Skip to main content
100

Aningaasaqarnermut Naalakkersuisoqarfik aningaasanut inatsimmut skabeloninik suliaqartussamik ilinniartutut ikiuuttussamik pikkorissumik tunniusimasumillu sulisussarsiorpoq

Namminersorlutik Oqartussani aningaasaqarnikkut periutsimik nutaamik atuutsitsisoqalerpoq, tamannalu pissutigalugu 2021-mut aningaasanut inatsit periutsimi nutaami suliarineqassalluni. Taamaattumillu aningaasanut inatsimmi skabeloninik suliaqartussamik ilinniartutut ikiuuttussaq ujartorneqarpoq. Taamaattumillu ilinniartutut ikiuuttutut pisortani aningaasaqarnikkut ataatsimut periuseq nutaaq kiisalu Namminersorlutik Oqartussani qanoq aningaasanut inatsimmik suliaqartoqartarnersoq iserfigissavatit

Illit pillutit

  1. Ingerlaqqiffiusumik ilinniartitaanermi ilinniartuuvutit, kissaatiginarluni aningaasaqarnermik inuiaqatigiinnilu pissutsinik pingaarnertut sammisaqarlutit
  2. Excel piginnaaneqarfigilluarpat
  3. Word piginnaaneqarfigilluarpat
  4. Pisortani aningaasaqarnikkut ataatsimut periutsip nutaap atuutsinneqalernissaa atorneqalernissaalu pillugit ilikkagaqarnissamik soqutigisaqartuuvutit

Suliassat
Aningaasanut inatsit aningaasaqarnikkut periutsimi nutaami skabelonit aallaavigalugit ineriartortinneqassaaq, tamatumani ilaallutik wordimik allatat, Exelimit aammalu periutsimit Dymics AX-imit takussutissiat ilanngussorneqarnissaat. Pingaarnertut suliassat tassaassaaq aningaasanut inatsimmi skabelonit Microsoft Word atorlugu suliat Exel aqqutigalugu Dynamics AX-imut nussornissaat. Taamaattumillu Microsoft Officemik annertuumik ilisimasaqarnissaq piumasaqaataavoq. Suliat ingerlanneranni pisortat aningaasaqarnikkut periusiannik nutaamik Namminersorlutik Oqartussanit kommuninillu atorneqartumik annertuumik ilisimasaqalissaatit.

Uagut pilluta
Aningaasaqarnermut Naalakkersuisoqarfik Naalakkersuisut ataanni qitiusumik allaffeqarfiup ilagaa. Suliarput pingaarneq tassaavoq naalakkersuinikkut aningaasaqarneq. Naalakkersuisoqarfimmi sulisut maanna 30-t missaanniipput immikkoortoqarfinnut arlalinnut agguataarneqartut, taakku aningaasaqarnermik, inatsisilerinermik nunalu tamakkerlugu pilersaarusiornermik suliaqarlutik. Naalakkersuisoqarfimmut atatinneqarput Akileraartarnermut Aqutsisoqarfik, Aningaasaqarnermut Sulisoqarnermullu Aqutsisoqarfik kiisalu Naatsorsueqqissaartarfik.
 
Pingaarnertut suliassarput tassaavoq Aningaasaqarnermut Nunanilu Avannarlerni Suleqatigiinnermut Naalakkersuisumik sullissinissaq siunnersuinissarlu, aningaasaliissutinut akileraartarnermullu inatsisinik suliaqarneq, nakkutilliinermi misissueqqissarnermi suliassat, aningaasaqarnikkut nunalu tamakkerlugu pilersaarusiornikkut suliassat kiisalu aningaasaqarnikkut iluarsartuusseqqinnerit.
Aningaasaqarnikkut naalakkersuinermi suliassat ataqatigiissaartarpagut. Tamatuma nassatarisaanik ukiumoortumik aningaasanut inatsisissanik suliaqartarlutalu aqutsisarpugut. Tassunga ilaapput tunngaviusumik missingersuutinik suliaqarneq, missingersuutit pillugit isumasioqatigiissitsineq, aningaasanut inatsisissaq pillugu isumasioqatigiinnernik ingerlatsineq, aningaasanut inatsisissatut siunnersuutinik suliaqarneq il.il. Tamatuma saniatigut ukiumoortumik ataatsimoortumik tapiissutit nunatsinni kommuninut isumaqatigiinniutigineqarnissaat isumagisarparput.
Taamaattumik naalakkersuinikkut aalajangiisartut qanimut suleqatigalugit suliffissaq neqeroorutigaarput. Sulinitsinni avatangiisigut persuarsiorfiunngillat ammasuullutillu, suliassaqarfiit akimorlugit suleqatigiittarpugut, aalajangiisartut qanimut suleqatigaagut suleqatigullu tunniusimalluartuullutik. Suliffitsinni piginnaasatigut ineriartornissamut periarfissaqarluarpoq aammalu naalakkersuisoqarfiit aqutsisoqarfiillu akimorlugit suleqatigiilluta. 

Akissarsiat atorfinitsinneqarnermilu atugassarititat
Paasissutissat annertunerusut
Atorfik pillugu annertunerusumik paasisaqarusukkuit saaffigisinnaavat immikkoortortami pisortaq Anders Fonnesbech-Wulff, tlf. +299 346731imaluunniit e-mail afw@nanoq.gl.
Namminersorlutik Oqartussat annertunerusumik paasisaqarfigerusukkukkit takuuk www.naalakkersuisut.gl.

Qinnuteqarnissamut killissarititaavoq ulloq 24. august 2019.
Atorfinittoqassaaq 1. september 2019 imaluunniit erseqqinnerusumik isumaqatigiissut malillugu.
Atorfinitsitsinissamut atatillugu oqaloqatigiinnerit sapaatip akunnerani 35/36 ingerlanneqarnissaat naatsorsuutigineqarpoq.
Inuunermit taasassat aammalu soraarummeersimanermit uppernarsaat kiisalu oqaaseqaatit attuumassuteqartut qinnuteqaammut ilannguteqquneqarput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk