Skip to main content
108

Dette jobopslag er udløbet

Atorfik inuttassarsiuussaq – Attaveqaqatigiinnermut Immikkoortortaqarfimmi misissueqqissaartartut

Aningaasaqarnermik inuiaqatigiinnullu tunngasunik misissueqqissaarnermi suliassanut piginnaaneqarluarpit? Politikkip misissueqqissaarnerullu akornanni killiffinni apeqqutinik suliaqarnissamik kissaateqarpit? Attaveqaqatigiinnermut Immikkoortortaqarfimmi atorfimmik pissanganartumik unammillernartumillu neqeroorfigisinnaavatsigit.

Kalaallit Nunaanni attaveqaqatigiinnermut tunngasut ineriartupiloorput – attaveqaqatigiinnermut immikkoortortaqarfik ulapiffiuvoq, taamaattumik immikkoortortaqarfimmi misissueqqissaartartutut atorfinnik nutaanik marlunnik pilersitsivugut.

Atorfik pillugu nassuiaat
Attaveqaqatigiinnermut Immikkoortortaqarfik Ineqarnermut Attaveqaqatigiinnermullu Naalakkersuisoqarfiup ataani inissisimavoq, aammalu Naalakkersuisoqarfimmi immikkoortortaqarfiit sisamaasut ilagalugu.

Attaveqaqatigiinnermut immikkoortortaqarfiup ”nunamut, immamut silaannarmullu” tunngasut iluanni suliassanik pilersaarusiorneq, ataqatigiissaarineq suliaqarnerlu isumagisarai, taamaattumillu imarsiornermi, silaannakkut angallannermi, mittarfeqarnermi, umiarsualiveqarnermi, attaveqaateqarnermi aammalu nunakkut imaatigullu assartuussinermi suliassaqarfinnut akisussaasuulluni.

Immikkoortortaqarfiuvugut mikisunnguaq assigiinngitsorpassuarnik suliaqartoq aammalu nuna isorartooq , siammasissunik najugaqarfeqartoq attaveqaatillu ingerlalluarnissaannik pingaartitsiviulluinnartoq sullitaralugu.

Attaveqaqatigiinnermut Immikkoortortaqarfimmi suliat politikkikkut eqqumaffigineqartorujussuupput, aammalu tamanit tusagassiorfinnillu soqutigineqarluni. Suliassat suleqataaffigisavut innuttaasut tamarmik ulluinnarni atugaannut pingaaruteqartorujussuupput, aammalu nunatsinni ineriartorfiusinnaasut piviusunngortinneqarnissaannut isumaqartorujussuullutik.

Ilinnut tunngasut

  • ilinniagartuutut attuumassutilimmik ilinniagaqartoq,
  • misissueqqissaarnermut ajornanngippallu aningaasaqarnermut tunngasunik piginnaaneqarluartoq, aammalu misissueqqissaarnernik suliaqarnermik misilittagaqartoq
  • politikkimik ilisimasaqarluarneq suliallu ingerlasarnerinik paasisimaarinnilluartoq
  • oqaasinngortitsisinnaanermut piginnaaneqarluarneq aammalu saqqummiussanik paasiuminaatsunik paasiuminarsarlugit ingerlatitseqqissinnaasoq
  • suleqatigiinnguani  tunniusimasunillu suleqateqarfiusuni suleqataanissamut kajumissuseqartoq
  • isumagissaartoq aammalu sullivimmi avatangiisini ilumoorsaaginnarfiunngitsumi sulisinnaasoq

Immikkoortortaqarfiup suliaqarfiinik ataatsimik amerlanerusunilluunniit ilisimasaqaruit iluaqutaassaaq.

Suliat avatangiisini ulapaarfiusuni suliatigullu unammillernartuni ingerlanneqarput, tassanilu sulinermik nuannarisaqarneq akisussaaffeqarnerlu angusanik pitsaasunik, tulluusimaarutigisinnaasatsinnik inerneqartarput.

Suliassatit pingaartumik immikkoortortaqarfimmi suliaqarfiit akimorlugit ataqatigiissunik misissueqqissaarnermi suleqateqarnermut suliaqarnermullu tunngasuussapput, taannalu aqqutigalugu Kalaallit Nunaanni attaveqaqatigiinnerit akimorlugit ataatsimut eqqarsarnissaq qulakkiissallugu. Tassalu ilaatigut sanaartornermut aningaasaqarneq teknikkilu, ilaasut ingerlaarnerinik misissueqqissaarnerit assartuussinissamullu tunngasut ilannguttartussaassavatit, kiisalu maannamut ilutsit pioreersut pitsannguiffiusinnaasut tappiffigissallugit. Immikkoortortaqarfimmi sulianut immikkut ilisimasallit ataatsimoorput, silaannakkut angallannermi, imarsiornermi, umiarsualiveqarnermi, attaveqaateqarnermi, angallannermi kiisalu ilaasunik angallassinermi suliassaqarfinnut agguagaallutik, illillu suliassaqarfiit taakku tamaasa akimorlugit suleqataanissaq suliassarissavat.

Ataatsimooqatigiinneq pitsaasuuvoq ilumoorsaaginnarfiunanilu, aammalu ulluinnaat amerlanertigut ulapaarfiusut isumagissaarnermik sunnersimaneqartarput. Suliffeqarfiuvugut inissaqartitsiviulluartoq, suleqatigiit nuannersumik ataatsimoorfigisaat aammalu sulinerup iluani ilaqutariittullu inuunerup ataqatigiinnissaannik ataqqinniffiusoq.

Tusarfiginissat qilanaaraarput, aammalu Kalaallit Nunaanni naalakkersuisuni sulineq, attaveqaqatigiinnermut immikkoortortaqarfiup suliai sullivippullu pitsaasoq pillugit paasissutissanik tunniussinissamut piareersimavugut.

www.nanoq.gl aqqutigalugu Kalaallit Nunaanni Namminersorlutik Oqartussani sulineq pillugu isumassarsiorsinnaavutit paasisaqarsinnaallutillu.

Akissarsiat atorfininnermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.


Inummik piukkunnaatilimmik, ukiuni arlalinni sulinermik misilittagaqartumik atorfinitsitsinermi, aalajangersimasumik nalileereernerup kingorna immikkut ittumik siunnersortitut atugassaqartitsiviusumik atorfinitsitsisoqarsinnaavoq.

Inissiaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Soqutiginnippit?
Apeqqutissaqaruit allaffimmi pisortaq Louise Restorff Jacobsen loja@nanoq.gl, tlf.: 346909-mut attaveqarfigisinnaavat.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk