Skip to main content
89

Aningaasaqarnermut Sulisoqarnermullu Aqutsisoqarfimmi Aqutsisoqarfiup pisortaa

Aningaasaqarnermut Sulisoqarnermullu Aqutsisoqarfimmi Aqutsisoqarfiup pisortaa      
Qitiusumik suliassanut Kalaallit Nunaannut tamarmut pingaaruteqartunut siuttoorusuppit - aamma Nunap Karsiata naaatsorsuutaanut, sulisunut 6.000 missaanniittunut isumaqatigiissutissat isumaqatigiinniutigineqartarnerannut aningaasarsisitsinermullu qullersaallutit akisussaasoorusuppit, taamaassappat Aningaasaqarnermut Sulisoqarnermullu Aqutsisoqarfik pikkorissumik soqutiginnittumillu Aqutsisoqarfimmut pisortassarsiorpoq

Aningaasaqarnermut Sulisoqarnermullu Aqutsisoqarfimmi Namminersorlutik Oqartussat suliassarpassui katersorsimapput taamaammallu akisussaaffeqarfiusuni suliassaqarfippassuit suliarisarpagut, taamatuttaaq atorfinitsitsisarnerit, aningaasarsisitsineq, nunap karsiata naatsorsuutai, oqaluttaaffissat nutsigassallu, pisiortornermut tunngasut, isumaqatigiissutissat isumaqatigiinniutigisarneri Naalakkersuisullu kukkunersiuisoqarnerat.

Aningaasaqarnermut Sulisoqarnermullu Aqutsisoqarfimmut ataatsimut ilisarnaataavoq immikkoortortaqarfiugatta avammut sammisitanik suliassalik suliassaralugillu uagut akisussaaffeqarfitsinni immikkoortortaqarfinnik allanik ilitsersuineq sullissinerlu. Ingerlatsinermut aaqqissuussaavugut Kalaallit Nunaanni pisortat suliassaqarfiinut annertuumik akisussaaffeqarluta - akisussaaffillu taanna pimoorulluinnarparput. Suliassarpiatsitut isigaarput akisussaaffeqarfitsinni allaffissornikkut sulinerup pisariillisarneqarnissaa, taamaalillutik Namminersorlutik Oqartussani immikkoortortaqarfiit allat suliassarpiaminnik aamma inuiaqatigiinnut innuttaasunullu akisussaaffimminnik sammisaqarniassammata.

Taamaaliorpugut ilioriusissanut tunngatillugu siunertarisatta anguneqarnissaat siunertaralugu, taakku tassaammata: Inuiaqatigiinni nukissat Kalaallit Nunaata ineriartortinneqarneranut atugassanngortinneqassasut. Aqutsisoqarfiup pisortaatut suliassarissavat taamatut sulinermi pingaarnertut ingerlatsisuussallutit - taamatut sulinermi pisariaqarluni anguniagassanik sulissutiginnillutit aalajangersaasarnissat taamatullu allat taamaaliornissaannut kajumissaarisarnissat.

Atorfik pillugu
Suliassavit sallersaralugit ilagissavaat suliassarpassuit sulianullu tunngasorpassuit akimorlugit ataqatigiissitsisarnissat suleqatigiissitsisarnissallu suleqatigisartakkagut peqatigalugit taakkununngalu suliarisartakkavut tunngavissiorniarlugit pitsaanerulersinniarlugillu.
Taamatut sulinermi aqutsisoqarfiup naleqartitai pingasut aallaavigineqassapput:

  • Akisussaaffik - Qanoq iliuuseqarnivut, suliassavut sullitavullu eqqarsaatigalugit akisussaaffeqarpugut
  • Suleqatigiinneq - Suleqatigut sullitavullu pitsaasumik suleqatigaagut
  • Isumassuineq - Ikiuukkumatuujuvugut akunnitsinnilu paareqatigiilluta.

Immikkoortortaqaarfimmut assigiinngitsorpassuarnik akisussaaffeqarfilimmut Aqutsisoqarfup pisortaatut suliassarissavat naleqartitat aaqqissuussaanermi piujuarnissaat qulakkiissallugu.

Akisussaaffeqarfiit suliassallu
Aqutsisoqarfiup pisortaa Aningaasaqarnermut Sulisoqarnermullu Aqutsisoqarfimmi qullersaalluni akisussaasuuvoq Aningaasaqarnermut Naalakkersuisoqarfimmi Naalakkersuisoqarfiup pisortaanut toqqaannartumik attaveqartartuulluni.
Pingaarnertut suliassatit naatsumik allaaserineqarsinnaapput pingaarnertut suliassaqarfittut ukuusutut:

  • Aqutsisuusunik aqutsineq taamatuttaaq immikkoortortaqarfiit pisortaannik sisamanik aqutsisoqarfiup pisortaa peqatigalugu qullersaallutik aqutsisooqataasunik taamatullu aqutsinermut tunngatillugu sulisunut 135-t missaanniittunut akisussaaneq.
  • Immikkoortortaqarfiit assigiinngitsut akimorlugit suliffeqarfimmi suleqatigiinneq paasisimasaqarfigissallugulu qulakkiissallugulu taamatuttaaq immikkoortortaqarfinni sisamaasuni ukuusuni Aningaasaqarnermut Sulisoqarnermullu Aqutsisoqarfik, Sulisoqarnermut Immikkoortortaqarfik, Isumaqatigiinniartarnernut Immikkoortortaqarfk aamma Qitiusumik Naatsorsuuserisoqarfik taamatullu Naalakkersuisut Kukkunersiuisoqarfiat.
  • Aqutsisoqarfik ineriartortissallugu ilioriusissiorlunilu sulinerup siuariartortinnissaa qulakkiissallugu atuisut soqutigisallit allat peqataatinneqarnerat pingaartitaralugu.
  • Aningaasaqarnikkut anguniagaasut malinneqarnissaat qulakkiissallugu taamatullu aqutsisoqatigiit peqatigalugit 145 mio. kr.-nik tamakkerlugit missingersuutinut aningaasaqarnermut tunngasutigut akisussaaffigissallugu.
  • Patajaatsumik ingerlatsisoqarnissaa qulakkiissallugu taamatullu Aqutsisoqarfiup suliassaanik ingerlaavartumik pitsanngorsaassalluni Aqutsisoqarfiup ataatsimut isigalugu ineriartortinneqarnera peqatigalugu aqutsisoqarfiup suliassaanut tamatumani ilanngussuuttoqartarmat piiartoqartarlunilu.

Tamakkua saniatigut Aningaasaqarnermut Sulisoqarnermullu aqutsisoqarfiup pisortaa isumaqatigiinniartarnernut isumaqatigiissuteqartarnernullu Ataatsimiititaliamut aalajangersimasumik peqataasarpoq aamma Naalakkersuisoqarfiup pisortaqatigiivinut peqataatitaasartutut.

Misilittakkat piginnaasallu
Atorfimmi aqutsinermik suliassat pineqarput taamaammallu naatsorsuutigaarput illit piginnaasassat uku amerlanerpaartaannut ilisarsillutit sikisaqattaassasutit:

  • Aqutsinermut tunngatillugu patajaatsunik misilittagaqarputit, pisortat suliassaqarfiininngaanneersinnaasunik.
  • Pisortaavutit sallinngortaartartoq, suliassat assigiinngiiaartuunerannik suliarinnissinnaasoq.
  • Aqutsinermik misilittagaqarputit taamatuttaaq pisortanik aqutsinermik aamma missingersuutinik aningaasaqarnermillu aqutsinermik.
  • Akisussaaffeqarfinni assigiinngitsuni sukkasuumik paasinnilersitsisinnaassuseqarputit ilioriusissanullu tunngatillugu paasisimasaqarlutit.
  • Suliffeqarfimmi allanilu kaammattuisinnaassuseqarputit attaveqaqatigiissinnaassuseqarlutillu.
  • Aaqqissuussaanermi ersarissunik sulianut killissalersugaalluni pingaarnertut suliassalimmi aalajaallutit aqutsisuunissamut piginnaaneqarputit piumassuseqarlutillu.
  • Aaqqissuussaalluni suliassaqarfik pitsanngorsaajuarnertigut allanngortiteriuarnertigullu isumannaatsumik ingerlanissaanut aqutarisinnaavat.
  • Sulianut tunngasut soqutigisallu akimorlugit suliamik ilisimasaqarluni attaveqarneq pilersissallugu ingerlaavartissallugulu pikkoriffigaat.
  • Pissutsini soqutigisanik akerleriiffiusuni sumiissusersiornissaq paasisimasaqarfigaat peqataasullu tamarmik naammagisimaagarinngisaannik aalajangiisinnaallutit.
  • Politikikkut aqutaalluni aaqqissugaanermi sulinermik misilittagaqarputit.
  • Kalaallit Nunaanni inuiaqatigiit, kalaallit kulturiat kiisalu kalaallisut oqaatsit ilisimasaqarfigilluarpatit.


Atorfik pillugu paasissutissat naalakkersuisoqarfimmi pisortaq Nikolai S. Christensen saaffiginniffigalugu pissarsiarineqarsinnaapput, uunga: telefon +299 346675, mail nsch@nanoq.gl.
 
Qinnuteqaat ilinniarsimanermik siusinnerusukkullu suliffigisimasamik paasissutissartalik, soraarummeersimanermut uppernarsaatit assilinerannik oqaaseqaatinillu il.il. ilanngussartalik,kingusinnerpaamik 24.11.2019 naalakkersuisoqarfimmiit tiguneqareersimassaaq. Kinguninnguatigut suliffissarsiortunik oqaloqatiginnittoqarumaarpoq.

Isumaqatigiissuteqarnikkut atorfinittoqassaaq

Atorfinitsinneqartussatut toqqarneqarsinnaasut, oqaloqatigineqartussatut toqqarneqartut misilittarneqartussaassapput.

 

Akissarsiat atorfeqartitaanermilu atugassarititaasut:
Akissarsiatigut aamma atorfeqartitaanermi atugassarititaasut, taakkununnga ilanngullugit atorfinikkiartorluni soraarlunilu angalasinnaatitaanermut aamma pequtit nuunneqarsinnaanerat akiliunneqartarneq, Namminersorlutik Oqartussat aamma pineqartup kattuffiata isumaqatiginninniarsinnaatitaasup akornanni atorfinitsitaanermi piffissami atuuttumi isumaqatigiissutaasa/sulisunut isumaqatigiissutaat naapertorlugit ingerlanneqartarput.


Atorfik akissaateqarfimmi Lønramme 39/40-mi maanna inissisimavoq. Aningaasarsiat aalajangersimasunik aningaasarsianut ilallit LR 39-mi 1. april 2018-imiit qaammammut 64.245 kr.-nik ukiumullu 770.944 kr.-nik amerlassuseqarput. Aallaaviatigut isumaqatigiissutini atugassarititaasut malillugit atorfinitsitsisoqassaaq. Qinnuteqartoq tjenestemanditut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.  Atorfik ukiuni aalajangersimasuni atorfigineqartussatut inuttalerniarneqarpoq, tamannalu pissutigalugu qulaani pineqartut saniatigut tapisiaqartinneqassaaq. Ukiunut aalajangersimasunut nalinginnaasumik tapisiaqartitsisoqartarpoq ukiuni 3-6-ini. Ukiunut aalajangersimasunut tapisiat tassani uku 10.016 kr. amma 13.116 kr. akornanni allanngorarput.
 
 
Naalagaaffimmi tjenestemandit aamma AC-mi isumaqatigiissutit arlallit, ilaatigut DJØF-ip Finansministeeriaqarfiullu akornanni isumaqatigiissutit malillugit sulisut Namminersorlutik Oqartussani atorfinitsinneqarnerminnut atatillugu aningaasarsiaqaratik sulinngiffeqarsinnaatitaapput.  Aammattaaq Nunamullu namminermut Ministeeriaqarfiup Kalaallit Nunaanni Namminersorlutik Oqartussani atorfinitsitaanerminnut atatillugu akissarsiaqaratik sulinngiffeqarallarnissamik qinnuteqaateqartunut akuersaartumik pissusilersortoqassasoq kommuninut nunallu immikkoortortaanut inassutigisimavaa.  Sulinngiffeqarallarnissaq pillugu aalajangersakkat Kalaallit Nunaanni Namminersorlutik Oqartussani inuit atorfinitsinneqartut uiinut nuliaannut/ aappaannut aamma atuupput.
 
Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat. Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.
 
Atorfimmut atatillugu pisatsersugaanngitsumik inissaqartitsisoqarsinnaavoq. Malittarisassat atuuttut naapertorlugit inigisamut qularnaveeqqummullu akiliisoqartassaaq. Inissiap pisoqaassusaa, kikkut piginnittuunersut il.il. apeqqutaallutik inissiamut akiliut pitsaassuserlu assigiinngissinnaapput. Aalajangersimasumik najugassaqalernissamut innersuunneqarnissamut utaqqineq sivisusinnaavoq, taamaammallu utaqqiisaasumik inimik tunineqarneq pisinnaavoq. Atorfimmut atatillugu ini atorfeqarnermut tungavoq atorfeqarnerullu unitsinnerani qimanneqassalluni.
Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq


Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk