Skip to main content
88

Dette jobopslag er udløbet

Allagarsiuteqqitaq - Ilinniartitsinermik Ilisimatusarfimmi studieadjunktitut/-lektoritut adjunktitulluunniit atorfik inuttassarsiorneqarpoq

Ilinniartitsinermik Ilisimatusarfimmi fysik-kemimi pinngortitalerinermilu ilinniartitsisumik  studieadjunktimik/-lektorimik adjunktimilluunniit aggustip 1-ani 2020 isumaqatigiissuteqarnikkulluunniit allartissinnaasumik pissarsiorpugut.

Ilinniartitsinermik Ilisimatusarfik ilinniartitsisumik pissarsiorpoq ilinniartitsisunngornianik nunatsinni meeqqat atuarfiini pitsaasumik ilinniartitsinissamut piukkunnarsaaqataarusuttumik, meeqqallu atuarfiini ilinniartitsisunik ilinniaqqinnikkut pikkorissarnikkullu nukittorsaaqataasinnaasumik.

Ilinniartitsinermik ilisimatusarfimmi ilinniartitsisutut atorfik atorfiuvoq unammillernartoq tulleriiaakkamillu siumullu isigisumik sulinissamik aammalu nammineq suliffigisap ilinniartitsisunngorniarnerup iluani sammisanut allanut ”nipilersoqataaneranik” pitsaasumik sunniuteqaqataanissamik piumasaqaatilik.

Suliassatit tassaassapput:

  • Pinngortitalerinermi linjefagip iluani fysik-kemimik ilinniartitsineq
  • Fagimik ataavartumik ineriartortitsineq
  • Ilinniartitsisoqatinik qanimut suleqateqarneq
  • Fagini allani ilinniartitsisut peqatigalugit fagit akimorlugit suleqataaneq
  • Ilinniartitsisunngorniarnerup aammalu ilinniaqqittarnerup pikkorissartarnerullu siuarsarnissaa siunertaralugu suliaqarnerni peqataaneq
  • Ilinniartitsisunngorniarnerup qarasaasiakkut atortorissaarutinut ataneranik siuarsaaqataaneq
  • Suliat ilagisinnaavaat fagip iluani ineriartortitsineq ilisimatuutulluunniit misissuineq, kisimiilluni imaluunniit atuarfinni ilinniartitsisut peqatigalugit.

Piginnaasat piginnaanerillu ataani allassimasut amerlanersaasa isumaginissaat naatsorsuutigaarput:

  • Atorfimmut tulluartumik kandidatitut ilinniagaqarneq
  • Atorfimmut tulluartumik ilinniartitsinermik misilittagaqarneq
  • Ilikkarnartunik (didaktik) ilisimatoorpalaartunillu siunertalinnik suliaqarnermik misilittagaqarneq
  • Piginnaasat pioreersut aallaavigalugit suleriaatsimik sulinerullu ingerlannissaanik piareersaasiorsinnaaneq ilinniartitsisut allat suleqatiginerisigut
  • Danmarkimi Kalaallillu Nunaanni ilinniartitsisunngorniarneq meeqqallu atuarfii ilisimasaqarfigilluarpatit
  • Nunatsinni nunanilu allani atuagarsornikkut ilikkarnartulerinikkullu (didaktik) misissuinernik nutaanerusunik paasisimasaqarneq
  • Fagit akimorlugit ilinniartitsinermik fagillu akimorlugit suliassanik pilersitsinernik suliaqarusussuseqarneq
  • Sullivimmi ingerlaavartumi nikerartumilu nutaaliorsinnaassuseqarneq
  • Atuartitsinerni attaveqaatit digitaliusut ilanngunneqarsinnaanerannik atorneqarsinnaanerannillu ineriartortitsinermi suleqataarusunneq
  • Atuartitsissutit arlallit soorlu matematikki tuluttulluunnit ingerlassinnaagukkit iluaqutaassaaq

Inuttut piginnaasat

  • Kulturit arlallit akornanni sulisinnaassuseq
  • Naammagittarneq inissaqartitsinerlu
  • Ilinniartut annertuumik naammassisaqarsinnaanissaannut kaammattuisinnaaneq
  • Akuersaartoq kiinneraartorlu, suleqatikkuminartoq, attaveqallaqqissoq kaammattuillaqqissorlu
  • Ineriartornermik eqqarsarsinnaasoq
  • Paatsiveerunnani suliassanik arlallinnik ataatsikkut suliaqarsinnaasoq
  • Kalaallit Nunaanni pissutsinik ilinniartitaanermillu ilisimasaqalerusuttoq

Neqeroorutigaavut

  • Suliffik ineriartortuartoq suliassani namminersuutassani ataatsimoorussasanilu naligiimmik anguniagaqartoq
  • Suliffeqarfik pimoorussisoq eqeersimaartoq ingerlalluartorlu sisamanik sulisoqarnissaat qilanaarivarput
  • Atuartitsivik uummaarissoq tunniusimasunik piumassusilinnillu suleqatilik
  • Ilisimatusarfik sammisani perorsaanermilu ineriartorfissaqarluartoq

Qinnuteqaat
Qinnuteqaatip saniatigut makku ilanngunneqassapput:

  • Ilinniarsimanermut uppernarsaat
  • suliffigisimasanik paasissutissat
  • misilitsinnernut uppernarsaatit assilineri
  • ilisimatusarnermut ilinniartitsinermullu tunngasumik piginnaasanut takussutissat

Atorfik aggustip 1-ani 2020 imaluunniit isumaqatigiissuteqarnikkut inuttalerneqassaaq.

Paasissutissat annertunerusut
Atorfimmut tunngatillugu paasissutissat allat pineqarsinnaapput Ilisimatusarfimmi pisortaq Britta Lohmann attavigalugu, oqarasuaammut +299 38 57 02-mut.

Nalileeriaaseq atorfinitsitseriaaserlu
Atorfimmut qinnuteqaatinik nalilersuineq inatsisit atuuttut naapertorlugit naliliisartunit sammisamik ilisimasaqartunit ingerlanneqartarpoq. Naliliisartut katitigaanerat qinnuteqartunut piffissap qinnuteqarnermi killisiussap naanerani ilisimatitsissutigineqassaaq. Naliliisartut qinnuteqaatit takkussimasut nalilersussavaat Ilisimatusarfimmilu pisortamut inassuteqaateqassallutik. Qinnuteqartut misilinneqarnissartit piareersimaffigissavaat.

Ilisimatusarfik pillugu.
Ilisimatusarfik Issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu.
 
Ilisimatusarfik sisamanik ilisimatusarfeqarpoq:

  • Kulturimik, Oqaatsinik Oqaluttuarisaanermillu Ilisimatusarfik
  • Ilinniartitsinermik Ilisimatusarfik ilinniartitsisunngorniarfittaqarlunilu meeqqat atuarfianni ilinniartitsisunut ilinniaqqiffissartalik
  • Peqqissaanermik Ilisimatusarfik peqqissaasunngorniarfittalik
  • Inuiaqatigiilerinermik, Aningaasaqarnermik Tusagassiornermillu Ilisimatusarfik

Ilinniartitsinermik Ilisimatusarfik pillugu
Ilinniartitsinermik Ilisimatusarfik 170-it missaannik ilinniartoqarpoq 30-nillu sulisoqarluni, lisimatusarfiillu allat pingasut peqatigalugit Ilisimatusarfiummut atavoq. Ilinniartitsisunngorniartarneq annerusumik Nuup illoqarfiani neqeroorutaasarpoq, aammali angerlarsimaffik qimannagu ilinniarneq ingerlanneqarsinnaalluni. Ilinniartitsinermik Ilisimatusarfiup ilinniaqqinnerit pikkorissarnerillu assigiinngitsut neqeroorutigisarpai. Taamatuttaaq atuarfiit pisariaqartitsineq naapertorlugu pikkorissarnernik qinnuteqarsinnaapput.
Ilinniarfiup iluani suliffigissaaneq, misissueqqissaarneq ilinniagaqarnerlu suliaraavut. Qiimasuunissaq suleqataalluarnissarlu pingaartitaraavut.
Fagippit ineriartortinnissaanut nukittorsarnissaanullu ilisimatusarnikkut attaveqaatit aqqutigalugit periarfissaqarluassaatit.
Ilisimatusarfik pillugu paasissutissat uani nanineqarsinnaapput www.uni.gl 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk