Skip to main content
144

Dette jobopslag er udløbet

Aatsitassanut Suliffeqarnermullu Naalakkersuisoqarfik atorfimmut piffissamut killiligaasumut suliniummut qarasaasiami paasissutissaasivimmut ujarassiuumik sulisussarsiorpoq

Qarasaasiami paasissutissaasiviit aamma GIS kissalaarfigisuuigit, aammalu Kalaallit Nunaanni aatsitassanut suliassaqarfiup ineriartortinneqarneranut soqutiginnippit? Taava Nuummi Aatsitassanut Suliffeqarnermullu Naalakkersuisoqarfimmi Ujarassiornermut Immikkoortortaqarfimmi ujarassiornermut qarasaasiami paasissutissaasivimmi suliniummi ujarassiuutut atorfik ilinnoortuusimassaaq.
 
2019-imi decembarip 31-iat tikillugu atorfininnissaq 11. marts 2019 (imaluunniit erseqqinnerusumik isumaqatigiissuteqarneq malillugu).
 
Ujarassiornermut Immikkoortortaqarfik pillugu
Ujarassiornermut Immikkoortortaqarfiup Aatsitassanut Suliffeqarnermullu Naalakkersuisoqarfiup ataani ilaatigut pingaarnertut atuuffissarai:

  •  Aatsitassarsiorluni misissuinermut aamma piiaanermut atatillugu ujarassiornermi qulequttanut tunngatillugu Kalaallit Nunaanni oqartussanut siunnersuineq ilitsersuinerlu,
  •  Kalaallit Nunaanni aatsitassaqarsinnaaneranut aatsitassarsiorluni misissuinermi aningaasaliisarnerit tunngavissinnissaannut paasissutissanik nalunaarsukkanik qaffasissumik pitsaassusilinnik pissarsinissamut ujarassiornikkut ilisimatuussutsikkut misissuinernik suliaqarneq aamma
  •  Kalaallit Nunaanni aatsitassarsiornermut periarfissaqarfiusut nittarsaanneqarnerat.

 
Suliniut pillugu
GIS / qarasaasiami paasissutissaasivimmut immikkut siunnersorterput nakkutilliisuulluni ujarassiornermi ilisimatusarnikkut aammalu misissuinermut tunngassuteqartut qarasaasiami paasissutissaasiviit aamma GIS-imi tunisassiat digitaliusut pioreersut pitsanngorsassavatit aammalu ineriartortissallugit. Pingaartumik ”Ujarassiorit” geokemiskinut qarasaasiami paasissutissaasivitta nutarternissaa allanngutsaaliornissaalu suliassarissavat aammalu allanngutsaaliuinermut ingerlaavartumut suleriaatsinik atuutsitsilissallutit, kiisalu ujarassiornermut qarasaasiami paasissutissaasivinnik allanik ineriartortitsinermut pitsanngorsaanermullu peqataassallutit.
 
Illit ilisarnaatitit
Naatsorsuutigaarput:

  • Minnerpaamik bachelor-inngorsimassasutit, kisianni ujarassiornermi ilinniagartuujuguit pitsaassalluni.
  • Tamatigoortuusutit aammalu suliassat assigiinngitsorpassuit isumagisinnaagitit.
  • Attaveqateqallaqqissuusutit, allattariarsornermi oqaasiinnakkullu.
  • Sioqqutaarillaqqissuusutit aammalu suleqatiginnillaqqissuusutit.
  • Aaqqissuussaasumik, namminersortumik aamma angusassat eqqarsaatigalugit sulisinnaasutit.
  • Kalaallisut, danskisut tuluttullu piginnaasaqarluartutit.

Uagut pilluta
Aatsitassanut Suliffeqarnermullu Naalakkersuisoqarfimmi sulisut 20-it missaanniippugut. Tamatuma saniatigut Naalakkersuisoqarfiup ataaniippoq immikkoortortaq Aatsitassanut Aqutsisoqarfik, tassaniillutik ilaatigut Teknikkimut & Nakkutilliinermut Immikkoortortaqarfik aamma Pisinnaatitsissutinut Immikkoortortaqarfik. Atorfik aaqqissuussaanikkut Ujarassiornermut Immikkoortortaqarfimmi inissisimavoq, tassaniillutik ujarassiuunut pisortaq 1 aamma ujarassiuut 5. Ujarassiornermut Immikkoortortaqarfik Aatsitassanut Aqutsisoqarfimmut, De Nationale Geologiske Undersøgelser for Danmark og Grønland (GEUS), aamma Kalaallit Nunaanni aamma nunani allani ilisimatusarnermut teknikkimullu sullissivinnik allanik qanimut suleqateqarluni sulisarpoq.  
 
Naalakkersuisoqarfik pillugu annertunerusut takukkit uani www.naalakkersuisut.gl aammalu ujarassiorneq pillugu uani www.govmin.gl. Nuummippugut, tassanilu aallaaniarnissamut, aalisarnissamut, imaatigut angalaarnissamut, nunami pisunnissamut, sisorarnissamut allatigullu silami sammisaqarnissamut periarfissarpassuaqarpoq. Illoqarfiup innuttai 17.000-iusut piorsarsimassutsikkut neqeroorutissarpassuaqarput filmertarfeqarluni takutitseqqaarfiusartumik, piorsarsimassutsikkut illorsuaqarluni, golfertarfeqarluni, naluttarfeqarluni. Annertunerusumik atuarsinnaavutit ukunani www.sermersooq.gl, www.greenland.com aamma www.naalakkersuisut.gl.
 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat annertunerusut
Atorfik pillugu annertunerusumik paasisaqarusukkuit Immikkoortortaqarfimmi pisortaq Julie Hollis attaveqarfiginissaanut tikilluaqqusaavutit uani oqarasuaat +299 58 61 70, e-mail: juho@nanoq.gl.
 
Kalaallit Nunaat pillugu annertunerusunik paasisaqarusukkuit uani www.naalakkersuisut.gl, Suliffissarsiortunut paasissutissat ataani, annertunerusumik atuarsinnaavutit.

Qinnuteqarneq 
Qinnuteqaat Aatsitassanut Suliffeqarnermullu Naalakkersuisoqarfimmi tiguneqareersimassaaq kingusinnerpaamik 22. februar 2019. Naatsorsuutigaarput qinnuteqarnermut piffissamut killiliussap naareernerata kingorna oqaloqateqarnerit piaartumik ingerlanneqassasut.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk