Skip to main content
156

Dette jobopslag er udløbet

Avatangiisinut Aqutsisoqarfimmut aatsitassanut suliassaqarfimmi

Issittumi avatangiisinik ingerlatsineq soqutigisaraajuk?
Politikkikkut aalajangiisartunut qanimut sulinissat kajumigaajuk?
Suliassaq teknikkikkut pisariusoq paasiuminartuliarisinnaaviuk?
Sammisat amerlasuut ataatsikkut aallussinnaavigit?
 
Avatangiisinut Aqutsisoqarfik Aatsitassanut suliassaqarfimmi  piumassusilimmik pikkorissumillu sulisussarsiorpoq.
 
Avatangiisinut Aqutsisoqarfik pillugu
Aatsitassanut Suliassaqarfimmi Avatangiisinut Aqutsisoqarfik (Avatangiisinut Aqutsisoqarfik) Namminersorlutik Oqartussani Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi immikkoortortaqarfiuvoq tallimanik sulisulik. Avatangiisinut Aqutsisoqarfik Aatsitassanut Aqutsisoqarfik peqatigalugu Kalaallit Nunaanni aatsitassaqarnermut oqartussaasuuvoq.
Avatangiisinut Aqutsisoqarfiup Kalaallit Nunaanni politikkikkut aalajangiinissamut aatsitassarsiornerni avatangiisit pillugit suliassani ilisimasanik tapersiisarnissaq suliassaraa. Aamma Avatangiisinut Aqutsisoqarfik nammineerluni Aatsitassarsiornermi avatangiisit, pinngortitaq silallu pissusia pillugu naliliisarpoq aalajangiisarlunilu.

Atorfik
Matumani AC-fuldmægtigitut atorfinititsinissaq pineqarpoq. Qinnuteqartoq naleqquttunik piginnaaneqartoq naammattunillu misilittagaqartoq nalileereernikkut Specialkonsulentitut imaluunniit Siunnersortit pisortaattut atorfininnissamik neqeroorfigineqarsinnaavoq.

Suliassatit
Aatsitatassarsiornermi avatangiisini pissutsinut tunngasut pillugit sullissinermik, aammalu aatsitassarsiorfiit aatsitassanik saffiugassanik ujarlernerannut atuinerannullu avatangiisinut maleruagassanut atatillugu suliassat ataqatigiissaarneqarnerinik isumaginnittassaatit. Tamanna ilaatigut suliffeqarfiup iluani avataanilu suliassanik ataqasigiisaarinermik isumaqatiginninniarnernillu aqutsinermi suliassanik, kiisalu sulianik aqutsinermik isumagisassaqarfiuvoq.  
Aqutsisunut ilisimatitsissutinik uppernarsarluarneqarsimasunik aammalu suliassaqarfiup iluani Naalakkersuisut aalajangiinissaannut tunngavissianik suliaqartassaatit, aamma avatangiisinut nalilersuinernut avatangiisinullu nakkutilliinermut atatillugu suliassanik isumagisaqartassaatit. Nutaarsiassanillu allakkianik suliaqarnermut kiisalu ilitsersuutinik maleruagassanillu nutarterinermi suleqataassaatit ulluinnarni pingaartumik Avatangiisinut Aqutsisoqarfimmi suleqatit suleqatigissavatit.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik aamma Aatsitassanut Naalakkersuisoqarfik kiisalu Aatsitassanut Aqutsisoqarfik qanimut suleqatigissavatit. Tamatumalu saniatigut Avatangiisinut Aqutsisoqarfiup ilisimatusarnikkut siunnersortai,  Nationalt Center for Miljø og Energi-mi Pinngortitaleriffimmilu inissisimasut suleqatigissavatit. Aatsitassarsiornermilu ingerlatseqatigiiffinnut soqutiginnittunillu ingerlaavaartumik attaveqaateqartassaatit.

Piginnaasat
Avatangiisinut Aqutsisoqarfik tassaavoq aqutsisoqarfik mikisunnguaq piffissap ilaani ulapiffiulluartartoq. Taamaattumik illit unammilligassanut piumassuseqarluartuunissat, suliassanullu uippallertannginnissat isumagissaartuunerillu, ataatsimut isiginnissinnaanerit ulapiffimmilu pissutsinik nakkussisinnaanerit aalajangiisuusaaq. Iluarissavarput illit suliassaqarfimmit matumani assingusumit misilittagaqarluartuussaatit, aammalu kiinnertarluarnissat suleqatinnersumillu suleqatinut aqutsisunullu suleriaaseqarnissaq. Pisortat ikiorneratigut tunniusimasuunissat, suliannullu ataqqinnillutit ajunnginnerpaaq anguniarlugu suliaqartarnissat pisussaaffigaat.

Ilinnut tunngatillugu makkua pingaartippagut:
  • Pinngortitaq pillugu ilisimatusarnermi, naalagaaffik pillugu ilisimatusarnermi, avatangiisit pillugit ingerlatsinermik assigisaaniluunniit attuumassutilimmik ilinniagaqarsimanissaq.
  • Suliassanut ilisimaarinnilluartuunissaq, misissueqqissaartuunissaq, peqqissaartuunissaq, namminersorsinnaassuseqarnissaq aamma piffissaq eqqorlugu sulianik angusaqarsinnaanissaq naammassisaqarsinnaanissarlu.
  • Avatangiisinut suliassaqarfimmut kiisalu aatsitassarsiornermut soqutiginnittuunissaq suliassanullu paasisimasaqarnissaq.
  • Avatangiisinik nalilersuisarnerni ilisimasaqarnissaq ajornanngippallu aamma misilittagaqarnissaq
  • Pisortat ingerlatsinerannik pisortallu inatsisaannik ajornanngippat soqutigisaqartuunissaq aamma misilittagaqartuunissaq.
  • Avatangiisit nunanit tamalaanit eqqumaffigineqartut namminersorlutit aaqqissuussamillu suliarinissaannut soqutigisaqarnissaq piginnaasaqarnissarlu.
  • Inussiarnersuunissat ilakkuminartuunissallu, kiisalu isumaqatiginninniarnerni suleqatigiinnernilu attaveqarnernik pilersitsiviusinnaasunik pilersitsinissamut piginnaaneqarluarnissaq.
  • Akisussaassuseqarluarnissaq aammalu suliniarsinnaassuseqarnissaq, suliannullu aaqqissuussamik sulisinnaassuseqarnissamik takutitsisinnaanissaq.
  • Tuluttut oqalussinnaanissaq allassinnaanissarlu.
  • IT-mut piginnaaneqarluarnissaq aammalu ajornanngippat F2-mut GIS-mullu atuinermut ilisimasaqarnissaq.
  • Attaveqaqateqarnissamut allattariarsiornikkut oqaatsitigullu piginnaasaqarnissaq, aamma sulianut siunnerfinnut assigiinngitsumik ersarissumik akuersaartumillu saqqummiussaqarnissaq.
  • Oqaatitsigut pitsaasunik  danskisut tuluttullu, ajornanngippallu kalaallisut piginnaaneqarnissaq.
  • Inuiaqatigiit kalaallit kulturiallu ilisimasaqarfigalugulu soqutigisaqartuunissaq.
  • Kulturit assigiinngitsut akornanni sulineq ilisimaarinnilluartuunissaq.
  • Akuersaartumik periaaseqarnissaq isumagissaartuunissarlu.
Neqeroorutigaarput
Atorfik tamatigoortoq unammilligassaqarfiusorlu, suliatigut inuttullu piginnaaneqarfinnik ineriartortitsinissamut periarfissaqarluartoq. Ulluinnaat ulapaarfiusut pissanganartullu, nuannersunik suleqateqarfiusut pingaartorsiorfiunngitsumillu pissuseqarfiusut.
 
Angalasarnissaq
Kalaallit Nunaanni avataanilu annikitsumik angalasarnissaq naatsorsuutigineqartariaqarpoq.
 
Ilassutitut paasissutissat
Atorfik pillugu paasissutissat annertunerusut aqutsisoqarfimmi pisortaq Steen Christensen, tlf. +299 34 51 87-imut, e-mail: chrs@nanoq.gl, saaffigalugu pissarsiarineqarsinnaapput.
 
Kalaallit Nunaanni aatsitassarsiorneq pillugu paasissutissat amerlanerusut Aatsitassanut Oqartussaasut nittartagaat www.govmin.gl alakkarlugu takuneqarsinnaapput. Aamma una nassaarisinnaavat – Aatsitassarsiornermi Avatangiisinut Aqutsisoqarfik, www.asaa.gl.
 
Qinnuteqaat
Qinnuteqaatit, CV, ilinniakkanut pikkorissarsimanernullu uppernarsaatit kiisalu uppernarsaatit allat naleqquttut nassiutikkit una toorlugu “qinnuteqaat nassiuguk”. Qinnuteqaatinik e-mail-ikkut tigusisanngilagut.
Qinnuteqarnissamut piffissaliussaq tassaavoq 01.09.2022
 
Atorfinitsitsinissamut atatillugu ingerlaavartumik oqaloqateqartoqartassaaq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.   Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk