Skip to main content
156

Dette jobopslag er udløbet

Akileraartarnermut Aqutsisoqarfiup susassaqarfiinut attaveqaqatigiinnermut tunngasunik akisussaasoq

Akileraartarnermut Aqutsisoqarfiup susassaqarfiinut attaveqaqatigiinnermut tunngasunik akisussaasumik atorfik inuttassarsiuunneqarpoq

Ulloq atorfiniffissaq 1. oktober 2022 immikkulluunniit isumaqatigiissuteqarnikkut.

Atorfik
Akileraaruserinermut suliassat ilaat ukiuni makkunani allanngoriartorput, taaguutsit suliassallu nutaat pilersiortorneqarput. Allannguutit tamakku ilaatigut pissutigalugit, innuttaasunut suliffeqarfinnut allanullu susassaqarfitsinnut attaveqaqatigiinnerup annertunerulersinneqarnissaa pisariaqartinneqalerpoq.

Naliginnaasumik suliarisassavatit paasissutissanik ingerlatitseqqiinerit Akileraartarnermut Aqutsi-soqarfiup susassaqarfiinut tunngassuteqartut, pingaarnertut suliffeqarfiup avataaniittunut ilaatigulli aamma annertuumik suliffeqarfiup iluani. Atorfik unammillernartuusinnaavoq oqariartuutillu  paasiuminaatsuusinnaasarlutik, taamaattumik akileraaruserinermik suliaqartuunngitsunut paasiuminarsaasinnaasumik pissarsiorpugut.   

Paasissutissiinermut aamma attaveqaqatigiinnermut tunngasunik akisussaaffeqassaatit, tassunga ilanngullugit tusagassiuutinut nalunaarutinik suliaqarneq, allaaserisanik suliaqarneq, immersugassat oqaasertaanik nutarterinerit  il. il.

Attaveqaqatigiittarnitsinnut tamanut assigiiaartumik ersarissumillu isikkulimmik nittarsaakkusuppugut.Taamaattumik nittartakkatta ilusilersorneranut suliaqartassaatit aamma.

Ingerlatsinermut suleriaatsinik aammalu immikkoortortat akornanni avammullu attaveqaqatigiinnernut siunnersuinertalimmik isumasioqatigineqartassaatit. Aqutsisoqarfiup nittartagaa www.aka.gl akisussaaffigalugulu ineriartortinneqarnissaa qularnaassavat. Tamatuma saniatigut susassaqartunut attaveqaqatigiinnerit kipisuitsumik ingerlajuartarput tamatumalu saniatigut suliassat allat takkussortuartut aamma suliarisassavatit.

Tamakku saniasigut Aqutsisoqarfimmi Pisortaq aamma aqutsisut ilai qanimut suleqatigalugit ataqatigiissaarisassaatit, ilaatigut susassaqarfiit assigiinngitsut aallaavigalugit immikkoortortat akornanni suleqatigiittoqartillugu tassunga ilanngullugu Akileraartarnermut Aqutsisoqarfimmi ilisimasanik paarlaasseqatigiinnernut aaqqissuussisassaatit.

Siusinnerusukkut paasissutissanik ingerlatitseqqiinernik attaveqaqatigiinnernullu tunngasunik suliaqareernikuuvutit, tusagassiortutuusinnaavoq soorluttaaq allattariarsornermut attaveqaqatigiinnermullu tunngasunik piginnaaneqarluartuullutit ilanngullugillu susassaqarfinnut  paasissutissanik ingerlatitseqqiisarnernik aammalu tusagassiuutitigut sulianik misilittagaqarsimallutit.

Suliassanut piukkunnartuunerpit saniatigut, ullormut suliassatit aaqqissuussaasumik pilersaaru-siornissaannut piginnaasaqartariaqarputit nammineersinnaassuseqarlutillu, suliffik ulapaarfiusoq politikkikkut aalajangiiffigisassanik suliaqarfiusoq piareersimaffigalugu suliffigisinnaasariaqarpat, suliassanik amerlasuunik ataatsikkut ingerlatsiviusoq, kisitsisilerinermut ilisimasaqassaatit, suleqatikkuminartuullutit peqqissaartuullutillu.

Iluaqutaalluinnassaaq kalaallisut danskisullu oqaatsit atugaralugillu piginnaasaqarfigilluarukkit aamma tuluttoorsinnaaneq ajoqutaanavianngilaq aammattaaq kalaallit kulturiannut inooqatigiinnermullu tunngasunut ilisimasaqassasutit. 

Pillagaasimannginnissat piumasaqaataavoq.

Atorfik qitiusumik allaffeqarfimmi nuummiittumi inissisimavoq.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Atorfinittoq sapaatip akunneranut nalunaaquttap akunnerini 40-ni sulisassaaq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat annertunerusut
Atorfik pillugu annertunerusumik paasisaqarusukkuit immikkoortortami pisortaq Thomas Holm Jensen, oq. (+299) 34 65 29 imlt. allakkasuaatikkut: thoj@nanoq.gl atorlugit saaffigisinnaavat.

Qinnuteqaat
Qinnuteqarfissaq ulloq kingullerpaaq tassaavoq ataasinngorneq 22. august 2022

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk