Skip to main content
106

Aatsitassanut Suliffeqarnermullu Naalakkersuisoqarfimmi Suliffeqarnermut immikkoortortaqarfimmi inuussuttunut aqqutissiuussinermullu suliniuteqarnernut suleqatigiinnut aqqutissiuussisunut siunnersorti

Aqqutissiuussisunut siunnersortimik, suliniutinik suliaqarnermi aamma ilinnialernissamik imaluunniit sulilernissamik piareersimalernissaq siunertaralugu inuusuttut ilinniakkatigut inuttullu piginnaasaannik pitsanngorsaanissamik siunertaqartunik inuusuttunut suliniutinik ineriartortitsinermi misilittagaqartumik, Aatsitassanut Suliffeqarnermullu Naalakkersuisoqarfik sulisussarsiorpoq.

Aqqutissiuussisunut siunnersorti nunaqarfinni isorliunerusunilu piginnaanngorsaanerit piginnaasaqarfiillu qaffassarnissaannik ineriartortitsinermut aamma pingaartumik inuusuttunut ilinniarnermik imaluunniit suliffeqarnermik ingerlataqanngitsunut suliniutinik nutaanik ineriartortitsinermut suleqatigiinni ilaassaaq. Suliniuteqarnerit suussusaanni pingaartumik kajumissuseqalersitsiniarneq, akisussaaqataaneq, ataatsimooqatigiinneq, piginnaasaqarfinnik ineriartortitsineq aamma oqaloqatigiinneq pillugit naleqartitat aallaavigineqarput. Suliniuteqarnerni inuusuttut anigorniagassaannik aammalu suliniutit suut ulluinnarni atorsinnaanersut patajaatsumik paasisimasaqarneq pisariaqarpoq. Tamatuma saniatigut kommunini oqartussanik, Majoriamik, meeqqat atuarfiannik aamma soqutigisaqartunik allanik ingerlaavartumik oqaloqateqartarnissaq pisariaqarpoq.
Tamatuma saniatigut Majoriami pingaartumik ilinnialernissamik suliffimmilu misiliinissamik qinnuteqarnernut atatillugu aqqutissiuussisarnerup ineriartortinneqarneranut pitsaassusaannillu isumannaarinnittarnermut, aqqutissiuussisunut siunnersorti peqataasussaassaaq.

Suliniutinik aqutsineq, ilinniartitaanermi aqqutissiuussineq imaluunniit isumaginninnermi aqqutissiuussineq sammillugit, inuusuttunut suliniuteqarnerit pillugit immikkut ilisimasaqarnissaq atorfimmi naatsorsuutigineqarpoq. Aqqutissiuussisunut siunnersorti pingasunik sulisoqarluni suleqatigiinni ilaassaaq, tassani suliassaqarfiit akimorlugit suleqatigiinnissaq qulakkeerneqassalluni.

Inuusuttunut suliniuteqarnernut suleqatigiit suliniutinik nutaanik, inuusuttunik immikkuullarissunik anigorniagassaqartunik sapinngisamik pitsaanerpaanik pilerilersitsisinnaasunik aammalu inuunerminni ingerlariaqqinnissamut pisariaqartumik kajumissuseqalersitsisinnaasunik, suliaqarnermi Naalakkersuisoqarfimmut ikiuutissapput.

Tamatuma saniatigut periusissanik suliaqarnermut, naliliinermi suliassanut aamma politikkerinut inassuteqaatinut il.il. tunngatillugu suliassaqarfinni suliaqarnermi suleqatigiit ikiuuttassapput. Qinnuteqartut tamatuma saniatigut angalangaatsiartarnissaq piareersimaffigissavaat.

Aallaaviatigut Nuummi inissisimassaaq, kisianni qinnuteqartut piukkunnaateqarluarneranni, tamanna naleqquttoq paasinarsippat, allami inissiinissaq isumaqatigiissutigineqarsinnaavoq. Ulloq atorfiniffiusussaq tassaavoq ulloq 1. oktober 2019 imaluunniit isumaqatigiissuteqarneq malillugu.

Suliassat:

  • Suliniutinik piviusunngortitsineq aqutsinerlu, atuutsitsilerneq malinnaanerlu
  • Aqutsisooqatigiinni suleqatigiissitalianilu Suliffeqarnermut immikkoortortaqarfimmit pilersinneqartuni peqataaneq
  • Aqqutissiuussinermi suliniutinik Majoriami sullissivinni ingerlanneqartuni nukittorsaaneq
  • Suliassanik ataasiakkaanik qulaajaaneq aamma misissuineq
  • Nalunaarusianik naliliinernillu suliaqarneq
  • Atorfilittat sinneri suleqatigalugit suliassat
  • Suliassat ulluinnarni suliassaalertartut

Piukkunnassuseqarnerit:

  • Kalaallit Nunaanni pissutsit aamma anigorniagassat inuusuttut nalaattagaat annertuumik paasisimasaqarfigaatit
  • Suleqatiginnillaqqipputit aammalu pingaartumik inuusuttunut tunngatillugu avatangiisini sunniillaqqillutit
  • Oqaluinnarnikkut allattariarsornikkullu attaveqaqateqallaqqipputit
  • Nammineerlutit aammalu suleqatigiinni sulisinnaavutit
  • Suliniutinik aamma ineriartortitsinermik suliassanik misilittagaqarputit
  • Aaqqissuussaanermi politikkikkut aqunneqartumi sulineq ilisimasaqarfigaat

Qinnuteqaat, CV, ilinniagaqarsimanermut pikkorissarsimanermullu uppernarsaatit kiisalu allakkiat attuumassuteqartut allat nassiutikkit ”Qinnuteqaat nassiuguk” toorlugu.

Atorfik pillugu paasissutissat annertunerusut piniarneqarsinnaapput immikkoortortaqarfimmi pisortaq Lona Lynge-mi uani 34 56 24 imaluunniit loly@nanoq.gl. Oqaloqateqarnerit ingerlaavartumik ingerlanneqassapput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk