Skip to main content
110

Dette jobopslag er udløbet

Allagarsiuteqqitaq | Inuiaqatigiit ineriartornerannik misissueqqissaarnernillu soqutigisaqarpit – taamaassimappat Aningaasaqarnermut Naalakkersuisoqarfik aningaasaqarnermik ilinniagartuumik sulisussarsiorpoq

Misissueqqissaarnermik piginnaasaqarluartutut suleqateqarluarsinnaassuseqartutullu ikiuussinnaavit – naalakkersuinikkut aalajangikkat kisitsisitaannik suliaqarnissaq kissaatigaajuk aammalu suliffeqarfimmi suliamik ilisimasaqarluarnissamik ineriartortitsinermillu assut pingaartitsisumi sulinissaq nuannaraajuk – taamaassimappat Aningaasaqarnikkut Pilersaarusiornermut Immikkoortortami sulisussarsiorpugut.

Atorfik pillugu
Aningaasaqarnermut Naalakkersuisoqarfik sulisussarsiorpoq allallaqqissumik suleqateqarsinnaassuseqarluartumillu aningaasaqarnikkut misissueqqissaarnernik qaffasissumik pitsaassusilinnik suliaqarsinnaasumik. Aalajangikkat misissueqqissaarnikkut suleqataaffigissavatit aammali ilaatigut pisortat aningaasartuutaat pillugit misissueqqissaarnernik namminersortumik suliaqarsinnaassallutit. Suleqatigiit suliamik ilisimasaqarluartut suleqatigissavatit, taakku aningaasaqarnikkut pitsaasumik pilersaarusiornissamik naalakkersuinikkullu aalajangiisoqarnissaani patajaatsumik tunngaveqarnissamik qulakkeerinninnissaq ataatsimut anguniagaralugu. Aningaasaqarnikkut Pilersaarusiornermut Immikkoortortami sulisut qulingiluaapput.

Suliassatit
Suliassat aningaasaqarnikkut pingaarnerusutigut pilersaarusiornermit immikkoortukkuutaanik misissueqqissaarinermut kiisalu naalakkersuinikkut suliassanik isumaginninnermut attuumassuteqarput. Tassunga ilanngullugit:

  • Aningaasaqarnikkut misissueqqissaarneq kingunerisassanillu naatsorsuineq
  • Aningaasartuutinik misissueqqissaarneq
  • Pisortat isumaqatigiissutaannut suliassaqarfimmi misissueqqissaarneq
  • Naalakkersuinikkut sulianik, tassungalu ilanngullugu tusarniaanernik aammalu § 37 naapertorlugu apeqqutinik isumaginninneq
  • Aningaasaqarnermut tunngasunik saqqummiussassanik suliaqarnermut ikiuunneq
  • Namminersorlutik Oqartussat akiitsunik aqutsinerannut atatillugu misissueqqissaarnernut aqutsinermullu ikiuunneq
  • Sulianik isumaginninnermi paasissutissanik katersineq suliarinninnerlu, kisitsisinik oqaasertaliineq – killormullu – kiisalu suliniutinut misissueqqissaarnernullu tunngasunik akimuisumik suleqateqarsinnaanerit pingaaruteqarput. Sulianik isumaginninnerit akulikitsumik naalakkersuisoqarfiup sulisui allat suleqatigalugit pisassaaq, taamaaliornermilu suliat pillugit isummanik paarlaateqatigiinnissamut oqallinnissamullu periarfissaqarluartassaaq.

Naatsorsuutigaarput:

  • Angusaqarnissaq qitiutillugu namminersorsinnaassuseqartutit
  • Aningaasaqarneq pingaarnertut sammisaralugu inuiaqatigiilerinermik ilisimatusarnermik naleqquttumik ilinniagaqartuusutit
  • Allakkatigut oqalunnikkullu ingerlatitseqqilluarsinnaassuseqartutit.
  • Misissueqqissaarnermik ilisimasaqarluartutit aammalu kissaatiginarluni misilittagaqarfigissagit Microsoft Dynamics AX/Prisme imaluunniit aningaasaqarnikkut periutsit tassunga assingusut imaluunniit misissueqqissaarnermi siunertanut assersuutigalugu R-imut programmeeriinermik ilisimasaqartutit.
  • Tulleriiaarillaqqittuusutit, namminersorsinnaasutit aaqqissuussaasumillu sulisinnaasutit.
  • Suliat akimorlugit suleqatigiinnermik misilittagaqartutit
  • Pingaartumik suliffeqarfimmi naalakkersuinikkut aqunneqartumi sulinermik misilittagaqarnissaq assut iluaqutaassaaq
  • Aammattaaq Kalaallit Nunaanni inuiaqatigiinnik oqaatsinillu ilisimasaqarnissat kiisalu Kalaallit Nunaanni inuiaqatigiinni pissutsinik paasisimasaqarnissat iluaqutaassaaq

Neqeroorutigaarput:

  • Suliffik pissanganartoq akisussaaffeqarfiusorlu
  • Paasissutisseeqatigiittarnissaq qitiutillugu sulisoqatigiinni ilisimasaqarluartuni suleqataalernissaq iliuuseqarnissamullu periarfissat qanittut
  • Naalakkersuinermik suliaqartut qanillugit sulineq
  • Suliassat suliat akimorlugit assigiinngiiaartut
  • Pingaarnertut anguniakkanut sunniuteqarluarsinnaaneq
  • Persuarsiorfiunngitsumik suleqatigiinneq
  • Piukkunnaatillit naammaginartumik naleqquttumillu misilittagallit immikkut siunnersortitut siunnersortinulluunniit pisortatut atorfinitsinneqarnissamut periarfissaqassapput


Uagut pilluta
Naalakkersuisoqarfik qitiusumik allaffeqarfiup Naalakkersuisunit aqunneqartup ilagaa. Sulinitsinni pingaarnertut ingerlataraarput naalakkersuinikkut aningaasaqarneq. Naalakkersuisoqarfimmi maanna sulisut 30-upput immikkoortortanut arlalinnut agguataarneqartut, taakku aningaasaqarnermut, inatsisilerinermut, nuna tamakkerlugu pilersaarusiornermut tunngaviusumillu inatsisilerinermut sulianik ingerlataqarlutik. Naalakkersuisoqarfimmut atapput Akileraartarnermut Aqutsisoqarfik, Aningaasaqarnermut Sulisoqarnermullu Aqutsisoqarfik kiisalu Naatsorsueqqissaartarfik.
Pingaarnertut suliassaraarput Aningaasaqarnermut Nunanilu Avannarlerni Suleqatigiinnermut Naalakkersuisumik sullissinissaq siunnersuinissarlu aammalu aningaasaqarnikkut politikimi suliassanik ataqatigiissaarinissaq. Aningaasaliissutinut akileraartarnermullu inatsisinik suliaqartarpugut, nakkutilliinermi misissueqqissaarnermilu suliassat ingerlattarpagut, aningaasaqarnikkut nunalu tamakkerlugu pilersaarusiornermik suliaqarpugut, kiisalu aningaasaqarnikkut iluarsaaqqinnernik ingerlataqarluta.

Paasissutissat annertunerusut
Atorfik pillugu annertunerusumik paasissutissat immikkoortortami pisortamit Anders Fonnesbech-Wulff, tlf. +299 34 67 31 imaluunniit e-mail afw@nanoq.gl pissarsiarineqarsinnaapput.
Namminersorlutik Oqartussat annertunerusumik paasisaqarfigineqarsinnaapput uani www.naalakkersuisut.gl.

Qinnuteqaat
Qinnuteqarnissamut killissaritinneqarpoq ulloq 14. august 2019.
Atorfinitsitsinissaq pillugu oqaloqatiginninnerit sapaatit akunnerisa 34-anni ingerlanneqarnissaat naatsorsuutigineqarpoq. Ulloq 1. Oktober isumaqatigiissuteqarnikkulluunniit taassuma kingorna piaartumik sulilertoqarnissaa sulilernissaq naatsorsuutigineqarpoq.
Qinnuteqaammut ilannguteqquneqarput ilinniakkat sulinermillu misilittakkat pillugit paasissutissat, ilinniarnermut uppernarsaatit tamakkiisut, tassungalu ilanngullugit ilinniarnermi tamarmiusumi karakteerit assilinerat kiisalu attavigisinnaasat susassaqartut.
Qinnuteqartut piffissami misileraaffiusumi peqataatinneqarsinnaanissartik naatsorsuutigisariaqarpaat.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk