Skip to main content
103

Dette jobopslag er udløbet

Ilisimatusarnermut Avatangiisinullu Naalakkersuisoqarfik UPalungaarsimanermut suliassaqarfimmi AC-fuldmægtigimik/Siunnersortimik pissarsiorpoq

Ilisimatusarnermut Avatangiisinullu Naalakkersuisoqarfik upalungaarsimanermut suliassaqarfimmi AC-fuldmægtigimik/Siunnersortimik pissarsiorpoq.

Suliassaqarfimmi annertuumik pingaarutilimmi atorfik pissanganartoq namminersornartorlu neqeroorutigaarput. Isumassarsianik nutaanik eqqarsaateqarnissamut – aammalu pisut iluatsinnerinik takusaqarsinnaanissamut – inissaqartinneqarluassaatit. Tamatuma saniatigut suliatigut inuttullu ineriartornissamut periarfissat pitsaasut neqeroorutigaavut.

Suliffeqarfimmi pitsaasunik suleqateqarfiusumi pingaartorsiorfiunngitsunillu pissuseqarfiusumi ilaalissaatit. Tamatuma peqatigisaanik politikkikkut aaqqissuussaaneq paasisaqarfigilluassavat pisortallu qanillugit sulissallutit.

Suliassatit
Suliassatit pingaartumik upalungaarsimanermut tunngasuussapput. Suliassaqarfimmi inatsisiliorneq, kommunip annassiniarnernut upalungaarsimasuinik nakkutilliineq aamma upalungaarsimanermi paasissutissanik ingerlatitseqqittarneq suliarineqarput. Aamma qaartiterutaasivinnut sanaartorfinnullu qaartiteritinik atuiffiusunut nalunaaqqaarlutit nalunaaqqaarnallu misissuiartortassaatit.

Kiisalu Upalungaarsimanermut Ataatsimiititaliap allattoqarfiani suleqataassaatit. Upalungaarsimanermut Ataatsimiititaliaq Kalaallit Nunaanni upalungaarsimaneq pillugu apeqqutini Naalakkersuisunut siunnersuisarpoq. Taamaattumik aamma Upalungaarsimanermut Ataatsimiititaliaq annerusunik ajutoortoqartillugu ajunaarnersuaqartillugulu aggersarneqartarpoq.

Naalakkersuisut tamakkiisumik paasissutissatitut tunngavissaannik pissarsiniarnissaq, kiisalu oqartussaasut suleqataasut suliassaasa upalungaarsimanermut pilersaarut naapertorlugu ataqatigiissaarnissaat Upalungaarsimanermut Ataatsimiititaliap suliassaraa.

Aamma Naalakkersuisoqarfik Qatserisartunngorniat Ilinniartitaanerannut Ataatsimiititaliamut suleqataavoq, kommuninilu annaassiniarnernut upalungaarsimasut ilinniartitaanerisa ulorianartorsiorfiusinnaasunut naapertuunnissaat nakkutigisaralugu. Ulluinnaat assigiinngitsorpassuarnik suliaqarfiusut, pisut politikerit tungaanniit, innuttaasuniit, kommuniniit suliffeqarfinniillu pineri apeqqutaalluni suunerinik apeqqutaatisiviusut naatsorsuutigisinnaavatit.

Naatsorsuutigaarputsuliassaqarfinnit ukunannga ataatsimik amerlanerusunilluunniit suliaqartassasutit:
 

  • Upalungaarsimanermut suliassaqarfiup iluani paasititsiniaaneq
  • Qaartiterutaasivinnik suliassaqarfiup iluani akuersissutinik tunniussisarneq
  • Nakkutilliineq misissuiartorlunilu orniguttarneq
  • Qatserisartunngorniat Ilinniartitaanerannut Ataatsimiititaliamut suleqataaneq
  • Upalungaarsimanermut Ataatsimiititaliap allattoqarfiani suliassanik isumaginninneq
  • Upalungaarsimanermi sungiusarnernut assigiinngitsunut pilersaarusioqataaneq ingerlatseqataanerlu
  • Upalungaarsimanermi pilersaarutit assigiinngitsut suliarineqarnissaannik qulakkeerisarneq


Piginnaaneqarfiit
Kissaatigaarput:

  • Assersuutigalugu inuiaqatigiinnut ilisimatusarnermik, ajunaarnersuaqarnerani ulorianartorsiortoqarneranilu aqutsinermik, politiini imaluunniit annaassiniarnerni upalungaarsimasuni attuumassutilimmik ilinniagaqarsimassasutit
  • Pisortat ingerlatsivianni imaluunniit suliffeqarfimmi siunnersuisarfiusumi sulinermik ukiuni arlalinni misilittagaqassasutit
  • Upalungaarsimaneq ataatsimut igisalugu soqutigisaqarfigissagit ilisimasaqarfigissagillu
  • Ajornartoornermi aqutsinermik immikkoortunullu akisussaaffeqarnermik ilisimasaqassasutit misilittagaqassasutillu
  • Ajornartoornernik pisoqartillugu eqqissisimasinnaassuutit suliassanillu paasisimaarinnissinnaassallutit
  • Suleqatigiinneq aqqutigalugu suliat inernerinik isumannaatsunik illuatungeriinnillu akuersaarneqarsinnaasunik angusaqarnissamut piginnaaneqarluassasutit
  • Oqaatsit ersarissut atorlugit ajornartorsiutinik pisariusunik ingerlatitseqqissinnaanissamut piginnaaneqassasutit
  • Misissueqqissaarnissamut attaveqaqateqarnissamullu, pisortat suliassanik isumaginninneranni tapersersorlugit sulitillutit atorsinnaasannik piginnaaneqarluassasutit. Atorfinni iluatsitsilluassaguit, aammalu nalilinnik tunniussisinnaassaguit ilaatigut ajornartorsiutinik suussusersinissaq, aalajangiussinissaq nassuiaanissarlu piginnaaneqarfigilluassavatit
  • Kalaalit Nunaanni pissutsinik ilisimasaqassasutit aammalu kalaallisut oqaatsinik atuisinnaassasutit


Suliassanit arlallit siunnersuinermut, allaalluunniimmi allannguinissamik piumasaqartarnermut tunngasuummata, oqaloqateqarninni allanninnilu oqartussaasutut inussiarnersuunissat pingaaruteqartorujussuuvoq.

Kissaatigaarput:

  • Suliassani assigiinngitsorpassuarni namminersorlutit sulisinnaassasutit
  • Suliniuteqarsinnaassasutit aammalu immikkoortortaqarfiup ineriartornerata ingerlaqqinnissaanut ikiuussinnaassasutit
  • Suliat isumagisatit pillugit politikkikkut eqqumaffigineqarnissat iluarisimaarsinnaassagit
  • Tunniusimasuussasutit, naammassisaqarsinnaassuseqassasutit isumagissaartuussasutillu.


Atorfininnissamut isumannaallisaanermi akuerineqarsimanissaq, taassumalu atorfeqarneq tamakkerlugu atuutiinnassasoq piumasarineqarpoq.

Suliffeqarfik naatsumik
Naalakkersuisoqarfik 35-it missaannik sulisoqarpoq, immikkoortortaqarfinni pingasuni (Sullissinermut, Aningaasaqarnermut Sulisoqarnermullu Immikkoortortaqarfik, Pinngortitamut Silallu Pissusaanut Immikkoortortaqarfik kiisalu Avatangiisinut Upalungaarsimanermullu Immikkoortortaqarfik) kiisalu Aatsitassanik Suliassaqarfinnut Avatangiisinut Aqutsisoqarfimmi agguarsimasunik. Tamatuma saniatigut Pinngortitaleriffik Naalakkersuisoqarfiup ataaniippoq.

Avatangiisinut Upalungaarsimanermullu Immikkoortortaqarfimmi, Pinngortitamut Avatangiisinullu Naalakkersuisumik sullissisuusumi suleqataassaatit. Immikkoortortaqarfimmi atorfiit tassaapput, immikkoortortaqarfimmi pisortaq ataaseq aamma AC-fuldmægtigit 11-t, taakkunanngalu marluk upalungaarsimanermik suliaqartuupput.

Suliffeqarfik Nuummi inissisimavoq. Illoqarfik periarfissarpassuaqarpoq, taakkununnga kulturip illorsua, filmertarfik, naluttarfik, timigissartarfiit, kaffisorniartarfiit, neriniartarfiit peqatigiiffiillu assigiinngitsut ilaallutik. Tamatuma saniatigut Nuup eqqaani pinngortitami sisorartarfeqarpoq golfertarfeqarlunilu, kiisalu qajartorneq, aalisarneq, imaatigut angalaneq, pisuttuarneq sunngiffimmilu sammisassarpassuit allat periarfissaapput .

Piffissaq atorfiniffissaq 1. decembarip aallaqqaataani 2020-imi isumaqatigiissuteqarnikkulluunniit atorfinitsitsisoqassaaq.

Qinnuteqarnissamut killissaliussaq
Qinnuteqaat kingusinnerpaamik 22. oktobari 2020-mi Ilisimatusarnermut Avatangiisinullu Naalakkersuisoqarfimmit tiguneqarsimassaaq.

Qinnuteqaat:
Qinnuteqaat ”Upalungaarsimanermi AC-fuldmægtigit/Siunnersorti”-mik nalunaaqutserlugu link matuma kingulianiittoq aqqutigalugu nassiunneqassaaq.

Paasussutissat amerlanerusut
Atorfik pillugu paasissutissanik annertunerusunik pissarserusukkuit immikkoortortami pisortaq, Karen Anne Arleth, oqarasuaat +299 34 54 65-mut attaveqarfigisinnaavat.

Namminersorlutik Oqartussat pillugit annertunerusumik atuagaqarsinnaavutit, uani: www.naalakkersuisut.gl.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk