Skip to main content
145

Dette jobopslag er udløbet

Inatsisilerinermut Immikkoortortarqarfimmi Suliamut Pisortaq

Meeqqanut, Inuusuttunut Ilaqutariinnullu Naalakkersuisoqarfiup Inatsisilerinermik immikkoortortaqarfia immikkut siunnersuisartumik imaluunniit siunnersortaanermik pissarsiorpoq taannalu pingaarnersiuisinnaassaaq, aqutsisinnaalluni inatsisilerinermilu suliassanik aammalu meeqqanut, inuusuttunut, ilaqutariinnut inunnullu innarluutilinnut suliassaqarfimmi kiisalu ilaqutariit pillugit inatsisinik aamma kingornussisarneq pillugu inatsisinik nutarterinermi suliassanik annertuunik pissanganartunik unammillernartunillu agguataarisinnaasalluni.

Meeqqanut, Inuusuttunut Ilaqutariinnullu Naalakkersuisoqarfimmi politikkikkut anguniakkat suliassaqarfimmut tunngasut piviusunngortinnissaat suliarisarpagut. Ilaatigut tassunga ilaapput inatsisit, matumani ilanngullugit Kalaallit Nunaannut naalagaaffiup inatsisai, nunat assigiinngitsut akornanni isumaqatigiissutit, meeqqat inuusuttut ilaqutariillu kiisalu inuit innarluutillit inuuniarnermikkut unamminartorsiortut atugaat pitsanngorsarniarlugit periusissiat suliniutillu.

Inatsisilerinermik Immikkoortortaqarfimmi maannakkut suliatigut aqutsisoq inatsisilerituullu 2-3-t sulisuupput. Immikkoortortaqarfimmi meeqqanut, inuusuttunut, ilaqutariinnut inunnullu innarluutilinnut isumaginninnikkut inatsiseqarnermut tunngasunik, taakkunanilu nalunaarutinik ilitsersuutinilu il.il. suliaqarnerit suleqataaffigineqarput. Tamatumunngalu atatillugu politikkikkut suliaqartut inatsisilerinermut tunngasunik apeqqutinik suliaqarnerannut allakkianik nalunaarutinillu kiffartuunneqartarlutik.

Suliassat tamatigoortuupput aamma kulturikkut sulianullu tunngasutigut killigisat akimorlugit suleqatiginnissinnaanermik piumasaqaateqarput, kiisalu nammineq sulianut tunngasunut nammineerluni akisussaaffimmik tigusisinnaasariaqarpoq. Atorfiit piumasaqaatigaat suliassanik nutaanut sukkasuumik paasinnissinnaaneq tamatigoortuunissarlu, kiisalu aaqqissuussaaffiusumi naammagisimaarinnissinnaaneq tassani suliassat minnerit angisuullu paarlakaaffianni ulluinnarni ilaatigut ulapaarfiusartumi. Suliatigut aqutsisutut immikkoortortaqarfiup suliassaanik naammassinnissinnaanissaanut siuttuusaatit aqqutissiuussissallutillu. Inatsisilerinermi immikkoortortaqarfiup suliassaqarfiini aqutsisuussaatit kiisalu suliassanik pingaarnersiuisarlutit agguaassisarlutillu.

Atorfik pillugu
Suliassat

  • Immikkoortortaqarfimmi sulisut suliassaanik aqutsinissamut akisussaasoq
  • Immikkoortortaqarfiup inatsisilerinermut tunngasunik suliassaanik pingaarnersiuineq agguaanerlu taakkulu Naalakkersuisut meeqqanut, inuusuttunut, ilaqutariinnut inunnullu innarluutilinnut suliassaqarfimmut nutarterinissamut kissaataanut naapertuunnissaat qulakkiissallugu
  • Inatsisilerinermi suliat ingerlaneranni suleqatinnut pisortanullu malinnaatitseqataanissaq
  • Naalakkersuisoqarfimmi immikkoortortaqarfiit allat qanimut suleqatiginerisigut politikkikkut anguniakkanik takussaasunik suliaqarnissamut ataqatigiissaarineq

Piginnaasaqarfiit

  • Cand.jur. ilinniagaqarsimasutit, aqutsinermillu misilittakkatit uppernarsaateqarfigalugit
  • Suliffeqarfimmi politikkikkut aqunneqartumi sulinermik misilittagaqarneq
  • Inatsisinik suliaqarnermik kiisalu inatsisiliornermik misilittagaqarnerit tassaapput piginnaanerit pingaartitavut
  • Suliffinnut suleqatinnullu ammasumik pitsaasumillu pissuseqarputit
  • Nammineersinnaassuseqarputit, aaqqissuussilluarsinnaavutit angusaqarniartuullutillu
  • Isumaginninnermut tunngasunik atuagarsornikkut sulinikkullu ilisimasaqarnissaq kissaatiginarpoq, piumasaqaataanngilarli
  • Suliaqarfiit assigiinngitsut kulturilu assigiinngitsut avatangiiseralugit sulisut ataasiakkaat ataatsimoortumik aaqqiissuteqarnernut peqataaffigisartagaanni sulerusuttutit
  • Kalaallit Nunaanni inuiaqatigiinni pissutsit aamma kulturi ilisimasaqarfigigukkit iluaqutaassaaq
  • Marluinnik oqaaseqartuusutit, piumasaqaataanngilarli


Ulloq atorfiniffissaq
1. februar 2023 isumaqatigiissuteqarnikkulluunniit.
Atorfik 30.9.2023-p tungaanut killiligaavoq, sivitsorneqarsinnaavorli.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.

Paasissutissat sukumiinerusut
Atorfik pillugu paasisaqarnerorusukkuit tikilluaqqusaavutit immikkoortortami pisortamut Kirsten Olsen-imut attaveqarnissamut kiol@nanoq.gl, +299 55 32 52
Kalaallit Nunaat aamma Namminersorlutik Oqartussat pillugit annertunerusumik paasisaqarusullutit kissaatigigukku, http://naalakkersuisut.gl aqqutigalugu Atorfiit ataani paasisaqarnerusinnaavutit.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk