Skip to main content
146

Dette jobopslag er udløbet

Inatsisilerituumik sulisussarsiorpugut, suliffeqarnermut nunanillu allaneersunik sulisoqarnermut immikkoortortaqarfimmi, Aatsitassanut Suliffeqarnermullu Naalakkersuisoqarfiup ataani

Atorfik pillugu
Naalakkersuisoqarfik inatsisilerituumik sulisussarsiorpoq, suliffeqarnermut immikkoortoqartarfimmi inatsisilerinikkut siunnersuinermik suliassanut aamma immikkut nunanit allanit suliartortartunut il.il. suliassaqarfimmi sulianut atatillugu. Immikkut sammisassat tassaassapput sulisussanut nunanit allanit suliartortartunut inatsisit atuuttut aqunneqarneri, aamma Naalakkersuisoqarfiup danskit oqartussaasuinik oqaloqateqartarnerani suliat Naalakkersuisoqarfiup suliassatigut akisussaaffigisai.
Aaqqissuussaanikkut atorfik suliffeqarnermut immikkoortortaqarfimmi pisortap ataani inissisimassaaq. Immikkoortortaqarfiup inatsisileritoorissavaatit, qanimullu aatsitassanut immikkoortortami inatsisilerituunik suleqateqartassallutit. Illit suliassatit pingaarnertut suliffeqarnermut aamma nunanut allamiunut tunngasunik ingerlatsivimmut attuumassuteqassapput, kisiannili aamma aatsitassarsiornermut tunngasunik suliassartaqartassallutik.  
Ulluinnarni tigussaanerusumik sulianik ingerlatsisuusunut pisortanullu isumasioqatigisartakkatut inatsisinut tunngasuni apeqqutinik suliaqarfimmi inissisimassaatit. Tamatumalu saniatigut avataanersunut suleqatinut isumaqatigiissutissat isumaqatigiinniutigineqartarnerini peqataasassaatit, ikiorsiisarlutillu Inatsisartut inatsisiliassaannik siunnersuusiornerni.
Naalakkersuisoqarfitsinni suliat ilaanni sukkasoorujussuarmik pilersarput, taamaattumillu piareersimaffigissavatit ulluinnaat ilaanni sukkasuumik eqqarsariaqartarnissap iliuuseqartarnerullu pisariaqartarneri. Aammali piareersimaffigissavattaaq ingillutit inatsisiliassanut missingersuusianik suliaqartarneq, immikkuualuttortaasalu isumaliutigisarnissaat, suleqatissat susassaqartut peqatigalugit.
Naalakkersuisoqarfimmi persuarsiunngitsumik periaaseqartuuvugut, suliniutillu ingerlanneqartartut pingaartinneqartarlutik ilalersorneqartarput.
 
Ilaatigut suliassanut makkua ilaapput:

  • Inatsisissatut siunnersuusianik aamma peqqussutissatut siunnersuusianik suliffeqarnermut immikkoortortaqarfimmi suliaqarneq aamma ineriartortitsisarneq,
  • Suliniutinut akisussaaneq aamma aqutsineq, inatsisit atuuttut nutarterneqartarnerini nutaanillu suliaqartarnerni,
  • Naalakkersuisoqarfimmi pisortanut qullernut siunnersuisarneq isumasioqateqartarnerlu, kiisalu illup iluani immikkoortortanut inatsisilerinikkut siunnersuisuusarneq,
  • Isumaqatigiissutissanik suliaqarnerni isumasioqatigiinnerni peqataasarneq,
  • Isumaqatigiissutissanik akuersissutissanillu isumaqatigiinniuteqartarneq,  
  • Inatsisilerinermik suliat suliffeqarnermut aamma nunanut allamiunut tunngasunik suliassaqarfimmi.

Pingaartipparput illit:

  • Inatsisinik piusunik nutarterinerni nutaanillu siunnersuusiortarnerni misilittagaqarnerit,
  • Inatsisilerituutut ilinniarsimanerit,
  • misilittagaqarlutillu paasisimasaqarnerit ingerlatsivimmi naalakkersuinikkut aqunneqartumi sulianik ingerlatsinermik,
  • suliassanik siammasissumik sammiveqartunik suliaqarnermik nuannarisaqartuunerit, ajornartorsiutinullu nutaanut sukkasuumik isummersuuteqarsinnaanerit,
  • attaveqallaqqissuunerit, oqaluinnarluni ingerlatsinermi aamma allatani danskisut aamma tuluttut,
  • suliniutinik suliaqallaqqissuunerit aammalu nammineertuunerit,
  • suliassat aaqqiissutissarsinissaannut akisussaassuseqarluartumik periaaseqartuunerit,
  • kalaallini pissutsinik ilisimasaqarnerit, imaluunniit tamakkua iserfiginissaannut piumassuseqartuunerit.


Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Qinnuteqartunut ukiunik arlalinnik sivisussuseqartunik uppernarsarneqartunillu misilittagaqareersunut isumaqatigiissuteqartoqarsinnaavoq immikkut isumaqatigiinniareernikkut tapisiaqartitsinissamut.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. Naatsorsuutigaarput piffissap qinnuteqarfissap naasimatsiarnerani ingerlaannangajak oqaloqateqartarnerit aallartinnissaat. Atorfininnissaq sapinngisamik piaartumik pisussatut naatsorsuutigineqarpoq.
E-mail-ikkut qinnuteqaatinik tigusineq ajorpugut.

Paasissutissat allat
Paasissutissanik annertunerusunik atorfissaqartitsiguit attavigisinnaavat immikkoortortami pisortaq Janus Munk, oqarasuaammut +299 346825 / +299 546778, e-mail: jmun@nanoq.gl