Atorfik pissanganartoq ilinniartitsinermik, inerisaanermik ilisimatusarnermillu imalik, ilinniartunut qanimut attaveqarneq, ilinniartitsisoqatigiit tunniusimasut ilisimatusarfillu ineriartortoq – soqutigaajuk?

Pissarsiorpugut matematikkimi ilinniaatigaluni studieadjunktimik/- lektorimik, adjunktimik lektorimilluunniit ilinniartitsisussarsiorpoq.

Ilinniartitaanermut Institutti kandidatimik matematikkimi didaktikkimik ilinniartitsisussamik, ajornanngippallu sammisanik allanik ilallugu suliaqarnermik misilittagalimmik pissarsiorpoq.

Atorfik inuttalerneqarnissaminut piariissaaq 01.08.2023 isumaqatigiissulluunniit naapertorlugu.

Instituttimi ilinniartitsisunngorniarneq bachelorinngorniarnerusoq pikkorissarnerit ilinniaqqinnerillu ingerlanneqartarput. Instituttimittaaq pædagogikkimik inerisaanermut ingerlatsivik, ingerlatsivik ineriartortoq, inissisimavoq. Ilinniartitsisoqatigiit 25-t missaanniipput ilinniartullu 180-t missaanniillutik.

Neqeroorutigaagut:

• Sullivik ineriartortuartoq namminersorluni suleqatigiillunilu suliassanik naligiimmik aallutaqarnissamik anguniagalik
• Atuartitsiffik eqeersimaartoq tunniusimasunik piumassusilinnillu sulisulik
• Ilisimatusarfik eqeersimaartoq sammisat perorsaanerullu tungaasigut inerisarnissamut periarfissaqarluartoq. 
• Ilinniartitsisunut nutaanut adjunktitut pædagogikummimik ingerlatsineq sammisallu iluani ilisimatusarnernik angusaqarnissaq siunertaralugu ingerlatsinissamut piffissaqartitsisoq.

Suliassat:

• Ilinniartitsisunngornianik kiisalu ilinniartitsisunik pikkorissartunik ilinniaqqittunillu atuartitsineq
• Atuartitsissutinik taakkualu didaktikkiinik inerisaanerit ingerlaavartut
• Ilinniartitsisunngorniarnerup digital silarsuaanut inerisarnissaa
• Ilinniartitsisunngorniarfimmi suleqatigiit peqatigalugit sammisat akimorlugit suliani peqataanerit
• Ilinniartitsisunngorniarnerup aammalu pikkorissaanerit ilinniaqqinnerillu inerisarnissaannut tunngasunik pilersaarusiornerni suleqataanerit
• Ilaatigullu piginnaasat tunngavigalugit ilisimatusarneq.

Piginnaasat:

• Naleqquttumik kandidatitut ilinniagaqarputit, ajornanngippallu aamma Ph.d-mik.
• Sammisami pineqartumi atuartitsinermik misilittagaqarputit
• Periuutsini ilikkarnartuni ilinniartitsisunngorniarnermut tulluarsagaasuni sulinermik misilittagaqarputit
• Nunarsuarmi ilisimatusaatinik nutaajunerusunik ilinniartitsisunngorniarnermut meeqqallu atuarfiinut tunngasunik ilisimasaqarputit
• Atuartitsininni atortorissaarutit digitaliusut atorsinnaavatit
• Alimasissumik atuartitsisinnaanermik misilittagaqarneq iluaqutaassaaq
• Sammisami piginnaasat, ilisimasallu annersaannik isumaginnissinnaavutit
• Kalaallit Nunaanni meeqqat atuarfiat aammalu Kalaallit Nunaanni kiisalu/imaluunniit Qallunaat Nunaanni ilinniartitsisunngorniarneq ilisimasaqarfigilluarpatit, aammalu ilinniartitsisunngorniarnermi piviusumik sulinerup ilisimatoorpalaartumik ingerlannissaani teoriit piviusullu imminnut attaveqaataasa pingaaruteqarluinnarnerat ilisimaaraat
• Nunarsuarmi sammisani sammisallu didaktikkiini ilisimatusarneq nutaajunerusoq ilinniartitsisunngorniarnermut meeqqallu atuarfiinut tunngasoq ilisimasaqarfigaat 

Qinnuteqaat:
Qinnuteqartut ilinniaatigaluni adjunktitut/- lektoritut, adjunktitut lektoritulluunniit atorfik qinnuteiginerlugu ersarissassavaat. Qinnuteqaat makkuninnga ilaqartinneqassaaq:
Ilanngussaq 1: Curriculum Vitae.
Ilanngussaq 2: Soraarummeersimanernut uppernarsaatit
Ilanngussaq 3: Ilanngussat naleqquttut allat.

Attavigisassat/ilisimatitsissutit:
Atorfik pillugu sukumiinerusunik paasisaqarusukkuit, tikilluaqquneqarputit Institutimi pisortaq Britta Lohmann, oqarasuaat: +299 385702 attavigissallugu.  Ilisimatusarfik pillugu annertunerusumik paasisaqarusukkuit paasissutissat allat atuarsinnaavatit uunga iserlutit www.uni.gl

Naliliisarneq atorfinitsitsisarnerlu, adjunktinut lektorinullu atorfinnut
Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani  naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik.

• Studieadjunktitut atorfeqartitaaneq ukiunik 6-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorit naliliinerat tunngavigalugu studielektoritut atorfittut aalajangersimasunngorlugu atorfinitsinneqarsinnaavoq. 
• Studielektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat. 
• Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq. 
• Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat. 

Ilisimatusarfik pillugu.
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
 
Ilisimatusarfik sisamanik instituteqarpoq:

• Kulturimik, Oqaatsinik Oqaluttuarisaanermillu Ilisimatusarfik
• Ilinniartitsinermik Ilisimatusarfik ilinniartitsisunngorniarfittaqarlunilu meeqqat atuarfianni ilinniartitsisunut ilinniaqqiffissartalik
• Peqqissaanermik Ilisimatusarfik peqqissaasunngorniarfittalik
• Inuiaqatigiilerinermik, Aningaasaqarnermik Tusagassiornermillu Ilisimatusarfik

Allaffissornikkut aqutsisoqatigiiffik pillugu:
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq.
Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk