Skip to main content
144

Dette jobopslag er udløbet

Inatsisit tunngaviusussat pillugit Isumalioqatigiissitat Allattoqarfiat AC-fuldmægtigimik pissarsiorpoq

Inatsisinik tunngaviusussanik suliaqarnermik soqutiginnittumik AC-fuldmægtigimik marluinnik oqaaseqartumik aprilip aallaqqaataani 2019, imaluunniit immikkut isumaqatigiissuteqarnikkut, atorfinittussamik Allattoqarfik pissarsiorpoq.

Allattoqarfiup akisussaaffigaa Inatsisit tunngaviusussat pillugit Isumalioqatigiissitanik Kalaallit Nunaata inatsisigiligassaanik tunngaviusunik missingersuusiortussanik sulissussineq siunnersuinerlu. Taamatut sulinermi innuttaasunik peqataatitsinissaq isumalioqatigiissitat annertuumik pingaartippaat.

Atorfik atorneqassaaq inatsisinut tunngaviusussanut atugassanik misissueqqissaarnermik ilusilersuinermillu qajannaallisaanermut. Tamatuma saniatigut isumalioqatigiissitat ataanni ataatsimiititalianik assigiinngitsunik sulissussinerup siunnersuinerullu allattoqarfiup piginnaasaanik AC-fuldmægtigi nakussassaataassaaq.

Suliassat pingaarnerit
Atuuffinnik makkuninnga pingaarnerusunik AC-fuldmægtigi suliaqassaaq:

  • Ataatsimiititalianik allatsitut sulissussineq
  • Inatsisinut tunngaviusussanut atugassanik misissueqqissaarnissaq ilusilersuinissarlu
  • Isumalioqatigiissitanut allanullu nassuiaasiortarnissaq nalunaarusiortarnissarlu
  • Sullissineq, tamatumunnga ilanngullugu ataatsimiititalianut isumaloqatigiissitanullu assigiinngitsunik oqallisissiortarneq
  • Paasissutissanik katersineq uppernarsaasiornerlu.

Piukkunnaatit piginnaasallu

  • ilinniagartuutut attuumassutilimmik ilinniagaqarneq (assersuutigalugu cand.scient.soc., cand.scient.pol.)
  • misissueqqissaarnermut aaqqissuussilluarnermullu piginnaasaqarluarneq
  • kalaallisut, danskisut, ajornanngippallu tuluttut, oqaluttarissatigut allattarissatigullu oqaasertaliornermut piginnaasaqarluarneq
  • paasissutissiinermut piginnaasaqarluarneq
  • Kalaallit Nunaanni inuiaqatigiinni naalakkersuinermilu pissutsinik ilisimasaqarluarnissaq
  • inatsisinik tunngaviusunik suliaqarnermut, taakkuninnga sanarfinermut il.il. atatillugu pissutsinik assigiinngisitaartunik annertuumik soqutiginninneq
  • suleqatigiinnermut attaveqarnermullu akuunissamut piginnaasaqarluarneq
  • suliassanik naammassisaqarniarnermi alapernaassusermik isumassarsiorsinnaassusermillu piginnaasaqarneq.

Allattoqarfik pillugu
Inatsisit tunngaviusussat pillugit Isumalioqatigiissitat Allattoqarfiat suliffeqarfiuvoq sulerusussuseqarfiusoq. Suliffeqarfimmi persuarsiorfiunngitsumi suliamut piginnaasaqarluarneq suleqatigiinnerlu pingaartippagut. Suliffeqarfik anginngilaq maannakkorpiaq tallimanik sulisoqartoq.

Allattoqarfiup isumagai allaffissorneq, aningaasaqarneq, missingersuutit, pilersaarusiorneq, ataatsimiititalianik isumalioqatigiissitanillu sullissineq, inunnik qaammarsaaneq, attaveqatigiinneq aamma paasissutissiisarneq, innuttaasunik peqataatitsineq tusarniaanerillu Kalaallit Nunaata inatsisigiligassai tunngaviusut missingersuusiorfigineqarnissaat siunertaralugu.

Piffinni aalajangersimasuni ulapaarnissaq naatsorsuutigineqassaaq, taamaammat eqaassuseqarnissaq akimullu suleqatigiinnissamut piumassuseqarnissaq piumasarineqarpoq.

Suliffimmi atugassarititaasut pitsaasut aammalu avatangiisit persuarsiorfiunngitsut assigiinngisitaarnermut isumassarsiorluarnermullu inissaqartitsiviusut neqeroorutigaagut.

Paasissutissat sukumiinerusut
Annertunerusumik atorfik pillugu paasisaqarusukkuit tikilluaqquneqarputit attavigissallugu allattoqarfimmi pisortaq Johan Lund Olsen, oqa. +299 34 66 64, mobilip normua +299 55 54 85 mail-ikkulluunniit jolo@nanoq.gl.

Ulloq qinnuteqarfissaq kingulleq
Qinnuteqaat kingusinnerpaamik marlunngorneq d. 26.02.2019 tigoreersimassavarput.
Naatsorsuutigaarput sapaatip akunnerani 10-mi oqaloqateqarnissat ingerlatissallugit.

Atorfininnissamut ulloq tassaavoq 1. april 2019 imaluunniit piaarnerpaamik isumaqatigiissuteqarnikkut.
 
Atorfinitsitaanermi atugassarititaasut
Akissarsiatigut atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk