Skip to main content
114

Dette jobopslag er udløbet

Ilisimatusaatinut ataqatigiissaarisutut/immikkut siunnersortitut atorfik pissanganartoq

Ilisimatusarfik 750-inik ilinniartulik 100-llu missaannik sulisulik ilisimatusarfiullunilu ilinniarfik Kalaallit Nunaanni annersaasoq. Ilisimatusarfik Nunani Issittuni issittunilu ilisimatusarnermi qitiu-sumik inissisimavoq. Nunatta iluani nunarsuarmioqataanermilu allanngorterinerup inerisaanerullu pissanganartup nalaaniippugut.

Ilisimatusaatinut ataqatigiissaarisumik/immikkut siunnersortimik Kalaallit Nunaanni, Nunani Issittuni, Nunani Avannarlerni nunarsuarmioqataanitsinnilu ilisimatusarnermik ilisimasaqarluar-tumik pissarsiorpugut.
1.august 2021 isumaqatigiissuteqarnerluunniit malillugu atorfinitsitsisoqassaaq.

Ilisimatusaatinut ataqatigiissaarisup/immikkut siunnersortip Ilisimatusarfimmi ilisimatusartunut allaffiup pilersinnissaa ingerlannissaalu akisussaaffigissavai, aqutsisoqarfiup allattoqarfiani inissisimassalluni rektorillu ataani sulissalluni.

Qinnuteqartumut eqqortunik piginnaasanut uppernarsaatinik takutitsisinnaasumut immikkut siunnersortitut atorfik neqeroorutigaarput.

Suliassat
Ilisimatusaatinut ataqatigiissaarisup/immikkut siunnersortip Ilisimatusarfimmi aqutsisut, immikkoortortani aqutsisut, ilisimatusartut, ilisimatusartoqatigiit ilisimatusarfiillu allaffissornikkut suliassaani assigiinngitsuni siunnersorlugillu tapersersussavai. Tassunga ilaapput aningaasanik ilisimatusaatinut atugassanik maanga avataanullu aningaasaateqarfinnut namminersortunut, Kalaallit Nunaanni Ilisimatusartunut Siunnersuisooqatigiinnut kiisalu Nunani Avannarlerni EU-milu aningaasaliissutinik qinnuteqaatit pitsaassusaannik qulakkeerinninnerit.

Ilisimatusaatinut ataqatigiissaarisup/immikkut siunnersortip suliassai ilaatigut tassaapput:

  • Ilisimatusarfimmi ilisimatuut, suliffeqarfiit, oqartussat inuinnaallu suleqatigalugit sulianik inerisaanerni aningaasaliisussarsiornernilu ataqatigiissaarineq
  • Ilisimatusarnerup niuernerpalaarsarneranut ersarissaaqataaneq – ilaatigut Greenland Venture/Greenland Business suleqataatillugit
  • Ilisimatusarnermi ataqatigiissaarineq, tassunga ilanngullugit aningaasanut missingersuutinik nakkutilliineq kiisalu ilisimatusarnernik ataqatigiissaarineq
  • Ilisimatusartut peqatigalugit aningaasaliisussarsiornerni periutsit inerisarneri
  • Ilisimatusarfimmi ilisimatusaatinut aningaasaliisussarsiornernut ikorfartuineq
  • Ilisimatusarfimmi ilisimatuunik ataatsimeeqateqarnerit aammalu qinnuteqaatinik tapersersuineq, ilaatigut CV-t inerisarnerisigut
  • Sammisat inerisarneri aningaasaliisussarsiornerlu pillugit immikkut sammisaqartitsinerit
  • Ilisimatusarfimmi immikkoortortat assigiinngitsut peqatigalugit ilisimatusaatinik nalilersuinerit
  • Sammisat akimorlugit sulianik ataqatigiissaarineq kiisalu Greenland Science Week-imut tunngasunik sammisanik aqutsineq
  • Campus-ip allilernissaanut tunngatillugu sulianik aqutsineq
  • Aqutsisunut qullernut ataavartumik aqqutissiuussineq
  • Ph.d.-mik ilinniarfiup allaffissugassartai, tassunga ilaallutik ph.d.-mi pikkorissarnerit aaqqissuussallu allat ph.d.-mik ilinniagalinnut ilinnialersussanullu sammisut.
  • Ph.d.mik ilinniarfiup aqutsisuanik aqqutissiuussineq avitseqatiginninnerlu

Piginnaasat
Ilinniagartuutut suliamut tunngatillugu tunuliaquteqarlutillu ilinniagaqarnissat naatsorsuutigaarput.

Naatsorsuutigaarput ilisimatuutut allaffissornermik misilittagaqartutit, soorlu:

  • Piumasaqaatit pitsaassusaannik qulakkeerinneq avataanillu aningaasaliisussarsiornernik missingersuusiornernillu pitsaassusersuinerit
  • Ilisimatusaatit/-suliniutit imaannik aningaasartaannillu misissuinerit nalunaarusiornerillu
  • Nunami namminermit avataaniillu aningaasaliisunik, tassanilu pingaartumik aningaasaate-qarfinnik namminersortunik nunarsuarmiunillu suliaqarnermik ilisimasaqarneq misilittagaqarnerlu
  • Ilisimatuumik humanismemik, inuiaqatigiilerinermik, peqqissaanermik pinngortitamillu ilisimatusaateqartunik suleqateqarnerit
  • Kalaallit Nunaanni ilisimatusarneq pillugu ilisimasaqarluarneq.

Naatsorsuutigaarput inuttut:

  • Namminersortumik suliamullu tunngassunik suliaqartunik allanik peqateqarlutit sulisinnaasutit
  • Suleqateqarnermut suleqatinullu attaveqarnermut piginnaasaqarluartutit – Ilisimatusarfiup iluani avataanilu aningaasaateqarfinnut, siunnersuisoqatigiinnut allanullu tunngatillugu
  • Oqaatsinik arlalinnik atuisinnaasutit, tassani aamma tuluit oqaasiinik
  • Qajannaatsuusutit sulianillu assigiinngitsunik ataatsikkut suliaqarsinnaasutit

Neqeroorutigaarput:

  • Suliffik pissanganartoq inuttut sammisakkullu unammillernartulik
  • Ulluinnaq ulapaarfiusoq amerlasuutigut oqaatsinik assigiinngitsunik pingasunik atuiffiusoq
  • Sullivimmi avatangiisit pitsaasut ilumoorsaarfiunngitsut sulisunit ataasiakkaanit sunniuteqaqataaffiusut

Attaveqarneq / Paasissutissat
Atorfik pillugu annertunerusumik paasisaqarusukkuit tikilluaqquatsigit Rektorimut Gitte Adler Reimer-imut attaveqarnissannut, oqarasuaat +299 385602.

Ilisimatusarfik pillugu.
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut quliullutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit.
Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu.
Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
 
Ilisimatusarfik sisamanik instituteqarpoq:

  • Kulturimik, Oqaatsinik Oqaluttuarisaanermillu Ilisimatusarfik
  • Ilinniartitsinermik Ilisimatusarfik ilinniartitsisunngorniarfittaqarlunilu meeqqat atuarfianni ilinniartitsisunut ilinniaqqiffissartalik
  • Peqqissaanermik Ilisimatusarfik peqqissaasunngorniarfittalik
  • Inuiaqatigiilerinermik, Aningaasaqarnermik Tusagassiornermillu Ilisimatusarfik

Allaffissornikkut aqutsisoqatigiiffik pillugu:
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut.
Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk