Find job
Dette jobopslag er udløbet
Akileraartarnermut Aqutsisoqarfik qarasaasiatigut ineriartortitsinermi sulisussarsiorpoq
Qarasaasiatigut suliaqarnermut, pilersaarusiornermi suliaqarnermut suleriaatsinullu pitsanngorsaasarnernut misilittagaqarpiit? Taava Akileraartarnermut Aqutsisoqarfiup qarasaasiatigut atortorissaarutaanik ineriartortitsinermut suleqataanissannut periarfissippatsigit.
Atorfimmik soqutiginartumik tamatigoortumillu ingerlatanut ineriartortitsinermut immikkoortortaqarfitsinni, Akileraartarnermut Aqutsisoqarfiup qitiusumik allaffeqarfiani nuummiittumi neqeroorfigaatsigit. Immikkoortortaq anginngitsoq sammisanut immikkut ilisimasalinnik sulisulik, Akileraartarnermut Aqutsisoqarfimmullu qarasaasiatigut ineriartortitsisartunut avataaneersunut attaveqaataalluni.
Akileraartarnermut Aqutsisoqarfimmi suleqatigiinneq, inuit ineriartornerlu pingaartitaraagut. Suliani ajornartorsiutaasinnaasut arlalikkaat aaqqiiviginiassallugit iluariinnassavat suleqatillu assigiinngitsunik tunuliaqutallit suliallillu suleqatigisinnaallugit.
Suliassat / akisussaaffiit
Akileraartarnermut Aqutsisoqarfimmi immikkoortortaqarfik, pilersitsivik sulinitsinnilu ingerlatanut suleriaatsinullu ikorfartuisoq ineriartortipparput. Ineriartortitsinermi pilersaarusiornermut sulisutut, ineriartortitat pilersaarusiat annertunerusumillu digitaalinngorsaanerup naammassineqarnissaannut qitiusumik inissisimavutit. Ulluinnarni immikkoortortami sulisut peqatigalugit paasiniaaqqissaarnerit pilersaarusiornissaat, susassaqartut peqatigalugit aaqqiissutissanik naapertuuttunik ujartuinerit, innuttaasunut suliffeqarfinnullu sullissinitta pitsaanerulersinnissaa anguniarlugu.
Eqqarsartaatsit tassaavoq isumalluut pingaarnerpaaq. Namminersorlutit suleqateqarlutillu sulisinnaassuseqarputit minnerunngitsumillu pissutsinut atuuttunut pitsaanerulersitsinissamut piareersimallutit. Ineriartortitsinermi pilersaarusiornermut sulisutut sulianik piffissaq eqqorlugu tunniussinissannut imminut piumaffigisartuuvutit, aaqqissuussisimanermut paasiniaaqqissaarnermut, ingerlatanut suleriaatsinut sullissinermullu ilusilersuinerit pitsanngorsarnissaannut alapernaassuseqartuuvutit.
Tunuliaquttat
Atorfimmut, sulianik ineriartortitsinernik (inuussutissarsiutitut misilittagaqarfitit ukiut 1-3) tunuliaqutaqarnissat tulluarnerpaassaaq ilinniagaqarnerillu naleqquttoq. Iluaqutaassaaq piumasaqaataananili Pisortani atorfeqarnermik misilittagaqarneq.
Misilittakkat ataani taaneqartut naleqquttuupput piumasaqaataanatilli:
- Pilersaarusiornernut tunngasunik suliffeqarfinni aqutsisutut suliaqartarsimaneq
- Pitsaassusilimmik aamma imalt. annertuunik paasiniaaqqissaarnernut piginnaassuseqarneq
- Periaatsinik pitsannguutaasinnaasunik ilisimasaqarneq
- Ingerlatanut periaatsinik allaaserinninneq
- Suliffimmut-/pilersaarutinut naapertuuttumik eqqarsartaaseq
- Sullissinermut ilusilersuineq sullitallu pissusilersornerannut nalilersuisinnaassuseqarneq
Ulloq sulilerfik
Sulilersussaq 1. Oktober 2023-mi imalt. isumaqatigiissut malillugu sulilersinneqassaaq.
Paasissutissat allat
Atorfik pillugu annertunerusumik paasisaqarusukkuit, Akileraartarnermut Aqutsisoqarfimmi pisortap tullersortaa, Siverth Larsen attavigisinnaavat ugguuna sdl@nanoq.gl
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job