Skip to main content
95

Dette jobopslag er udløbet

Ilisimatusartartoq/Seniorforskeri oceanografimi Silap Pissusianik Ilisimatusarfimmut

Ilisimatusartartoq/seniorforskeri i oceanografimi

Pinngortitaleriffimmi Silap Pissusianik Ilisimatusarfik, oceanografi tunuliaqutaralugu ilisimatusartartunut/seniorforskerinut ilisimatusarnermi fysikki/kemi tunngavigalugu imaani uumasoqassutsimik ilisimatusartartutut atorfimmut qinnuteqaqqusivoq.

Kalaallit Nunaanni Silap Pissusianik Ilisimatusarfik oceanografissarsiorpoq, immikkoortortami sulisut akornanni, Pinngortitaleriffimmi kiisalu nunani tamalaani geofysikkimik uumasoqassutsimillu ilisimatusarnerup silarsuaani susassaqarfiit akimorlugit ilisimatusarnermik pilersitsisinnaasussamik.

Kalaallit Nunaanni Silap Pissusianik Ilisimatusarfik piffissami sivisuumi Kalaallit Nunaanni kangerlunni imaanilu malinnaaviginnittarnernut uumasoqassutsimilu uuttuutit tunngavigalugit ilisimatusartarnernut akisussaasuuvoq. Ilisimatusartarnerit saniatigut Ilisimatusarfik ilinniartitaanernik Kalaallit Nunaannilu oqartussanut ilisimatusarneq tunngavigalugu siunnersuisarnernik neqerooruteqarpoq.

Atorfik nunani tamalaani ilisimaneqarluartumik ilisimatusartutut tunuliaqutalinnut kiisalu Kalaallit
Nunaata imartaanik uumassusileqatigiiaallu ataqatigiiaarnerannik ilisimatusartartunut neqeroorutigineqarpoq. Atorfinittussaq tulluartoq Ilisimatusarfiup siunissami periusissiaanut susassaqarfiillu akimorlugit Kalaallit Nunaata imartaani ilisimatusarnissanik ineriartortitseqataasartuusaassaaq. Atorfinittussaq tulluartoq Issittumi uumassusileqatigiaat ataqatigiiaarnerisa pissusissamisoortumik allanngorartarnerannik inuillu sunniisarnerat pillugit ilisimatusartartoqatigiit nunanit tamalaaneersut
imaani uumassusileqatigiiaat fysikkilu tunngavigalugu oceanografi paasiniarlugu annertuumik ilisimatusartarnerinut suleqataasassaaq.

Akisussaaffeqarfigisat
Atorfinittussaq piukkunnaatilik:

  • Kalaallit Nunaanni Silap Pissusianik Ilisimatusarfiata oceanografiskiusumik susassaqarfiit akimorlugit suleqateqartarnerinut akisussaasuussaaq.
  • Kalaallit Nunaata kangerluini imartaanilu paasissutissanik ilisimatusartarnernut malinnaaviginnittarnernullu peqataasassaaq
  • Misissuisarnerni paasissutissanik pissarsianik misissueqqissaartassaaq nalunaarutiginnittarlunilu kiisalu ilisimatusarnermik tunngaveqartumik oqartussanut siunnersuisassalluni
  • ilisimatusarnermi inernerusut atortassavai avammullu paasissutissiissutigisassallugit
  • Ilisimatusarnermi susassaqarfiit akimorlugit Ilisimatusarfiup iluani avataanilu sulianik nutaanik ineriartortitseqataasassaaq
  • Ilisimatusarnermi ilisimasanik nunani tamalaani atorneqarsinnaasunik pilersitsisassaaq
  • Nunani tamalaani ilisimatusarnikkut suliniaqatigiiffinnut attaveqaqatigiinnernullu soorlu ICES-imut WGOH-mullu peqataasassaaq.

Piginnaasat
Atorfinittussatut toqqagaasoq oceanografimi ph.d-qassaaq imaluunniit assigisaanik suliaqarsimassalluni kiisalu Kalaallit Nunaanni oceanografi tunngavigalugu ilisimatusarsimanermik misissuisimanermillu misilittagaqarnermut uppernarsaateqassalluni.
Atorfimmut tulluartussarsiorIuni nalilersuinermi makkua pingaartinneqassapput:

  • Ilisimatusarnermi susassaqarfiit akimorlugit sulisinnaassuseqarneq kiisalu Kalaallit Nunaanni oceanografimik ilisimatusarnerup iluani takorluugaqarneq
  • Ilisimatusarnermi paasisanik atuisinnaassuseqarneq, nittarsaassisinnaasuseqarneq paasisallu inernerinik avammut ingerlatitseqqiisinnaassuseqarneq
  • Ilisimatusarnermi sulianik nunani tamalaanisulli pitsaassusilinnik suliaqarsinnaassuseqarneq
  • Ilisimatusarnermi suliaqarfimmut aningaasaliisussarsiorsinnaassuseqarneq
  • Silap Pissusianik Ilisimatusarfiup ilumini avataneersunillu suleqateqarnerinik ineriartortitseqataasinnaassuseqarneq


Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Annertunerusumik paasissutissat
Atorfik pillugu annertunerusumik paasisaqarusunnermi immikkoortortami pisortaq Mie Winding, attavigineqarsinnaavoq uunga: miwi@natur.gl, +299 361238

Ulloq qinnuteqarfissaq kingulleq: 15. decembari 2021

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk