Skip to main content
94

Dette jobopslag er udløbet

Angalaqatigiittartut ingerlanneqarnerannut ineriartortinneqarnerannullu Pitsaaliuinermut Isumaginninnermullu Aqutsisoqarfimmut tarnip pissusaanik ilisimasallit pisortaat pissarsiariniarneqarpoq

Isumaginninnermut tunngasuni ilorraap tungaanut allanngortitsinissamik soqutigisaqarpit? Meeqqanik inuusuttunillu ajornartorsiutilinnik sulinermit misilittagaqarpit, ataatsimut tamakkiisumik isiginnilluarsinnaavit aqutsisuullutillu? Taava illerpiaq Pitsaaliuinermut Isumaginninnermullu Aqutsisoqarfimmi atorfimmut pilersinneqartumut pissarsiariniarpatsigit.
 
Tarnip pissusaanik ilisimasallit pisortaattut Meeqqanut Inersimasunullu Angalaqatigiittartut ulluinnarni ingerlanneqarnerat ineriartorteqqinnerallu suliassarissavatit. Angalaqatigiittartut tassaapput, meeqqanut inuusuttunullu kinguaassiutitigut atornerlugaanermik eqqugaasimasunut, kiisalu inersimasunut meeraanerminni kinguaassiutitigut atornerlugaasimanermik kingorna kingusissumik kinguneqartitsisunut oqaloqatiginninnikkut katsorsaanermik nuna tamakkerlugu neqeroorut. Meeqqat inersimasullu pitsaanerusumik inuuneqalernissaannut angalaqatigiittartut ikiortarpaat, 2013-imili pilersinneqarnerminiit inuit 650-it sinnerlugit illoqarfinnut 14-inut nunaqarfinnullu marlunnut agguataarneqartut katsorsarsimavaat. Angalaqatigiittartut tassaapput suliffeqarfiit avataaneersut tarnip pissusaanik ilisimasallit/tarnikkut katsorsaasut qulit kommunit qinnuteqareernerisigut katsorsaaffiusumi suliaqartartut, suliarisarlugulu sumiiffimmi suliamut kinguaassiuutitigut atornerluinermut tunngatillugu suliaqartunut suliamut tunngaveqalersitsineq pikkorissaanerlu.

Tarnip pissusaanik ilisimasallit pisortaattut atorfimmi makkua ilaatigut suliassarissavatit:

  • Angalaqatigiittartut suleriaasaannik aaqqissugaanerannillu malinnaanissaq
  • Angalaqatigiittartut suliassaannik suliaannillu ataqatigiissitilluni aaqqissuussineq.
  • Kommuninik suleqateqarneq
  • Politikikkut suliniutit akuerisat pilersinnissaat atuuttunngortinnissaallu
  • Ilisimasanik katersineq ingerlatseqqittarnerlu.
  • Ataqatigiissaarineq.
  • Suliniutit aalajangiinerillu piviusunngortinneqarnissaannut peqataasarneq.
  • Pitsaassutsimik qulakkeerinninneq nalilersuinerlu.
  • Paasissutissanik katersineq misissueqqissaarnerlu.
  • Pikkorissaaneq najukkamilu suliamut tunngaveqalersitsinerit.


Kissaatigaarput tullinnguuttut arlallit pikkoriffigissagitit piginnaasaqarfigalugillu:

  • Tarnip pissusaanik ilisimasalittut ilinniarsimanissaq uppernarsaatissaqarnissarlu, immikkut sammisaqarluni ilinniarsimaneq iluaqutaasinnaavoq, isumaginninnermilu misilittagaqaruit ajunngilluinnassaaq.
  • Aaqqissuussaanerup inuillu ataasiakkaat akornanni sunniivigeqatigiittarnermik ilisimasaqarneq misilittagaqarnerluunniit kissaatiginarpoq.
  • Aqutsisinnaanermik ilisimasaqarnissaq.
  • Suliamut piginnaasaqarluarneq inuttullu  sunniisinnaassuseqarneq.
  • Suliat ingerlanerinik suliaqarnermik misilittagaqarneq.
  • Kalaallit Nunaanni inuiaqatigiinni pissutsinut ilisimasaqarnissaq, pingaartumik isumaginninnermut atatillugu
  • Pilersaarusiorluni ataqatigiissaarillunilu suliaqartarnermik piginnaasaqarneq
  • Perorsaanermut ilisimasaqarneq.
  • Ataqatigiissumik, misissueqqissaarnermik tunngaveqartumik nalinginnaasumiillu allaanerusumik eqqarsarsinnaassusilik.
  • Suliniutinik ineriartortitsinermillu suliaqarnermik misilittagalik.
  • Allattariarsornikkut oqaluttariarsornikkullu paasissutissiisarnermut piginnaasalik.
  • Aaqqissuussaasumik suleriaaseqartoq angusaqarluarnissamillu pingaartitsisoq.


Neqeroorutigaavut:

  • Suliffeqarfik pissanganartoq annertoqisumillu ineriartortoq.
  • Suliaq annertunerusumik sunniuteqarfiginissaanut periarfissaqarfigisat.
  • Atorfik annertoorujussuarmik akisussaaffeqarfiusoq.
  • Suleqatit pitsaasunik naleqartitallit ataatsimoorluartullu.
  • Suliffeqarfik qaffasissumik sulianut tunngasunut piginnaasaqarfiusoq.


Ilaannikkooriarluni atorfimmut atatillugu angalasarnissaq naatsorsuutigineqassaaq. Marluinnik oqaaseqarneq (kalaallisut/danskisut) iluaqutaassaaq, piumasaqaataanngilarli.

Uagut pilluta
Pitsaaliuinermut Isumaginninnermullu Aqutsisoqarfik, Naalakkersuisuni aqutsisoqarfiuvoq tulliuttunik tallimanik immikkoortortaqarfeqartoq: Pinaveersaartitsinermut immikkoortortaq PAARISA, Aningaasaqarnermut immikkoortortaq, Ulloq unnuarlu aamma nalilersuisarnermut immikkoortortaq, Qitiusumik Siunnersuisarfik aamma Allattoqarfik. Immikkoortortaqarfiit qanimut suleqatigiittarput, suliffiuvorlu suliassanut tunngatillugu amerlasuunik unammilligassaqarfiusoq.
Qitiusumik Siunnersuisarfik pingaarnertut suliassaa tassaavoq, meeqqanut inuusuttunullu ajornartorsiutilinnut inatsisinut tunngasutigut isumaginninnikkullu ilisimasat nukittunerulersissallugit, kommuninut siunnersuinikkut ilitsersuinikkullu. Qitiusumik Siunnersuisarfik immikkoortortanut alliunerusunut pingasunut agguataarsimavoq tamarmik immikkut suliassaqarfinnik suliaqartunik: oqartussaaneq, iliuuseqarnernik aallartitsinerit aamma innuttaasunut sammisitamik neqerooruteqarneq, matumani ilanngullugit Angalaqatigiittartut, Tusaannga, Alliaq il. il. Qitiusumik Siunnersuisarfik immikkoortortaqarfiuvoq ineriartortorujussuaq suliatigut piginnaasat tatiginartut ataatsimoorluarnerlu pingaartinneqarlutik.  Tarnip pissusaanik ilisimasallit pisortaattut atorfimmi iliuuseqarnernik aallartitsinernut immikkoortortaqarfimmiissaatit.

Aningaasarsiatigut atorfinitsitaanermilu atugassarititaasut
Tunngaviusumik sap. ak. nal. ak. 40-it suliffiuvoq.
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqarfissaq kingulleq 15.oktober 2020, tamatuma kinguninngua atorfinitsitsiniarluni oqaloqatiginninnerit ingerlanneqartussatut naatsorsuutigineqarput.

Atorfik inuttalerneqassaaq 1.nov 2020 imaluunniit isumaqatigiinnikkut.
 
Paasissutissat sukumiinerusut
Atorfimmut tunngatillugu paasissutissat amerlanerusut pisariaqartikkukkit Sulianik aqutsisoq Stina Mølgaard attaveqarfigisinnaavat  oqaras.: +299 34 60 17 imaluunniit e-mailimut stmo@nanoq.gl imaluunniit immikkoortortaqarfimmi pisortaagallartumut Ane-Louise Løvstrøm oqaras. + 299 34 60 14 alov@nanoq.gl.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk