Skip to main content
157

Dette jobopslag er udløbet

Attaveqaasersuutinut immikkoortortaqarfik marlunnik nutaanik sulisussarsiorpoq

Nunatsinni attaveqaasersuutit pillugit sulinitsinni allanngueqataanissaq sunniuteqarluarnissarlu kajumigaajuk?

Ulluinnaat ulapaarfiusut, sulianik paasisimaarinniffigisinnaasatit isumassarsianillu timitaliiffigisinnaasatit nuannaraagit? Taamaattumik immaqa illiuvoq amigaatigisarput. Attaveqaasersuutinut Immikkoortortaqarfimmi ulappuppugut, taamaattumillu sulisussanik nutaanik marlunnik, suleqatigiinni pikkorissuni suleqataalersinnaasunik pissarsiorluta.

Silaannakkut angallassinermi tamanut tunngasut
Silaannakkut angallassinermi suliassat suliassaqarfimmi mittarfiit 13-inut aamma qulimiguulinnut mittarfiit 46-nut, kiisalu silaannakkut angallassinermut maleruagassanut tamarmiusunut tunngasuupput. Aalajangersimasumik suliassaqarfimmut soqutigisaqartut amerlasuut oqartussaasullu allat, soorlu Danmarkimi Angallannermut Aqutsisoqarfik qanittumik suleqatigalugit silaannakkut angallassinermi suliassat isumagisassagitit naatsorsuutigineqarpoq.

Ilulissani, Nuummi Qaqortumilu mittarfiit nutaat sananeqarnerini suliassaqarfik annertuumik ineriartortinneqarpoq angallasseriaaserlu allanngortussaalluni. Suliassaqarfik politikkikkut annertuumik eqqumaffigineqarpoq, aammalu allaffimmi suleqatitit allat qanittumik suleqatigalugit suliani paasissutissiisarnermut aaqqiissutissanillu ujartuisarnermut ingerlaavartumik ikiuuttassaatit.

Nalunaarasuartaateqarnermi, allakkerinermi angallannermilu suliassat ineriartortitsiffiusussat aallunneqarnerini tamanut tunngasut
Sulisussamik, nalunaarasuartaatitigut attaveqaqatigiinnermut, allakkerinermut angallannermullu suliassaqarfiit iluanni suliassanik isumaginnittussamik pissarsiorpugut. Tamatuma saniatigut angallannermut periusissiornerup suliarineqarnerani ikiuuttassaatit.

Suliat maanna ingerlanneqartut ilaatigut tassaapput nalunaarasuartaatitigut attaveqaqatigiinnermut periusissiaq, nalunaarasuartaatit pillugit inatsit nutaaq, angallannermut inatsimmi allannguutissanik qulakkeerinissaq aamma Kalaallit Nunaanni mittarfeqarnermi suliniutit angisuut ingerlaqqinnissaannut nunap immikkoortuini angallannermut periusissiap suliarineqarnera.

Suliassat suliarineqarnerini ingerlaavartumik suleqatigiittoqassaaq oqaloqatigiittoqassallunilu.

Suliassat
Atorfinni marluusuni illit akisussaaffeqarfinni uku suliassarissavatit:

  • Politikerinik kiffartuussineq
  • Soqutigisaqartunik, suleqatinik ataatsimeeqateqartarneq aamma suleqatigiissitap ataatsimiinnerini peqataasarneq
  • Innuttaasut saaffiginnissutaannut akissuteqartarneq
  • Tusarniaassutinut akissuteqartarneq
  • Unammilligassanik suliassanillu ujartuisarneq
  • Misissueqqissaarnernik, allakkianik aaqqiissutissatullu siunnersuutinik suliaqartarneq


Illit pillutit naatsorsuutigisagut
Pingaartipparput:

  • Ilinniagartuutut attuumassutilimmik ilinniagaqassasutit
  • Ajornartorsiutit teknikkimut inatsisilerinermullu tunngasut suliarisinnaassagitit
  • Ilisimasanik ajornartorsiutinillu oqaatsit paasiuminartut atorlugit ingerlatitseqqissinnaassasutit
  • Tulleriiaaralutit aaqqissuussinermullu piginnaaneqarlutit sulisinnaassasutit
  • Danskit aamma kalaallit politikkiini oqimaaqatigiissitsinissaq kiisalu suliassaqarfimmut inatsisit paasisimaarissagitit
  • Ajornartorsiutinik misissueqqissaarsinnaassasutit aaqqiissutissanillu eqqortunik ujartuinermi suleqataasinnaassasutit
  • Immikkoortortaqarfimmi aamma Kalaallit Nunaanni Danmarkimilu suleqatinnik suleqateqarsinnaassasutit
  • Namminersorlutit sulisinnaassasutit, kisiannili aamma immikkoortortaqarfimmi suleqativit allat qanoq ilinerani suleqatiginissaannik ilisimaarinnissasutit
  • Aaqqissuussaanermi politikkikkut aqunneqartumi sulisinnaassasutit
  • Aaqqissuussaanermi politikkikkut aqunneqartumi sulinermik misilittagaqassasutit, kisiannili aamma ilinniarninni naammasserlaajusinnaavutit.

Inuiaqatigiit kalaallit, oqaatsit kulturillu ilisimasaqarfiginissaat iluaqutaassaaq, piumasaqaataanngilarli.

Matuma siuliani allassimasut saniatigut ileqqorissaartuunissat, pingaartorsiortuunnginnissat aammalu ullut suliffiusut ingerlanerini illaqataalluarsinnaanissat naatsorsuutigaarput.

Uagutsinnut tunngasut
Immikkoortortaqarfimmi sulisut quliupput, allaffinnut marlunnut avissimasut, aammalu assiginngitsorpassuarnik suliaqarpugut. Immikkoortortaqarfimmi silaannakkut angallassinermi, mittarfeqarnermi, imarsiornermi, umiarsualiveqarnermi, angalasarnermi, angallannermi, allakkerinermi nalunaarasuartaatillu atorlugit attaveqaqatigiinnermi suliassanik assigiinngitsunik pilersaarusiorneq, ataqatigiissaarineq iluarsiisarnerlu isumagineqarput.  Naalakkersuisoqarfimmi sulinermi politikerit aalajangiinissamut tunngavissanik pisariaqartunik pilersorneqarnissaannik qulakkeerinissaq aamma politikerit kissaataannik piviusunngortitsinissamut qulakkeerinissaq suliassaraarput. 

Sulineq avatangiisini ulapaarfiusuni ingerlanneqarpoq, tassanilu sulinermik nuannarisaqarneq akisussaaffeqarnerlu aamma suliatigut qaffasissumik piginnaaneqarnissaq tulluusimaarutigisinnaasatsinnillu angusaqarluarsinnaanissaq ingiaqatigiipput. Ulluinnaat isumagissaarfiupput akuttunngitsumillu ulapaarfiusarlutik. Suliffeqarfiuvugut inissaqartitsiffiulluartoq, suleqatigiinnermi ataatsimoorfiulluartoq aammalu sulinerup ilaqutariittullu inuunerup ataqatigiinnissaannik ataqqinniffiusoq.
 
Pinerluuteqarsimannginnermut uppernarsaat
Atorfimmi atorfinissinnaassaguit malittarisassat naapertorlugit pinerluuteqarsimannginnermut uppernarsaateqartariaqarputit. Taamaattumik pinerluuteqarsimasunik nalunaarsuiffimmit pinerluuteqarsimannginnermut uppernarsaammik aallaqqaammut tunniussissaatit. Taanna najukkami politeeqarfimmi imaluunniit www.politi.gl/bestil-straffeattest/privat-straffeattest-imi pissarsiarineqarsinnaavoq

Aningaasarsianut atorfininnermullu tunngasut
Atorfik AC-fuldmægtigimik inuttassarsiorneqartutut allagarsiissutigineqarpoq. Atorfinitsitsineq pissaaq Namminersorlutik Oqartussat aamma kattuffiup isumaqatiginninniarsinnaatitaasup pineqartup akornanni isumaqatigiissut/sulisartut isumaqatigiissutaat naapertorlugu.

Qinnuteqartumut eqqortunik piukkunnassusilimmut ukiut arlallit misilittagalimmut, ataasiakkaatigut nalilersuineq malillugu, atorfinitsitsineq immikkut siunnersortimut atugassarititaasut tunngavigalugit pisinnaassaaq.

Atorfimmut atatillugu sulisunut inissiamut innersuussisoqassanngilaq. Qinnuteqartoq Namminersorlutik Oqartussani atorfeqarnermini sulisunut inissiameereerpat, sulisunut inissiamut innersuunneqarsinnaatitaaneq attatiinnarneqassaaq. Sulisunut inissiaq Namminersorlutik Oqartussani sulinermut atasuuvoq, aammalu atorfeqarunnaarnermi qimanneqassalluni.

Ulloq atorfiniffissaq
1. oktobari 2022, imaluunniit isumaqatigiissuteqarnikkut.

Piffissaq suliffiusussaq   
Sapaatip akunneranut nalunaaquttap akunneri 40-t.

Atorfininnissaq pillugu oqaloqatiginninnissamut ulluliussaq
Oqaloqatiginninnerit ingerlaavartumik ingerlanneqassapput.

Soqutiginnippit?
Apeqqutissaqaruit immikkut ittumik siunnersorti Dorte Juul Munch oqarasuaat +299 34 52 56-imut imaluunniit mail dojm@nanoq.gl aqqutigalugu, imaluunniit allaffimmi pisortaq Nicklas Lauritzen +299 34 52 53-imut imaluunniit mail nlau@nanoq.gl aqqutigalugu attaveqarfigisinnaavatit.

Kajumillutit qinnuteqaatit, CV-t, ilinniarsimanermut pikkorissarsimanermullu uppernarsaatit, nammineerlutit pinerluuteqarsimannginnermut uppernarsaatit kiisalu uppernarsaatit attuumassutillit allat “Qinnuteqaat nassiuguk” toorlugu nassiutikkit.

E-mail aqqutigalugu qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk