Skip to main content
114

Dette jobopslag er udløbet

Aningaasaqarnermut Nunamullu Namminermut Naalakkersuisoqarfik sulisussarsiorpoq AC-fuldmægtigimik nuna tamakkerlugu pilersaarusiornermik iliuusissallu SDG 2030-p piujuartitsinermik tunngaveqarluni ineriartortitsinneqarneranik atuutsinneqalerneranillu suli

Aningaasaqarnermut Nunamullu Namminermut Naalakkersuisoqarfik sulisussarsiorpoq AC-fuldmægtigimik nuna tamakkerlugu pilersaarusiornermik iliuusissallu SDG 2030-p piujuartitsinermik tunngaveqarluni ineriartortitsinneqarneranik atuutsinneqalerneranillu sulianik ataqatigiissaarinermik suliaqartussamik

Piujuartitsineq pilersaarusiornerlu soqutigisaraagit? Nuna tamakkerlugu pilersaarusiortutut imminut takorloorsinnaavit ilaatigullu piujuartitsinermik tunngaveqarluni ineriartortitsinermut pilersaarummik nutaamik ineriartortitsineq, nunarsuarmi anguniakkat pillugit ingerlateqqinneqartussanik attaveqatigiinnermilu atortunik ineriartortitsineq, nuna tamakkerlugu immikkoortumut pilersaarutinik kommuninilu pilersaarusiornermik ataqatigiissaarineq aqqutigalugit Namminersorlutik Oqartussani piujuartitsinermik tunngaveqarluni ingerlatseqataasinnaallutillu ataqatigiissaareqataasinnaavit?
Nuna tamakkerlugu Pilersaarusiortarnermut Immikkoortortaqarfik nuna tamakkerlugu pilersaarusiornermi suliassaqarfimmut AC-fuldmægtigimik sulisussarsiorpoq 1. september 2021-mi erseqqinnerusumilluunniit isumaqatigiissuteqarnikkut atorfinittussamik.
Nuna tamakkerlugu pilersaarusiorneq assigiinngisitaartuuvoq - piujuartitsinermik iliuusissaq SDG 2030-mi pingaarnertut ineriartortitsinermit, nuna tamakkerlugu pilersaarusiornermut aamma nuna tamakkerlugu immikkoortumut pilersaarutinik ataqatigiissaarinermut, naammagittaalliuutinik suliarinnermut kiisalu tusarniaanermi akissutinut kommunit pilersaarusiorfigineqarnerannut tapiliussat nutaanut tunngalluni. Nuna tamakkerlugu pilersaarusiornermut Immikkoortortaqarfiup aamma nunap assiliorneq nunallu assiliortiternertigut paasissutissat akisussaaffigai, teknologiilu nutaaq digitaliusumik aaqqiissutissatut atorluarniarsaralugu, taanna Nunamut Tamarmut Geodatanut periusissiaq 2018 – 2021-mut tunngavissat ataanni sulianik ingerlatsinermut nunalu tamakkerlugu pilersaarusiornermik ataqatigiissaaritinneqarluni.    

Atorfik pillugu
Nuna tamakkerlugu Pilersaarusiortarnermut Immikkoortortaqarfik Aningaasaqarnermut Nunamullu Namminermut Naalakkersuisoqarfiup ataani immikkoortut pingasuusuni ilaavoq. Naalakkersuisoqarfimmi sulisut 40-t missaanniipput. Naalakkersuisoqarfiup ataani aqutsisoqarfiit marluk atapput: Akileraartarnermut Aqutsisoqarfik aamma Aningaasaqarnermut Sulisoqarnermullu Aqutsisoqarfik. Taakkua saniatigut Naatsorsueqqissaartarfik ASIAQ-llu naalakkersuisoqarfiup ataani immikkoortortaapput.
Immikkoortoqarfiuvugut anginngitsoq – maanna qanimut suleqatigiittunik suliassanillu assigiinngitsorpassuarnik ingerlataqartunik sisamanik sulisoqarluta.
Nuna tamakkerlugu pilersaarusiorneq suliassaqarfiit akimorlugit ataqatigiissaarinissaq tunngavoq aamma suliassaqarfiit naalakkersuinikkut – nuna nunarsuarlu tamakkerlugu - pingaartinneqarluni soqutigisaqaqatigiinnullu amerlasuunik attuumassuteqarpoq. Nuna tamakkerlugu pilersaarusiornerup geodatallu aaqqissuussinernik ineriartortitsinermi qanoq ataatsimuulersitseqataanerat nunatsinnilu inuiaqatigiinni tunngavissanik pitsaasunik isumannaareqataanerat Nuna tamakkerlugu Pilersaarusiortarnermut Immikkoortortaqarfiup immikkut aallutarai. Immikkoortoqarfiup attaveqatigiiffiit angisuut marluk akisussaaffigai: Nuna tamakkerlugu geodatanut isertarfik  www.nunagis.gl aamma nuna tamakkerlugu pisortatigoortumik nunarsuaq tamakkerlugu anguniakkanut oqallittarfik www.anguniakkavut.gl  
Immikkoortortami suleqatissarsiorpugut suliniutinik aqutsinermik, suliniutinik ataqatigiissaarinermik attaveqatigiissitsinermilu misilittagalimmik aamma naalakkersuisoqarfiit kommunillu akimorlugit aqutsisinnaasumik, misissueqqissaarsinnaasumik ingerlatanillu katersuisinnaasumik.
Suliassanut aalajangersimasunut atatillugu illit inuuninnit eqqaasassat apeqqutaassapput aammalu immikkoortoqarfiup suliassaqarfiinik allanik isumagisaqarnissaq atorfinitsinneqarnermi isumaqatigiissutigineqarsinnaavoq.

Illit pillutit
Naleqquttumik ingerlaqqiffiusumik ilinniagaqartuuvutit, suliniutinillu aqutsinermik misilittagaqarlutit.
Namminersorlutik Oqartussani naalakkersuinikkut allaffissornikkullu aalajangeeriaatsinik misilittagaqarlutillu ilisimasaqassaatit.
Iliuusissamik SDG 2030-mik nunalu tamakkerlugu pilersaarusiornermik suliaqarneq misilittagaqarfigissavatit.
Misissueqqissaarsinnaassaatit aamma malinnaasinnaassuseqarlutillu suliassat assigiinngitsorpassuit ataatsikkut ingerlassinnaallugit.
Allatanik oqaatsitigullu ingerlatitseqqissinnaassuseqarluassaatit aamma paasissutissanik pissarsiariuminaatsunik pisariitsumik paasiuminartumillu ingerlatitseqqissinnaassallutit.
Suliat sunniuteqarluartumik aaqqinnissaat eqqarsaatigalugu suliffiup iluani avataanilu ingerlataqartunik peqataatitsisinnaassuseqassaatit suleqatigisanullu pitsaasunik ingerlatsisarlutit.
Suliniutinik anginerusunik aqutsisinnaassuseqassaatit, ataqatigiissaarisinnaassuseqarputit sunniuteqartumillu naammassineqarnissaannut ikiuussinnaassuseqarlutit.
Sullissisinnaassuseqassaatit aamma ataatsimiittoqarneranut, isumasioqatigiittoqarneranut assigisaanullu atatillugu pilersaarusiorsinnaavutit suliassanillu ingerlatsisinnaallutit.
Suleqatikkuminassaatit Nuna tamakkerlugu Pilersaarusiortarnermut Immikkoortortaqarfimmi suleqatigiinni pioreersuni eqeersimaartumik peqataarusussuseqartoq.
Marlunnik oqaaseqarneq iluaqutaassaaq.

Neqeroorutigaarput:
Naalakkersuisoqarfimmi naalakkersuinikkut aalajangiinernut suliffik qanittoq.
Suliffimmi avatangiisit ammasut suleqatillu tunniusimasut persuarsiunngitsumik oqaloqatigiissinnaasut.
Inuttut suliatigullu unammilligassat pissanganartut kiisalu ilinniaqqinnissamut periarfissaqarneq.
Naalakkersuisoqarfik piffissat ilaanni ulapiffiusumi isumagissaarfiuvoq, aammali sulinerup ilaqutariinnerullu ataqatigiinnissaat ataqqineqarluni.
Atorfik AC-fuldmægtigitut/immikkut siunnersortitut inuttassarsiorneqarpoq. Namminersorlutik Oqartussat pineqartullu kattuffiata isumaqatiginninniarsinnaatitaasup akornanni isumaqatigiissutit atuuttut naapertorlugit atorfinitsitsisoqassaaq.
Piukkunnaatilimmik eqqortumillu ukiut arlalinni misilittagaqartumut atatillugu aalajangersimasumik naliliineq malillugu immikkut siunnersortitut atugassarititaasut malillugit atorfinitsitsisoqarsinnaassaaq. 
Ulloq 1. november 2021-mi imaluunniit isumaqatigiissuteqarneq malillugu piaartumik atorfinittoqassaaq.

Paasissutissat annertunerusut
Atorfik pillugu annertunerusumik paasisaqarusukkuit Immikkoortoqarfimmi pisortamut Thomas Gaarde Madsenimut, oqarasuaat 588159 imaluunniit e-mail: thga@nanoq.gl-imut saaffiginnissinnaavutit.

Qinnuteqarnissamut killissarititaq
Qinnuteqarnissamut killissarititaavoq 20. august 2021. Atorfinitsitsinissaq pillugu oqaloqatigiinnerit piffissap qinnuteqarnissamut killissaritinneqartup kingorna ingerlaannaq ingerlanneqassapput.

Akissarsiat atorfinitsinneqarnermilu atugassarititaasut
Akissarsiat- aamma atorfinitsitsinermi atugassarititanut aamma ilaapput sulilernermi aamma suliunnaarnermi angalaneq aamma pigisanik nassiussineq, atorfininnermi Namminersorlutik Oqartussat aamma atorfigisimasap akornanni isumaqatigiissutit atuuttut naapertorlugit.

Ineqarneq
Atorfinitsitsinermi inissaq neqeroorutaanngilaq. Taamaattoq atorfinittoq Namminersorlutik Oqartussanit sulinermut atatillugu inigisamik attartortuuppat, isumaqatigiissut atuutiinnarneqassaaq. Sulinermi inigisaq atorfinitsitsinermut atassuteqarmat, suliunnaarnermi inigisaq qimanneqassaaq.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut ”QINNUTEQAAT NASSIUGUK” toorlugu nassiukkit.
E-mailikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk