Skip to main content
140

Dette jobopslag er udløbet

Ilisimatusarfimmi ilinniartunik siunnersuisartutut atorfik

Pitsaasunik suleqateqarnissannik, allanngorartumik ulluinnaqarnissannik, allanngueqataanissamut periarfissaqarnissannik namminerlu sunniuteqarnissannik pingaartitsiguit – taava illit suliffissaqartippatsigit.

Atorfik sapaatip-akunneranut 40 tiimit suliffiuvoq.

Ilinniartuusugut 700-t missaanniittut sulisuusugullu 100-t missaanniittut ilinniartunik siunnersuisartussamik pisariaqartitsivugut. Ilisimatusarfimmi qullersaqarfik – ilinniartunik siunnersuisartup suliffissaa – suliffeqarfimmi pingaarutilerujussuuvoq ilinniartunik, ilinniartitsisunik, suleqatinik, innuttaasunik suleqatigisartakkanillu tapersersuiffiusoq.

Pingaaruteqarpoq illit inunnut assigiinngitsorpassuarnut attaveqartartussatut ­– aammattaarli pingaarnertut ilinniartut pillugit maaniittutut – imminut isiginissat -  ilinniartullu ikiorneqartariaqaraangata piareersimasarpugut. 

Atorfik pillugu
Suliassaq pingaarnerpaaq tassaavoq Ilisimatusarfimmi ilinniartunik inuttut paasisimasalittullu siunnersuisarnissaq immikkoortortani pisortat massakkullu ilinniartunik sullissivimmiut suleqatigalugit.
Suliassanuttaaq ilaapput ilinniartunik sullissinermi allaffissornikkut suliassat, ilinniartunik sullissisut peqatigalugit.

Ilinniartunik siunnersuinermik suliamut ilaapput:

  • Ilinniartunik ataasiakkaanik ataatsikkullu arlalinnik siunnersuisarneq
  • Suliffissatut periarfissat pillugit ilinniartunik siunnersuineq
  • Qinnuteqartunut siunnersuisarfinnullu ilinniakkat pillugit paasissutissiillunilu siunnersuineq
  • Ilinniakkanik ingerlariaqqiffiusinnaasunik, inuussutissarsiorfiusunik soqutigisaqaqatinillu suleqateqarneq
  • Soraarummeernermi annilaanganeq atuariaatsillu il.il. pillugit ilinniartunut saqqummiussaqartarneq workshoppertitsisarnerlu
  • Immikkoortortani suliaqarfinnik assigiinngitsunik suliaqaqatigiissitsineq naammassinnittartut procentiinik qaffassaajumalluni Ilisimatusarfimmilu ilinniartunik atugarissaarnerulersitsiumalluni
  • Ilinniartunut sullissinermi allaffissornikkut suliaqarneq
  • Pisariaqartitsisoqartillugu suliassanut assigiinngitsunut suleqataaneq

Illit piginnaasatit

  • Siunnersuinermut tunngasumik naleqquttumik ilinniagaqarputit
  • Kalaallisut danskisullu oqalussinnaavutit
  • Assingusumik atorfeqarsimanermik misilittagaqarneq iluaqutaassaaq
  • Kalaallit Nunaanni ilinniartitaaneq pillugu ilisimasaqarluarputit
  • Aallarnisaasuuvutit isumassarsisitsilluarsinnaallutit kajumissisitsisinnaallutillu
  • Suliassanut tamanut isumalluartuuvutit
  • Suliaq sullissinertaqangaatsiarmat inatsisaasunik nammineq isummerfiginnissinnaasariaqarputit namminerlu aalajangiisinnaasariaqarlutit

Suliamut ilaavoq inunnut assigiinngitsorpassuarnut attaveqartarneq. Taamaattumik ammasuussaatit, attaveqarniarlutit iliuuseqartartuussallutit inunnullu allanut attaveqallaqqissuussallutit.

Suliaq inuppassuarnik oqaloqateqartarfiuvoq – aamma imaannaanngitsunut tunngasunik oqaloqateqartarfiuvoq. Amerlasuutigut ilinniartunit imaannaanngitsorsiortunit siullertut attavigineqartassaatit. Taamaattumik nukittusariaqarlutillu pimoorussisuusariaqarputit, aammali ajornartorsiutinik aaqqeerusussuseqartuussaatit minnerunngitsumillu maligassiuisuussallutit ilinniartunit toqqissisimaffigineqarsinnaasoq.

Siunnersuinermut tunngatillugu pilersaarutinik malinnittoqartuaannarsinnaannginneranik paasinnittuuvugut. Taamaattumik akornuserneqakulasarneq ulluinnarisinnaasariaqarpat.

Attavigisassat/ilisimatitsissutit:
Atorfik pillugu sukumiinerusunik paasisaqarusukkuit, tikilluaqquneqarputit Ilinniartunut sullissivimmi pisortaq Rosa Lorentzen, oqarasuaat: +299 38 56 10 attavigissallugu.

Ilisimatusarfik pillugu annertunerusumik paasisaqarusukkuit paasissutissat allat atuarsinnaavatit uunga iserlutit www.uni.gl

Ilisimatusarfik pillugu.
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu.
Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
 
Ilisimatusarfik sisamanik instituteqarpoq:

  • Kulturimik, Oqaatsinik Oqaluttuarisaanermillu Ilisimatusarfik
  • Ilinniartitsinermik Ilisimatusarfik ilinniartitsisunngorniarfittaqarlunilu meeqqat atuarfianni ilinniartitsisunut ilinniaqqiffissartalik
  • Peqqissaanermik Ilisimatusarfik peqqissaasunngorniarfittalik
  • Inuiaqatigiilerinermik, Aningaasaqarnermik Tusagassiornermillu Ilisimatusarfik

Allaffissornikkut aqutsisoqatigiiffik pillugu:
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq.
Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk