Skip to main content
106

Dette jobopslag er udløbet

Aningaasaqarnermut Naalakkersuisoqarfik, Aningaasaqarnermut Aqutsisoqarfik Akileraartarnermullu Aqutsisoqarfik inatsisilerisussarsiorput

Aningaasaqarnermut Naalakkersuisoqarfimmi tassungalu atasuni aqutsisoqarfinni aqutsisut allat peqatigalugit inatsisilerinermik sulinermut pingaaruteqarlutit ilaarusuppit?

Sulineq pissanganartuuvoq assigiinngitsorpassuarnik suliassaqarfiugami periarfissarpassuaqarlunilu suliamut tunngasutigut ineriartornissamut. Piumassuseqarfigigaanni suliassat pissanganartut -sunniuteqarfigineqarsinnaapput akisussaaffigineqalersinnaallutillu. Durita (Aningaasaqarnermut Sulisoqarnermullu Aqutsisoqarfik)


Suliffik Kalaallit Nunaanni inuiaqatigiit aningaasaqarnerannut sunniuteqarfigisinnaallugu misigiffigisinnaasannut soqutiginnippit sulininnilu suliassanik pingaarutilinnik soqutiginaatilinnillu naammassinnittarnermut peqataarusullutit? Taava maannakkorpiaq Aningaasaqarnermut Naalakkersuisoqarfimmi taamatullu Akileraartarnermut Aqutsisoqarfimmi aamma Aningaasaqarnermut Sulisoqarnermullu Aqutsisoqarfimmi naalakkersuisoqarfiup akisussaalluni suliassaqarfiiniittunut inatsisilerituunik pingasunik-tallimanik pissarsiorpugut.
Suliassat assigiinngisitaartut suliatigullu ineriartornissamik periarfissat neqeroorutigaavut.


Illit inuttut piginnaasatit

Inatsisilerituussarsiorpugut suliamut tunngatillugu soqutiginnittunik taamatullu suliassaqarfinnut nutaanut paasinnissallutik piginnaanilinnik piumassusilinnillu, nutaanik suliaqalersinnaasunik piumassuseqarlutik sapiissuseqarlutillu. Peqatigitillugu pissarsiariniarpagut suliamut tunngatillugu isumannaatsumik sulinissaminnut tulluusimaarutiginnittut aaqqissuussamillu suliassaminnut pulasinnaasut. Suliassat ilaannikkooriarlutik suliniutinut suleqatigisanullu peqatigitillugit assigiinngiiaarsinnaasut. Taamaammat illit inuttut suleqatiginnillaqqissuussaatit ilisimaaralugu pisortat ingerlatsinerat pingaartumik suleqatigiit sulinerimmassuk, assigiinngissutit akimorlugit sulianut inunnullu tunngasut pingaartillugit suleqatigiittoqarluni.

Suliamut tunngatillugu piginnaasassatit

  • Cand. jur.-itut ilinniarsimasuussaatit cand.merc.jur.-itulluunniit ilinniarsimasuussaatit. qaffasissumillu inatsisilerinermut tunngatillugu sulianik ilisimannittuullutit.
  • Ukiorpaalunni ajornanngippat misilittagaqartuuvutit, kisiannili aamma ilinniarnerminnit naammasseqqammersut aamma eqqarsaatigineqarsinnaapput.
  • Suliassaqarfinnik suliarisartakkatsinnik ilisimasaqallaqqunarputit kisiannili pitsaasumik ilinniartitsinissaq tapersersoqatigiinnissarlu qulakkeersinnaagatsigit tamanna pinngitsuugassaanngitsutut piumasaqaataanngilaq.
  • Pisortat ingerlatsiviini sulinermik aaqqissuussaanermilu naalakkersuinikkut aqutaasumi sulinermik misilittagaqallaqqunarputit.
  • Oqallorissuullutillu allallaqqissuuvutit.
  • Allakkanik paasiniaallaqqissuuvutit ajornanngippallu kisitsisinik paasinnillaqqissuullutit.
  • Kalaallisut danskisut tuluttullu oqalussinnaallutillu allassinnaaguit iluaqutaassaaq.
  • Kalaallit kulturiannut aamma inuiaqatigiinnut kalaallinut ilisimasaqaruit iluaqutaassaaq.


Immikkoortortaqarfiit
Immikkoortortaqarfinnut ukununnga inatsisilerituussarsiorpugut:
 

  • Aningaasaqarnermut Naalakkersuisoqarfik, Inatsisilerinermut Immikkoortortaqarfik: tassani pingaarnertut suliassaapput suleqatinut pisortanullu isummersueqatigiittarneq, inatsisaareersunik malittarisassaareersunillu aningaasaqarnermullu tunngatillugu iluarsaaqqinnernik, ilaatigut akileraarutit akitsuutillu pillugit, nutaanillu suliaqartarneq iluarsaassisarnerlu peqataaffigalugit, inatsisinik malittarisassanillu nassuiaasarneq taamatullu tamakku tunngavigalugit ilitsersuusiornermut peqataasarneq. Naalakkersuinikkut aqutsisuusunut qanittuussaatit ministerillu suliassaqarfiini sulinermut sulianut tunngatillugu ikiuuttassallutit.

 

  • Aningaasaqarnermut Sulisoqarnermullu Aqutsisoqarfik, Pisiortortarnermut Allaffik: tassani ilaatigut suliariumannittussarsiuussisarnermut, pisiortortarnermut, assigiinngitsunik suleqateqartarnermut ataqatigiissaarisarnermullu pisiniarfigisartakkanut isumaqatigiinniartarnernut, isumaqatigiissuteqartarnermut taakkuninngalu aqutsinermut, assigiinngitsunik suleqateqarnermut ataqatigiissaarinermullu, suliariumannittussarsiussinernut isumaqatigiissuteqartarnernullu atatillugu Namminersorlutik Oqartussani immikkoortortaqarfinnut nalinginnaasumik ilitsersuisarnermut siunnersuisarnermullu tunngatillugu suliassaqarsinnaasassaatit.

 

  • Akileraartarnermut Aqutsisoqarfik, Aqutsisoqatigiit: tassani ilaatigut suleqatinnik aqutsisunillu inatsisilerinikkut ilitsersuinermut ikiuuttassaatit inatsisinik malittarisassanillu suliaqarnermut iluarsaaqqinnermut nassuiaanernullu peqataasassallutit taakkulu tunngavigalugit ilaatigut akileraaruserinermi akitsuuserinermilu inatsisini, akiliisitsiniartarnermi, pisortat ingerlatsinerannut inatsisini  nalinginnaasumik suliffeqarfimmi  ilitsersuinermut ikiuuttassallutit suliaqartassallutillu.


Immikkoortortaqarfiit pingasuullutik Namminersorlutik Oqartussanut inuiaqatigiinnullu ataatsimut isigalugit suliassat pingaarutillit suliarisarpaat tapersersugarisarlugillu. Atorfiit assigiissutigaat sunniuteqaqataasinnaaneq, akisussaaqataaneq suliassallu tamatigoortut taamatullu suleqatigiilluarneq isummersoqatigiissinnaanerlu neqeroorutaammata.

Atorfinni tamani suliassavit ilagisartussaassavaat allakkianik, tusarniaanermut akissutinik, Naalakkersuisut Inatsisartullu atortussaannik allanillu suliaqarnermut ikiuuttarneq. Taamatuttaaq naalakkersuisoqarfimmi pilersaarutinut assigiinngitsunut, nunani allani oqartussaasut qitiusumillu allaffeqarfiit assigiinngitsut peqatigalugit peqataasartussaassaatit. Atorfinniipputtaaq annerusumik minnerusumilluunniit sulianik aalajangersimasunik suliarinnittarnerit.

Immikkoortortaqarfik sorleq pingaartumik soqutiginerunerlugu qinnuteqaammi ilannguguk. Periarfissaqarluinnarpoq immikkoortortaqarfinni arlalinnik soqutigisaqarnissaq - namminermi taamaappugut.

Oqaloqatiginnikkiartoqquneqassaguit qinnuteqaateqarnermilu ingerlaqqissaguit pineqaatissinneqarsimannginnermik uppernarsaativit assilineqarneranik piumaffigineqarumaarputit. Pineqaatissinneqarsimannginnermik uppernarsaateqarnissat saneqqunneqarsinnaanngitsumik piumasaqaataavoq.


Akissarsiat atorfinitsitaanerlu
Atorfininneq imaluunniit piffissami aaliangersimasumi atorfinitsitsineq periarfissaajumaarpoq.
Qinnuteqaateqartunut eqqortunik uppernarsarneqarsinnaasunik piginnaanilinnut pisariaqartinneqartutullu misilittagalinnut immikkut siunnersortitut atorfinitsitaanissamut periarfissaqarpoq.
Sulisunut inissiaq periarfissaasinnaavoq atorfinitsitsiartornerullu ingerlanerani erseqqinnerusumik paasinarsissalluni

Akileraartarnermut Aqutsisoqarfimmi atorfimmut tunngatillugu apeqquteqarniartunut attaveqarfigineqarsinnaavoq Allaffiup pisortaa Rannvá Clementsen, Oqarasuaat (+ 299) 346579

Pisiortortarnermut allaffimmi atorfimmut tunngatillugu apeqquteqarniartunut attaveqarfigineqarsinnaavoq Inatsisileritooq Christian Ruiz Witting Christensen, oqarasuaat (+299) 34 51 55

Aningaasaqarnermut Naalakkersuisoqarfimmi atorfimmut tunngatillugu apeqquteqarniartunut attaveqarfigineqarsinnaavoq AC-fuldmægtig Inatsisilerinermut immikkoortortaqarfimmi Pernille Larsen, oqarasuaat (+299) 346574

Kalaallit Nunaanni najugaqarnissaq pillugu apeqqummi oqarasuaatikkut saaffiginnittoqarsinnaavoq uunga Immikkoortortaqarfiup pisortaa Preben Rasmussen oqarasuaat (+299) 345112.

 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk