Skip to main content
97

Dette jobopslag er udløbet

Aningaasaqarnermut Naalakkersuisoqarfik ataatsimik marlunnilluunniit AC-fuldmægtiginik/Immikkut Siunnersortinik Nuna Tamakkerlugu Pilersaarusiornermi Immikkoortortaqarfimmut atorfinittussarsiorpoq

Pilersaarusiornermik aamma nunaminertanik pisortatigoortumik nakkutiginninnermik soqutigisaqarpit? Nunalu tamakkerlugu pilersaarusiortutut nakkutilliinermilu
atorfeqalernissaq ataavartussanillu inerititseqataarusuppit? Nunalu tamakkerlugu piffinni assigiinngitsuni pilersaarusiornernut aamma Kalaallit Nunaanni kommunit tallimani suliat inatsisitigut sinaakkusiorneranni  ataqatigiissaarerusuppit?

Nuna tamakkerlugu pilersaarusiornermi Immikkoortortaqarfik AC-fuldmægtiginik  ataatsimik marlunniluunniit 1. december 2020-mi imaluunniit immikkut isumaqatigiissuteqarnikkut  atorfinittussanik pissarsiorpoq.
        
Nuna tamakkerlugu pilersaarusiorneq siammasissuuvoq - pingaarnermik ataavartunik inerititsinernit (SDG 2030 Agendaen) nunaminertanik pilersaarusiornernut aamma nuna tamakkerlugu immikkoortuni pilersaarusiornernut, maalaarutinik suliaqarnernut aamma kommunini pilersaarusiornerit nutaanik tusarniaanernut. Teknologi ineriartortillugu nunap sannai pillugit paasissutissat digitalimik suliarineqarsinnaalerput, tamannalu suliamut aamma nunaminertanik pilersaarusiornermut attuumassuteqarluni (Nunamut Tamarmut Geodatanut periusissiaq 2018-2021, NunaGis-ip suliaa, tunngaviusumik kisitsisitigut paasissutissat, satellitsit iluaqutigalugit nalunaarsuisinnaaneq il.il tak.)               

Atorfik pillugu ilisimasassat
Nuna Tamakkerlugu Pilersaarusiornermi Immikkoortortaqarfik Aningaasaqarnermi Naalakkersuisoqarfimmi immikkoortortaqarfiit tallimat ilagaat. Naalakkersuisoqarfimmi sulisut 30-i missaaniipput. Naalakkersuisoqarfiup ataani aqutsisoqarfiit marluk inissisimapput: Akileraartarnermi Aqutsisoqarfik aamma Aningaasaqarnermut Sulisoqarnermullu Aqutsisoqarfik. Taakkua saniatigut
Naatsorsueqqissaartarfik aamma Asiaq Naalakkersuisoqarfiup suliaqarfiani inissisimapput.
   
Immikkoortortaqarfik anginngitsumi, atorfillit pingasuuvugut qanimullu suleqatigiilluta aamma suliassavut siammasissuupput.

Nuna tamakkerlugu pilersaarusiornermi aamma nunap sannai pillugit paasissutissanut tunngasuni nuna tamakkerlugu aamma nunat assigiinngitsut akornanni suliassaqarfiuvoq politikimi pingaartinneqartoq soqutigisaqaqatigiit amerlasuunik pisinnaatitalik. Nuna tamakkerlugu pilersaarusiornermi immikkoortortaqarfiup nunaminertanik pilersaarusiorneq aamma nunap sannai pillugit paasissutissat qanoq ataatsimoortitsisinnaanersut, akimut ataqatigiissaarisinnaanersut kiisalu Kalaallit Nunaanni inuiaqatigiinnik ineriartortitsinermut sinaakkusiisinnaanersut immikkut ukkatarivaa.

Taamaammat immikkoortortaqarfitsinni suleqatissarsiorpugut suliniutinik aqutsisinnaasumik aaqqissuussisinnaasumillu, aamma naalakkersuisoqarfiit kommunillu suliassaqarfii akimorlugit ataqatigiissaarisinnaasumik misissueqqissaarsinnaasumillu, kiisalu ulluinnarni sullissisarneq aamma ingerlatsineq isumagisinnaallugit. Taakku saniatigut suliassanik inatsisitigut immikkut piumasaqarfiusunik, Geodatami GIS-imilu ilisimasaqassaatit, kiisalu statistikit uuttuutillu naapertorlugit suliamik ingerlatitseqqissinnaassaatit.

Suliassavit suuneri ilinniarsimanerit naapertorlugu aalajangerneqarumaarput, immikkoortunilu allani suliarisartagassatit atorfininninni isumaqatigiissutaasinnaapput. 

Ilinnut tunngasut
Naleqquttumik  ilinniagaqarsimassaatit, saniatigut suliniutinut aqutsisutut ilinniagaqaruit iluaqutaassaaq.

Namminersorlutik Oqartussani naalakkersuinikkut allaffissornikkullu aalajangersaasarnerni
periutsit ilisimasaqarfigissavatit.

Aaqqissuussillaqqissaatit, misissueqqissaarsinnaassaatit, ulapiffimmi tamakkiisumik isiginnissinnaassaatit kiisalu suliassat amerlasuut ataatsikkut ukkatarisinnaallugit.

Oqaluttariarsornikkut allattariarsornikkullu attaveqaqatigiilluarsinnaanissaatit aamma saqqummiussassat paasiuminaatsut paasinartumik saqqummiussinnaassavatit.

Suliami iluanit avataaniillu suleqataasut pitsaasumik angusaqarnissamut suleqataatissinnaassavatit aamma suleqatigiinnermut pitsanngorsaasinnaallutit.

Aqutsisinnaassaatillu ataqatigiissaarisinnaassaatit suliallu angisuut ajornaatsumik naammassinissaat
piginnaaneqarfigissavatit.

Suliumassuseqassaatit, sullisserusullutit aamma ataatsimiinnernut, isumasioqatigiinnernut il.il. tunngatillugu sulianut aaqqissuussisinnaassaatit.   
  
Neqeroorutigaavut:
Naalakkersuisoqarfimi naalakkersuinikkut aalajangiinermi qanittumut atorfeqarneq.

Suliffik ammasoq suleqatillu tunniusimasut, suleqatigiinnerlu pingaakujuffiunngitsoq. 

Sulinermi inuttullu unammilligassat pissanganartut aamma ilinniaqqissinnaaneq periarfissaassapput.

Naalakkersuisoqarfimmi avatangiiseq qanilaarfiusoq ulapiffiusartorlu malugissavat, kisianni aamma suliffiup angerlasimaffiullu ataqatigiinneranik ataqqinnittoq.

Atorfik AC-fuldmægtigitut/immikkut siunnersortitut allanneqassavoq. Atorfininneq Namminersorlutik Oqartussat kattuffiullu isumaqatiginninniartitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassavoq.
 
Atorfinittussaq piukkunnarnerpaaq ukiullu arlalinnik misilittagalik, nalileereernerup kingorna, immikkut siunnersortitut atugassarititaasut naapertorlugit atorfinissinnaavoq.

Atorfinitsitsineq 1. januar 2020-p kingorna imaluunniit isumaqatigiissuteqarnikkut pissaaq.

Paasissutissat allat
Atorfik pillugu paasisaqarnerorusukkuit Immikkoortortami Pisortaq Thomas Gaarde Madsen oqarasuaatikkut +299 588159 imaluunniit e-maili thga@nanoq.gl aqqutigalugu saaffigisinnaavat.

Qinnuteqarnissamut piffissarititaasoq
2. november 2020 qinnuteqarnissamut killigititaavoq. Naatsorsuutigineqarpoq atorfininnginnermi oqaloqatiginnerit kingusinnerpaamik qinnuteqarfissap qaangiunnerata kinguninngua ingerlanneqassasut.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk