Skip to main content
152

Dette jobopslag er udløbet

Ineqarnermut Attaveqaqatigiinnermullu Naalakkersuisoqarfik Ineqarnermut Illuutinullu immikkoortortaqarfimmut Controller-imik sulisussarsiorpoq

Ineqarnermut Attaveqaqatigiinnermullu Naalakkersuisoqarfimmi Ineqarnermut Illuutinullu immikkoortortaqarfimmi (BEA) Controller-imik / AC-fuldmægtigimik aningaasaqarnermik tunuliaqutaqartumik aammalu pisortani allaffissornerup iluani misilittagaqartumik sulisussarsiorpugut.

Ineqarnermut Illuutinullu immikkoortortaqarfik (BEA) Naalakkersuisoqarfimmi immikkoortortaqarfiit tallimat ilagaat, ineqarnermut, illuuteqarnermut, sanaartornermut attaveqaqatigiinnermullu suliassaqarfiit iluanni Naalakkersuisoqarfimmi suliassanik isumaginnittuullutik. Naalakkersuisoqarfimmi sulisut 30-it missaanniipput.  

Ineqarnermut Illuutinullu immikkoortortaqarfik maannakkorpiaq immikkoortortaqarfimmut pisortap saniatigut sisamanik sulisoqarpoq.
Immikkoortortaqarfik mikisunnguuvoq, qanimut suleqatigiittoqarluni aammalu suliassaqarfippassuit suliarineqarlutik, ilanngullugit Namminersorlutik Oqartussani sillimmasiissutit tamarmiusut, inissianik illuutinillu pisiniartarneq tunisisarnerlu, ineqarnermut suliassaqarfiup iluani inatsisit, immikkoortortaqarfiup suliassaqarfiisa iluanni tusarniaanermut akissuteqaatit, Ombudsmandimit kiisalu innuttaasunit saaffiginnissutinut akissuteqartarnerit, isumagineqarlutik. Immikkoortortaqarfiup aamma ineqarnermut illuuteqarnermullu suliassaqarfiup iluani aningasaliissutinik aqutsineq akisussaaffigaa.

Ulloq atorfiniffissaq tassaavoq juunip aallaqqaataa 2019 imaluunniit isumaqatigiissuteqarneq malillugu.

Atorfik pillugu:
Inummik najugaqatigiiffiit missingersuutaat naatsorsuutaallu pillugit Namminersorlutik Oqartussani najugaqatigiiffiit pillugit ingerlaavartumik oqaloqateqartartussamik, ilanngullugu misissuisarneq malinnaanerlu, taamatullu nalunaarusiornernik kiisalu suliassaqarfimmut tunngatillugu politikkikkut isummernissamut tunngavissianik suliaqartussamik, sulisussarsiorpugut. Namminersorlutik Oqartussani sillimmasiissutini immikkoortortat Namminersorlutik Oqartussat kiisalu suliffeqarfiit imminut ingerlattut ataaniittut tamarmik ilaatinneqarput. Taamatuttaaq sillimmasiissutinut taakkununnga tunngasut suliassat ilaatinneqarput

Suliassat allat tassaapput:

  • Inatsisissatut siunnersuutinut imaluunniit ineqarnermut suliassaqarfiup iluani suliniuteqarnernut nutaanut atatillugu aningaasaqarnikkut misissueqqissaarnerit.
  • Ineqarnermut suliassaqarfimmi siunissami aalajangiinernik atuutsitsilertarnernut atatillugu aningaasaqarnikkut misissueqqissaarnerit, ilanngullugit Namminersorlutik Oqartussat inissiaataat kommuninut tunniunneqarnissaat, taakkununnga atatillugu piareersaalluni suliaqarnermut tunngasut.
  • Naalakkersuisoqarfiup suliassaqarfiisa tamarmiusut iluani suliassat assigiinngitsut.
  • Naalakkersuisoqarfiit akimorlugit suleqatigiissitaliani peqataaneq
  • Namminersorlutik Oqartussat sillimmasiissutinut paasissutissaasivianik nutaajusumut ingerlaavartumik nutarterisarneq
  • Namminersorlutik Oqartussat pigisaannik nalilinnik ingerlaavartumik allattuisarneq naatsorsuisarnerlu
  • Namminersorlutik Oqartussat sillimmasiisarnermut suliassaqarfiani allaffissornermi ingerlaavartumik misissuisarneq, ilanngullugu aningaasaqarnikkut paasissutissanik ingerlaavartumik malinnaaneq kiisalu naatsorsuinermi ilusiliat ingerlaavartumik malinnaaneq
  • Siunissami sillimmasiissutinut neqeroortitsinernik kiisalu sillimmasiissutinut akunnermiliuttut suliassaannik neqeroortitsinernik suliaqarnermi isumasioqataalluni peqataaneq.

Naatsorsuutigaarput 
Økonom-iuvutit, ass. cand. oecon., cand. merc. jur. taamaaqataaluunniit, Namminersorlutik Oqartussani politikkikkut allaffissornikkullu aalajangiinerit ingerlasarneranni misilittagaqaruit ilisimasaqaruillu pitsaassalluni.

Iluarissavarput;

  • XAL-imut imaluunniit aningaasaqarnermut periaatsinut taamaaqataanulluunniit ilisimasaqaruit,
  • excel-imi aammalu regneark-ini angisuuni piginnaasaqarluaruit,
  • cBrain F2 ilisimasaqarfigigukku,
  • paasisinaarinniinnarsinnaaguit aammalu suliassarpassuit ataatsikkut suliarisinnaagukkit,
  • periusissanik misissueqqissaarnikkut piginnaasaqarluaruit,
  • tatiginartuuguit, nuannaartuuguit aammalu ulluinnarnut ulapaarfiusunut naleqqussallaqqikkuit,
  • sulinerni namminersortaruit,
  • suliassaqarfinnut kisitsisitigut paasissutissanik suliaqarsinnaaguit,
  • allattariarsornikkut oqaluinnarnikkullu paasissutissiillaqqikkuit aamma
  • najoqqutassat pissarsiariuminaatsut pisariitsumik paasiuminartumillu paasissutissiivigisinnaagukkit

Kalaallit oqaasii aammalu inuiaqatigiinnut kalaallinut tunngasut ilisimasaqarfigissagitit piumasaqaataavoq.

Neqeroorutigaavut:

  • Naalakkersuisoqarfimmi suliffeqarfik, politikkikkut aalajangiisarnerit qanillugit suliaqarfiusoq
  • Sullivimmi avatangiisit ammasut, aammalu suleqatit tunniusimasut, pingaartorsiorfiunngitsumik pissuseqartut
  • Inuttut suliatigut unammilligassat pissanganartut, kiisalu ilinniaqqinnissamut periarfissaqarfiusut, assersuutigalugu sillimmasiisartutut ilinniartitaaneq

Naalakkersuisoqarfimmi pissusilersornerit pingaartorsiorfiunngillat aammalu ulluinnaat ilaanneeriarluni ulapaarfiusut qiimasumik, kisiannili aamma sulinerup ilaqutariittullu inuunerup ataqatigiissinnissaannik ataqqinniffiusumik ingerlanneqarput

Paasissutissat annertunerusut
Atorfik pillugu annerusumik paasisaqarusukkuit allaffimmi pisortaq Ane Marie Sakariasen oqarasuaat 34 54 35 -mut attaveqarfigisinnaavat mail-ikkulluunniit, uunga amsa@nanoq.gl.  
Qinnuteqarneq 
Qinnuteqarnissamut killigitinneqarpoq ulloq 25. april 2019. Atorfinitsitsinissamut atatillugu oqaloqatiginninnerit sap. ak. 18-mi ingerlanneqarnissaat naatsorsuutigineqarpoq.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk