Skip to main content
158

Dette jobopslag er udløbet

Aqutsinermut allattoqarfimmi allaffimmi fuldmægtigi/servicemedarbejderi Ineqarnermut Attaveqaqatigiinnermullu Naalakkersuisoqarfimmi

Aqutsinermut allattoqarfimmi allaffimmi fuldmægtigi/servicemedarbejderi Ineqarnermut Attaveqaqatigiinnermullu Naalakkersuisoqarfimmi


Ineqarnermut Attaveqaqatigiinnermullu Naalakkersuisoqarfik allaffimmi fuldmægtigimik, pingaartumik Naalakkersuisoqarfiup aqutsinermut allattoqarfiani kiffartuussinermik suliaqartussamik, 1. august 2019-imi imaluunniit isumaqatigiissuteqarnikkut piaarnerpaamik atorfinissinnaasumik pissarsiorpoq.

Atorfik pillugu 
Aqutsinermut allattoqarfik immikkoortortat sisamaasut ilagaat. Naalakkersuisoqarfimmi sulisut 30-it missaanniipput. Immikkoortortaqarfik arfinilinnik sulisoqarpoq naalakkersuisoqarfiullu politikkikkut allaffissornikkullu qullersatut aqutsisuinut sulisoqarfiulluni, Naalakkersuisoqarfiup naalakkersuisumik naalakkersuisoqarfimmilu pisortamik sullissinerata ataqatigiissaarnissaa pitsaassusaanillu qulakkeerinissaq akisussaaffigalugu.

Allaffimmi fuldmægtigitut/servicemedarbejderitut aqutsinermut allattoqarfimmi sulisut qanillugit suleqatigissavatit, aammalu Naalakkersuisumut, Naalakkersuisoqarfimmi Pisortaanermut Naalakkersuisoqarfimmilu sulisunut allanut atatillugu kiffartuussinermi ingerlatsinermilu suliassat isumagisarissavatit. Kiisalu Naalakkersuisoqarfimmi sulisut atugarissaarnissaannut suliniutit pilersaarusiorneqarnerini ingerlanneqarnerinilu ataqatigiissaarisuussaatit. Kiffartuussinermi suliassat maleruagassat aalajangersimasut malillugit aalajangersarneqarsimapput, kisiannili namminersorluni suliniuteqarnissamut ineriartortitsinissamullu periarfissaqarluassaaq. Piffissalli ilaani aqutsinermut allattoqarfiup pitsaassutsinik qulakkeerisarneq, nutserisarneq ataqatigiissaarisarnerlu ulapputigingaatsiartartussaammagit, piffissani taakkunani allaffimmi fuldmægtigitut inissittassaatit sulisassallutillu.

Suliassatit tassaassapput:
• Naalakkersuisumik Naalakkersuisoqarfimmilu pisortamik kiffartuussineq
• Naalakkersuisoqarfimmi sulisunut allanut kiffartuussineq ataatsimiinnernullu piareersaaneq
• Uninngasuutinik aqutsineq misissuisarnerlu
• Allaffimmi atortussanik pisiniartarneq ingerlatsinerlu
• Allaffimmi maskiinanik pequtinillu il.il. suliaqartarneq
• Allakkerineq
• Allaffimmi suliassaalersut
• Nutsikkat pitsaassusiinik qulakkeerisarneq
• Nutsigassanik annikinnerusunik suliaqartarneq
• Akiligassanik misissuineq
• Naalakkersuisunut Inatsisartunullu sulianik piareersaaneq

Uku piginnaaneqarfigissavatit:
• Allaffissornermi, niuernermi kiffartuussinermilu attuumassutilimmik ilinniagaqarputit
• Kiffartuussinissamik ilisimaarinnilluarputit suleqatikkuminartuullutillu
• Torersaarnissaq sungiusimalluarpat
• Tunniusimasuuvutit suliannullu akisussaaffimmik tigusisarlutit
• Suliatigut sammiviit amerlasuut suliaqarfiginissaat nuannaraat, isummerfissanullu nutaanut pilertortumik paasinnissinnaavutit
• Namminersorlutit sulisinnaavutit suleqatitillu suleqatigisinnaallugit.
• Ammasuuvutit suliniuteqarumatuujullutillu
• Allattariarsornikkut oqaluinnarnikkullu marluinnik oqaaseqarputit (kalaallisut/danskisut)

Aningaasarsiatigut atorfinitsitaanermilu atugassarititaasut 
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Sapaatit akunnerinut suliffiusut nalunaaquttap akunneri 40-uupput.

Kisiannili unnukkut sapaatillu akunnerisa naanerini, kiisalu piffissakilliorfiusuni sulisarnissaq naatsorsuutigineqassaaq. Tamanna pingaartumik Inatsisartut ataatsimiinnerisa nalaanni pisarpoq.

Najugaq 
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat amerlanerusut 
Atorfik pillugu annertunerusumik paasisaqarusukkuit, immikkoortortami pisortaq Aviâja Mørch Amondsen telefon nr. 345252-imut imaluunniit e-mail avma@nanoq.gl aqqutigalugu attaveqarfigisinnaavat.

Namminersorlutik Oqartussat pillugit annertunerusumik paasisaqarusukkuit, Naalakkersuisut nittartagaat www.naalakkersuisut.gl aqqutigalugu amerlanerusunik atugaqarsinnaavutit.

Qinnuteqaat 
Qinnuteqarnissamut killigitinneqarpoq ulloq 24. juni 2019.
Atorfinitsitsinissamut atatillugu oqaloqatiginninnerit ataavartumik ingerlanneqarnissaat naatsorsuutigineqarpoq.

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk