Skip to main content
107

Dette jobopslag er udløbet

Allagaatilerisoq - Nunatta oqaluttuassartaanik nutaanerusumik suliaqartussaq

Nunatta Katersugaasivia Allagaateqarfialu (matuma kingorna naalisarlugu: NKA) ilinniagartuumik allagaatilerisutut sulisussamik inuttassarsiuussivoq 1. september 2019-imi imaluunniit isumaqatigiissuteqareernikkut tamatuma kingorna piaarnerpaamik sulilersussamik.

Allagaatilerisoq suliami aaqqissuunneratigut suliffiullu iluani allagaatilerisut allat suleqatiginerisigut avataanilu pisortat suleqatiginerisigut, allagaateqarfeqarneq pillugu Inatsisartut inatsisaanni siunertap piviusunngortinnissaa sulissutigissavaa, suliassat makku aqqutigalugit

  • Allagaatinik toqqorsisarneq allagaateqarnermilu pissutsit pillugit pisortanit suliamut atatillugu nalinginnaasumik apeqquteqaatit akissuteqarfigineri
  • Pisortat suliffeqarfiutaannit namminersortunillu tunniunneqartut tigoqqaarlugillu suliarineri
  • Allagaatit toqqortat nalunaarsornerisa aaqqissuunnerisalu nakkutiginerat
  • Pisortat suliffeqarfiutaanni pisortanilu journaliseriinermi toqqorsinermilu periutsit pillugit ilitsersuineq aamma inatsisitigut pisussaaffiit naapertorlugit taakkunannga nakkutilliineq.


Allagaatilerisup akisussaaffigissavaa immikkut suliassaqarfik ’1900-kkut oqaluttuarisaanerat aamma katersugaatit namminerisamik pigineqartut’. Immikkut suliassaqarfimmut tassunga suliassatut makku ilaapput:

  • Ilisimatuunik allanillu allagaateqarfiup katersugaataanik allagaatilerisup immikkut suliassaqarfiata iluaniittunik atuinissamik kissaateqartunik ikiorsiineq, tapersiineq ilitsersuinerlu.
  • Atuisuniit suliamut atatillugu nalinginnaasunik apeqquteqaatit akiussuteqarfigineri
  • Immikkut susassaqarfiup iluani ilisimatusarneq, sallerpaatillugu katersugaasiviup- allagaateqarfiullu katersaanik aallaaveqarluni. Suliassamut tamatumunnga allagaatilerisup piffissap suliffimmi tamarmiusup 2/7-ia atorsinnaavaa, taamaattoq akunnerit suliartoqqusaaffiusinnaasut ilaatinnagit.
  • Katersugaatit ilisimatusarnerlu pillugit paasissutissiinerit, tamatumunngattaaq ilanngullugit NKA-p allagaatilerisui katersugaasivilerisuilu allat suleqatigalugit paasissutissiinermi suliniutinut annertunerusunut peqataaneq.
  • Allagaatit namminerisamik pigineqartut katersornissaannut, nalunaarsornissaannut saqqummiunnissaannullu periusissiamik ilusilersuineq.


Allagaatilerisup ilisimatusarnikkut sulisut allat nalingalugit suliffeqarfiup suleriaasianut/sulinermi tunngaviinut ilisimatusarnikkullu sulianut pilersaarutinut tunngavissat aalajangersaaqataaffigissavai.

Allagaatilerisup pisussaaffigaa suliamut tunngasut iluanni paasissutissarsiortuarnissani, nammineerlunilu suliniuteqarnermigut pikkorissarnernut isumasioqatigiinnernullu peqataasassalluni kiisalu suleqatiminut attaveqartassalluni suliaminut tunngasutigut ilisimasani inerisarneqartuaqqullugit.

Allagaatilerisup Kalaallit Nunaanni, Danmarkimi nunanilu allani allagaateqarfinnut suleqatinullu attaveqalernissaq isumagissavaa attavigiuartassallugillu.

Allagaatilerisup pisortaa qaninneq tassaavoq allagaateqarfiup pisortaa.

Allagaatilerisutut atorfik, kandidatimik imaluunniit Ph.D-mik inuttaligassaq, piffissaq tamaat atorfiuvoq, Namminersorlutik Oqartussat aamma Dansk Magisterforeningip akornanni Kalaallit Nunaanni ilinniagartuutut atorfillit pillugit isumaqatigiissut qaqugukkulluunniit atuuttoq naapertorlugu akissaateqartinneqarlunilu atorfeqarnermi atugassaqartitaaffiusoq. Atorfininnermut atatillugu inissaqartitsisoqanngilaq.

Qinnuteqaat ilinniakkat siusinnerusukkullu suliarisimasat naapertuuttut pillugit paasissutissartalik, soraarummeersimanermut il.il. uppernarsaatit nuunnerinik ilaqartinneqartoq ilanngunneqassaaq.

Qinnuteqaat kingusinnerpaamik 15. august 2019 nassiunneqassaaq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk