Skip to main content
122

Dette jobopslag er udløbet

Aatsitassanut suliffissuaqarnerup ineriartortinneqarnera – fuldmægtigi imaluunniit immikkut siunnersorti

Kalaallit Nunaanni inuiaqatigiinni isumannaareqataarusuppit aammalu Kalaallit Nunaanni aatsitassarsiornermi suliffissuaqarnermi ineriartortitseqqinnermut peqataarusuppit? Aatsitassanut Naalakkersuisoqarfiup ataani Aatsitassanut Aqutsisoqarfik aatsitassarsiornissamut akuersissutinut suliassanik suliarinninnermik isumaginnissinnaasumik kiisalu aatsitassarsiorluni ingerlatassani inuiaqatigiit ”pissarsiassaasa” annertusarneqarnissaat pillugit nalilersuinerit suliarineqarnerannut taperseeqataasussamik, pikkorissumik maannakkorpiaq suleqatissamik sulisussarsiorpoq.
 
Aatsitassanut Aqutsisoqarfik
Aatsitassarsiorluni misissuinermut aamma aatsitassanik piiaanermut tunngatillugu ineriartorneq suli neriulluarnartoq Kalaallit Nunaanni misigineqarpoq. Aatsitassanut Aqutsisoqarfik ineriartornermi tassani pingaarutilimmik inissisimavoq – oqartussatut aammalu aatsitassarsiorluni akuersissutinut tamaginnut suliassanik suliarinninnermik aamma nunani tamalaani nunatta aatsitassaqarsinnaaneranik nittarsaassinermi pilerisaarinermik isumaginittuulluni. Aatsitassaqarsinnaanerata soqutigineqarnerujussua nutaanik amerlanerusunillu annertunerusunik suliassaqartitsivoq.
 
Aatsitassanut Aqutsisoqarfik sullivik pissanganartuuvoq sukkasuumik ineriartorfiusoq. Aatsitassanut Aqutsisoqarfimmi immikkoortortaqarfiit marluupput, Teknikkimut Nakkutilliinermullu Immikkoortortaqarfik kiisalu Akuersissuteqartarnermut immikkoortortaqarfik. Akuersissuteqartarnermut immikkoortortaqarfimmi inissinneqassaatit, tassani suleqatitit tamarmik inuiaqatigiilerinermik atituumik tunuliaqutaqarlutik. Ulluinnaat nuannersumik peqatigiittarnermik sunnersimaneqarput aammalu pisortat qanillugit sulisoqarluni, angusassanut nammineq sunniinissamut inissaqartitsisoqarluni. Suliffiup iluani qanimut suleqatigiippugut aammalu oqartussanut allanut aammalu suliassaqarfinni suliaqartartunik assigiinngitsorpassuarnik, matumani ujarassiuut, inatsisilerituut aningaasaqarnermilu ilinniarsimasut, attaveqarfigisarlugit.

Aatsitassanut Aqutsisoqarfik pillugu annertunerusut nittartakkatsinni www.govmin.gl atuarsinnaavatit.
 
Atorfik
Aatsitassarsiornissamut akuersissutinik suliassanik suliarinninnertut ittunik ingerlatsinermi suliassanik suliaqarusuttumik kiisalu inuiaqatigiinni piujuartussamik piujuartitsinermik nalilersuinernik (VSB) ineriartortitsinermut kiisalu aatsitassarsiorfissanut suleqatigiinnissamut isumaqatigiissutinut (Impact Benefit Agreement) peqataarusuttumik suleqatissarsiorpugut.

Suliassanik ilaatigut ilaatinneqarput:

  • Aatsitassarsiornissamut akuersissutinut suliassanik suliarinninneq, ilanngullugu ingerlatseqatigiiffinnut qanimut attaveqarneq
  • Ingerlatseqatigiiffiit inuiaqatigiinnut sunniutaasussanik nalilersueqqissaarnernik suliaqarneranni ilitsersuineq
  • Tusarniaanerup ingerlanerinut aamma innuttaasunik ataatsimiititsinernut piareersaaneq ingerlatsinerlu
  • Suleqatigiinnissamut isumaqatigiissutinut malittarisassanik nutarterisarneq
  • Aatsitassarsiorfiutileqatigiiffiup, kommunip aamma Namminersorlutik Oqartussat akornanni suleqatigiinnissamut isumaqatigiissutinik suliaqarnermi isumaqatiginninniutigineqarnerinilu peqataaneq
  • Suleqatigiinnissamut isumaqatigiissutit malinnaaffigineri


Ilisarnaatit
Inuk inuiaqatigiinnut kalaallinut tunngasunik aammalu aatsitassarsiornermut suliassaqarfimmut tunngasuusinnaasunik ilisimannittoq ujartorparput, aammalu pingaartumik pingaartissavagut:

  • ingerlaqqiffiusumik ilinniagartuutut naleqquttumik ilinniagaqarsimasoq
  • ineriartortitsinermut suliniutinullu sammisunik suliaqarnermut tunngatillugu piginnaasaqarluarneq, ilanngullugu suliassanut atituumik suliaqarsinnaaneq aammalu ajornartorsiutit nutaat sukkasuumik iserfigisinnaanerat
  • assigiinngitsunik ilinniagaqarsimallutik sulisunik suleqatiginninnissamut piumassuseqarneq piginnaasaqarnerlu
  • tuluttut piginnaaneqarluarneq
  • suleqatiginnissinnaassuseqarneq nammineerlunilu sulisinnaaneq
  • qinnuteqartut allattariarsornermi oqaluinnarnermilu marloqiusamik oqaaseqartut (kalaallisut/danskisut)


Aningaasarsiat aamma atorfininnermut tunngasut
Aningaasarsianut atorfininnermullu atugassarititaasut, ilanngullugit atorfininnermi soraarnermilu akiliunneqarluni angalasinnaatitaaneq aamma pigisat nuutinneqarnissaannik pisinnaatitaaneq, Namminersorlutik Oqartussat aamma kattuffiup pineqartup isumaqatiginninniarsinnaatitaasup akornanni isumaqatigiissut/sulisartut isumaqatigiissutaat atorfininnerup nalaani atuuttoq naapertorlugu pissapput.

Qinnuteqartoq inuiaqatigiit aningaasaqarnerannut qulequttat iluanni piumasaqaatinut immikkuullarissunut matuma siuliani allassimasunut tunngatillugu ukiuni arlalinni misilittagaqartoq, naliliineq malillugu immikkut siunnersortinut tapimik neqeroorfigineqarsinnaassaaq.

Ineqarneq
Atorfimmut atatillugu maleruagassat sukkulluunniit atuuttut malillugit sulisunut inissiamut pisatsersugaanngitsumut innersuussisoqarsinnaavoq. Inunnut sulisunut inissiameereersunut imaluunniit inissiami allami kommunimit imaluunniit Namminersorlutik Oqartussanit pigineqartumeereersunut innersuussisoqarsinnaanngilaq. Ineqarnermut akiliut aamma qularnaveeqqusiussaq inissiamut innersuunneqartumut maleruagassat sukkulluunniit atuuttut malillugit akilerneqassapput. Sulisunut inissiaq atorfeqarnermut atatinneqarpoq, aammalu atorfeqarunnaarnermi qimanneqassalluni.

Inissiap pisoqaassusaa, piginnittunut tunngasut il.il. apeqqutaallutik ineqarnermut akiliut aamma inissiap pitsaassusaa assigiinngitsuusinnaapput. Ataavartussamik sulisunut inissiamut innersuunneqarnissamut utaqqisoqarsinnaavoq, taamaattumik utaqqiisaasumik inissiigallartoqarsinnaalluni, ilanngullugu aamma najugaqaqatigiiffinni minnerusuni imaluunniit akunnittarfiit inissiaataanni, taakkualu akileraaruserneqassallutik. Sulisunut inissiami imaluunniit utaqqiisaasumik inissiami anginerusunik uumasuuteqartoqarsinnaanngilaq, assersuutigalugu qimmeqartoqarsinnaanani imaluunniit qitsuuteqartoqarsinnaanani.

Qinnuteqaat  
Paasissutissanik annertunerusunik piniarnermi attaveqarfigineqassaaq Aatsitassanut Naalakkersuisoqarfimmi immikkoortortaqarfimmi pisortaq, Pætur Niclasen, oqarasuaammut (+299) 34 68 31, e-mail: pjni@nanoq.gl imaluunniit  Akuersissuteqartarnermut immikkoortortaqarfimmi Immikkut siunnersorti, Samuel Bjørnshauge, oqarasuaammut (+299) 34 68 34, e-mail: sabj@nanoq.gl.

Oqaloqateqarnerit ingerlaavartumik ingerlanneqassapput.
 
Qinnuteqaat, CV, ilinniarsimanermut pikkorissarsimanermullu uppernarsaatit, kiisalu allakkiat attuumassuteqartut allat -”Qinnuteqaat nassiuguk” toorlugu nassiutikkit.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk