Skip to main content
111

Dette jobopslag er udløbet

Aatsitassarsiortut pisortallu akornanni attaveqaataanissamut piareersimavit? Taamaappat Aatsitassarsiornermut Aqutsisoqarfimmi akuersissutinut immikkoortoq maannarpiaq sulianut pikkorissumik sulisussarsiorpoq!

Aatsitassarsiortut pisortallu akornanni attaveqaataanissamut piareersimavit? Immikkoortumi sukkasuumik ineriartortumi unammillernartunik suliaqarnissamut piareersimavit? Taamaappat Aatsitassarsiornermut Aqutsisoqarfimmi Akuersissutinut immikkoortumi AC-fuldmægtigimik tunniusimalluartumik, suliffeqarfinnut inunnullu ataasiakkaanut Kalaallit Nunaanni aatsitassanik ujarlertunut akuersissutinut tunngasunik aqutseqataasussamik sulisussarsiorpugut.
 
Suleqatissamik qarasaasialerinermut, aaqqissuussinermut, inatsisinik paasinninnermut politikimullu tunngasunik sungiussimannittumik suleqatissarsiorpugut.
 
Atorfik
Akuersissutinut immikkoortumi atorfinitsinneqassaatit. Akuersissutinik sananermi sulianik ingerlatsinermut tunngasut pingaarnertut suliassarissavatit, taamaalillutillu suliffeqarfiit inuinnaallu akornanni sallertut attaveqaataassaatit. Taakku saniatigut pissut aallaavigalugit Aatsitassarsiornermut Aqutsisoqarfiup aalajangersakkanik atugassarititaasunillu nutarterinerani ineriartortitsinermik suleqataasassaatit, taamaalillutillu aqutsisoqarfiup paasisitsiniaanermik nittarsaassinernillu ingerlatsinerani suleqataasassallutit.
 
Ulloq suliffiusoq allanngorartuussasoq naatsorsuutigisinnaavat, tassani illit assigiinngitsorpassuartigut aatsitassanik ingerlatsivimmi aqutsineq suliaqarfigisinnaallugu.
Taamaattoq suliassanut aalajangersimasunut tunngatillugu, siusinnerusukkut misilittakkatit piginnaasaqarfitillu apeqqutaassapput.
 
Pisinnaatitsissutinut immikkoortortaqarfik immikkoortortaqarfimmi pisortamit aqunneqarpoq aammalu AC fuldmægtiginik pimoorussisunik sisamanik sulisoqarluni.
 
Illit
Pingaartipparput:

  • ilinniagartuutut ingerlaqqiffiusumik attuumassuteqartumik ilinniagaqarsimassasutit, pisortat ingerlatsivianni sulinermut ilisimasaqaruit iluaqutaassalluni
  • sulianik malinnaalluarsinnaasuussutit aaqqiissutissanillu nassaarniaqataasarsinnaasutit
  • sulianik ingerlatsinermi pikkorissuusutit, ingerlatsinermilu suliassanik suliaqarnissamut piumassuseqarlutillu piginnaasaqartuusutit.
  • IT-mut piginnaasaqarluartutit, suliallu allanngorarnissaannut piareersimallutillu suleriaatsinik pisariillisaanermut peqataasinnaalluartutit,
  • tuluttut allattariarsornikkut oqalunnikkullu sulinissamut piginnaaneqarluartutit
  • qungujunnartunik nuannarisaqarluartutit aammalu persuarsiornanngitsumik nipeqarluni pissusilersullaqqissutit

 
Kalaallit oqaasii  kulturiallu ilisimasaqarfigigukku annertuumik iluaqutaassaaq. Qinnuteqartunut Kalaallit Nunaata avataanersunut tunngatillugu, sungiusimasamit allaanerusumik kulturikkut piumasaqaateqarfiusumi sulinissamut inuunissamullu piumassuseqarneq piginnaaneqarnerlu pingaartinneqassaaq.
 
Aatsitassanut Aqutsisoqarfik
Aatsitassanut Aqutsisoqarfik Kalaallit Nunaanni aatsitassarsiornermik inerisaanermi pingaaruteqarluinnartumik inissisimavoq. Ingerlatseqatigiiffinnit aamma inunnit ataasiakkaanit aatsitassarsiorluni misissuinissamik kissaateqartunit pingaarnertut attavigineqartarpugut. Suliassat Kalaallit Nunaanni oqartussaasut sullissiviillu allat suleqatigalugit isumagineqarput, tamatumanilu inatsisilerinerup, ingerlatsivimmi ingerlatsinerup, aningaasaqarnerup, ujarassiornerup, teknikkip, pinngortitap avatangiisillu iluanni ileqquusumik suliassanut killissaliussat akimorlugit suleqatigiinnissaq aamma suliniutinik aqutsinissaq pisariaqarpoq.
 
Suliffeqarfiuvugut pissanganartoq ineriartortoq. Ulluinnarni sulinerput inussiarnersumik oqaloriaaseqarluni suleqatigiiffiuvoq aammalu qullersanut qanittumik inissisimalluni angusanut nammineq sunniuteqarsinnaanermut inissaqartitsiviulluni. Uagutsinnut annertuumik piumasaqarfigisarpugut aammalu suliassatta suliarinerini inernerinilu qaffasissumik pitsaassuseqartitsinissaq naatsorsuutigalutigu.
 
Aatsitassanut Aqutsisoqarfik Nuummi allaffeqarpoq immikkoortortaqarfinni marlunni qulingiluat  missaannik amerlassuseqartunik sulisoqarluni: Akuersissutinut immikkoortoq aamma Teknikkimut Nakkutilliinermullu immikkoortortaqarfik. Aatsitassanut Aqutsisoqarfik Aatsitassanut Suliffeqarnermullu Naalakkersuisoqarfiup ataaniilluni oqartussasuuvoq.
 
Inummut piukkunnartumut sinaakkutissat pilerinartut
Atorfik inuttut suliatigullu ineriartornissamut periarfissiilluarpoq. Suleqatit pimoorussisut suleqatigilissavatit, aammalu piffissami sivikitsuaqqami nutaanik ilikkagaqarsinnaanissaq misigissavat. 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Paasissutissat annertunerusut
Atorfik pillugu paasisaqarnerorusukkuit, attaveqarfigisinnaavat Rasmus Brock Kjærgaard
oqarasuaammut (+299) 34 68 35
imaluunniit e-mail rabk@nanoq.gl
 
Kalaallit Nunaat aamma Namminersorlutik Oqartussat pillugit annertunerusumik paasisaqarnerorusukkuit www.naalakkersuisut.gl, aqqutigalugu Atorfiit ataanni paasisaqarnerusinnaavutit. Kalaallit Nunaanni aatsitassanut suliassaqarfik pillugu paasissutissat nittartakkatsinni uani www.govmin.gl nassaarisinnaavatit


Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk