutik Oqartussat pigisai nalillit pillugit iluarsiisarnerit naatsorsuisarnerillu ingerlaavartut.
  • Namminersorlutik Oqartussat sillimmasiissutaanik aqutsinermik ingerlaavartumik nakkutilliineq, tassunga aningaasaqarnermut paasissutissanut kiisalu naatsorsueriaatsinut ingerlaavartumik malinnaaneq ilaalluni.
  • Siunissami sillimmasiissutinut kiisalu sillimmasiisarnermi akunnermuliuttut suliassaannut neqerooruteqartitsinermut najoqqutassat suliarineqarnerini tapersersortitut suleqataaneq.
     

Naatsorsuutigaarput
Assersuutigalugu cand. oecon-itut, cand. merc. jur.-itut assigisaatulluunniit ilinniagaqarsimasinnaavutit, ajornanngippat Namminersorlutik Oqartussani naalakkersuinikkut allaffissornikkullu aalajangiisarnerit ingerlasarnerinik misilittagaqarsinnaallutit ilisimasaqarsinnaallutillu.
 
Kissaatigaarput;

  • XAL aningaasaqarnermilluunniit aqutsissut assingusoq ilisimasaqarfigissagit (kisiannili ilinniartitsisoqarsinnaavoq),
  • excel naatsorsuinermilu atortut angisuut (regneark) piginnaaneqarfigilluassagitit,
  • cBrain F2 ilisimasaqarfigisinnaavat,
  • suliat paasisimaarisinnaassagitit suliallu amerlasuut ataatsikkut ingerlassinnaassagitit,
  • suliniutinik misissueqqissaarnissamut piginnaaneqarluassasutit aammalu suliassaqarfinni kisitsisinik pingaarnernik suliaqarsinnaassasutit,
  • naapertuisuussasutit, isumagissaartuussasutit ulluinnarnilu ulapaarfiusuni naleqqussarsinnaassuseqassasutit,
  • namminersorlutit sulisinnaassasutit,
  • allakkatigut oqaluinnarnikkullu ingerlatitseqqinnissamut piginnaaneqarluassasutit aammalu najoqqutassat paasiuminaatsut ajornaatsumik paasiuminartumillu ingerlateqqinnissaat piginnaaneqarfigissagit.

Inuiaqatigiinni kalaallini pissutsinik ilisimasaqarnissat piumasaqaataavoq.
 
Neqeroorutigaavut:

  • Naalakkersuisoqarfimmi naalakkersuinikkut aalajangiisarnerit qanillugit sulineq
  • Sullivimmi avatangiisit ammasut aammalu suleqatit tunniusimasut pingaartorsiorfiunngitsunik pissuseqartut
  • Inuttut suliatigullu unammilligassat pissanganartut, kiisalu ilinniaqqinnissamut, soorlu sillimmasiisarnermi akunnermuliuttutut ilinniartitaaneranni periarfissaqarneq
     

Naalakkersuisoqarfimmi ulluinnaat ilaanneeriarluni ulapaarfiugaluartut isumagissaarnermik sunnersimaneqartarput, kisiannili aamma suliffiup ilaqutariinnilu inuunerup ataqatigiinnissaat ataqqineqartarpoq.

Qulaani pineqartumut tunngatillugu atorfimmut piukkunneqartumut eqqortumut ukiuni arlalinni misilittagalimmut immikkut ittumik siunnersortitut / siunnersortaanertut atorfinittoqarsinnaavoq.
 
Paasissutissat amerlanerusut
Atorfik pillugu annertunerusumik paasisaqarusukkuit Immikkoortortaqarfimmi pisortaq Jeanette Holding telefon 345446-imut imaluunniit e-mail jeah@nanoq.gl aqqutigalugu, imaluunniit Allaffimmi pisortaq Ane Marie Sakariasen telefon 34 54 35-imut imaluunniit e-mail amsa@nanoq.glaqqutigalugu attaveqarfigisinnaavatit.  
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk