Skip to main content
99

Dette jobopslag er udløbet

Aatsitassanut Naalakkersuisoqarfik ujarassiuumik/siunnersortimik immikkut paasisimasalimmik pissarsiorpoq

Aaqqissuussaanermi nunani tamalaanitut ittumi sulinissamik piumassuseqarpit? Kalaallit Nunaanni aatsitassanut suliassaqarfiup ineriartortinneqarnera, aatsitassat periarfissaqarfiusut nittarsaannissaat, aatsitassarsiorfissat paasissutissiissutiginissaat aammalu ujarassiorluni pineqartut ornillugit suliaqarnissaq soqutigaagit? Taamaappat Nuummi Aatsitassanut Naalakkersuisoqarfimmi Ujarassiornermut Immikkoortortaqarfimmi ujarassiuutut/siunnersortitut immikkut paasisimasalittut atorfik ilinnut tulluartuuvoq.

Atorfininnissaq pissaaq 1. december 2020 imaluunniit isumaqatigiissuteqarneq malillugu.

Atorfik pillugu
Kalaallit Nunaat nunarsuarmi nunap immikkoortuisa ikittuinnaat annikitsumik aatsitassarsiorluni misissuiffigineqartut ilagaat. Ujarassiornermut Immikkoortortaqarfiup Aatsitassanut Naalakkersuisoqarfiup ataani pingaarnertut suliassai ilaatigut tassaapput:

 (a) aatsitassarsiorluni misissuinermut attuumassuteqartunik ilisimatusarnernik suliaqarneq aammalu paasissutissanik nutaanik pissarsisarneq,

 (b) Kalaallit Nunaanni aatsitassanut periarfissaqarfiusunik nittarsaassineq, aamma
 (c) Kalaallit Nunaanni oqartussanut ujarassiornermut tunngasunut siunnersuisarneq.

Ujarassiornermut paasissutissanik paasissutissiisarnermut, paasissutissanut nalunaarsukkanut aamma Kalaallit Nunaanni aatsitassarsiorluni misissuineq aatsitassarsiorfinnillu ingerlatsineq pillugit siunnersuisarnermut tunngatillugu atorfik pingaarutilimmik inissisimavoq.

Suliassatit pingaarnerit tassaapput:

  • Pisortat apeqquteqaataannut, aatsitassarsiorluni misissuinernut aatsitassarsiorfinnillu ingerlatsinermut tunngasunut, akissuteqartarnissaq, kiisalu ingerlatseqatigiiffiit suliaqarnissamut pilersaarutaannik ujarassiornernullu nalunaarusiaannik nalilersuinissaq.
  • Nunani tamalaani nittarsaassinerni/nuisitsinerni aaqqissuussinerit peqataanerillu.
  • Kalaallit Nunaanni aatsitassarsiornermut periarfissaqarfiusunut ujarassiornermullu paasissutissanut nittarsaassinermullu najoqqutassanik allatigullu paasissutissiinernik suliaqarneq.
  • Ujarassiornermut Immikkoortortaqarfiup ilisimatusarnermut suliaqarnerani peqataaneq, ilanngullugit Kalaallit Nunaanni ujarassiornermut nunap assiliorneq.
  • Ujarassiornermi suliniutinut assigiinngitsunut atatillugu suliassaqarfiit akimorlugit suliassanik ataqatigiissaarineq.
  • Allaffissornikkut suliassat assigiinngitsut, soorlu ujarassiornermut apeqqutilliinernut akissuteqaatit, ujarassiornernut nalunaarusianik suliaqarneq, ujarassiornikkut nakkutilliineq il.il.  

 
Ilinnut ilisarnaataasussat
Naatsorsuutigaarput illit:

  • Ujarassiornermi ilinniagartuutut soraarummeersimasoq, Ph.D angusimagaanni pitsaassalluni.
  • Aatsitassanut tunngasunik suliaqarluni misilittagaqarputit, ilanngullugu pineqartunut ornigulluni suliaqarneq.
  • Inussiarnersuuvutit aallussilluartarlutillu.
  • Ineriartortitsinissamut suliniutinullu sammisunik suliaqarnernik aaqqissuussinerup iluani piginnaasaqarluarputit.
  • Aaqqissuussaasumik, namminersortumik aamma angusassat eqqarsaatigalugit sulisinnaavutit.
  • Pitsaasumik suleqatiginnillaqqipputit oqaaseqatigiiliullaqqillutillu.
  • Suliassarpassuit ataatsikkut ingerlassinnaavatit aammalu ajornartorsiutinut nutaanut paasinnillaqqissuullutit.
  • Allattariarsornermi oqaasiinnartigullu tuluttut piginnaasaqarluarputit.


Kalaallit oqaasiinut kulturiannullu ilisimasaqaruit iluaqutaassaaq. Qinnuteqartunut Kalaallit Nunaata avataaneersunut tunngatillugu, sungiusimasanit allaanerusunik kulturikkut piumasaqaatit atuutsillugit sulinissamut inuunissamullu piginnaasaqarneq, piumassuseqarneq kajumissuseqarnerlu pingaartinneqassapput. Tamatuma saniatigut atorfimmit assingusumit misilittagaqaruit iluaqutaassaaq, kisianni piumasaqaataanani. Pingaarnerpaajuvoq sammisaqarusussuseqarnerit, sulianut piginnaasaqarnerit aammalu ataqatigiissaarinissamut suleqatigiinnermullu piginnaasaqarnerit. Ilinniarnerminni naammasserlaat aamma atorfinitsinneqarsinnaassapput.

Neqeroorutigaavut
Immikkoortortaqarfimmi ineriartorfiujuartumi sioqqutaariuarfiusumilu suleqataalissaatit, taanna inooqatigiinnikkut ataqatigiilluarfiulluni aammalu sulianut isumasioqateqarnissamut periarfissaqarluarluni. Immikkoortortaqarfiarannguuvugut, tamatumalu kingunerisaanik suliassaqarfiit piginnaasaqarfigilluakkavit soqutigisavillu iluanni sulinissamut pitsaanerpaanik periarfissaqassaatit.

Pissarsiarissavatit:

  • Atorfik pissanganartoq, unammilligassaqarfiusoq tamatigoortorlu.
  • Inuttut suliatigullu ineriartornissarnut sunniuteqarnissamut periarfissaqarluartoq.
  • Akisussaassuseqarluni annertuumik kiffaanngissuseqarfiusoq.
  • Sulinermi atukkat eqaatsut.


Ujarassiornermut Immikkoortortaqarfimmi sulineq pillugu annertunerusut atuarsinnaavatit quppersakkami matumani.

Angalasarnerit pillugit
Ilaatigut nittarsaassinermut atatillugu, pineqartunut ornigulluni suliaqarnermut, ilinniaqqinnermut, ataatsimeersuarnernut kiisalu nakkutilliinermut atatillugu Kalaallit Nunaanni avataanilu angalasarnissat naatsorsuutigineqassaaq.

Uagut pilluta
Aatsitassanut Naalakkersuisoqarfippiami sulisut 15-it missaanniippugut. Tamatuma saniatigut Naalakkersuisoqarfiup ataani immikkoortortaq Aatsitassanut Aqutsisoqarfeqarpoq, tassaniillutik ilaatigut  Teknikkimut  Nakkutilliinermullu Immikkoortortaqarfik aamma Akuersissuteqartarnermut Immikkoortortaqarfik. Atorfik aaqqissuussaanikkut Ujarassiornermut Immikkoortortaqarfimmi inissisimavoq, tassaniillutik ujarassiuunut pisortaq 1 aamma ujarassiuut 7. Ujarassiornermut Immikkoortortaqarfik Aatsitassanut Aqutsisoqarfimmut, De Nationale Geologiske Undersøgelser for Danmark og Grønland (GEUS), aamma Kalaallit Nunaanni aamma nunani allani ilisimatusarnermut teknikkimullu sullissivinnik allanik qanimut suleqateqarluni sulisarpoq.  

Piffissaq suliffiusoq sapaatip akunneranut nalunaaquttap akunneri 40-it.

Naalakkersuisoqarfik pillugu annertunerusut takukkit uani www.govmin.gl aammalu Namminersorlutik Oqartussat pillugit uani www.naalakkersuisut.gl. Nuummi angerlarsimaffeqarpugut, tassanilu aallaaniarnissamut, aalisarnissamut, imaatigut angalaarnissamut, nunami pisunnissamut, sisorarnissamut allatigullu silami sammisaqarnissamut periarfissarpassuaqarpoq. Illoqarfiup innuttai 17.000-iusut piorsarsimassutsikkut neqeroorutissarpassuaqarput filmertarfeqarluni takutitseqqaarfiusartumik, piorsarsimassutsikkut illorsuaqarluni, golfertarfeqarluni, naluttarfeqarluni il.il. - annertunerusumik atuarsinnaavutit uani www.sermersooq.gl aamma www.visitgreenland.com.

Paasissutissat annertunerusut
Atorfik pillugu annertunerusumik paasisaqarusukkuit Ujarassiornermut Immikkoortortaqarfimmi pisortaagallartoq Anette Juul-Nielsen attaveqarfigisinnaavat oqarasuaammut +299 34 68 17, e-mail: anjn@nanoq.gl.
 
Kalaallit Nunaat pillugu paasissutissanik annertunerusunik perusukkuit annertunerusut atuarsinnaavatit uani www.naalakkersuisut.gl, Suliffissarsiortunut paasissutissat, ataanni.

Qinnuteqaat
Qinnuteqaat Aatsitassanut Naalakkersuisoqarfimmi tiguneqareersimassaaq kingusinnerpaamik ulloq 22. oktober 2020. 

Qinnuteqaat nalunaaqutserneqassaaq ’Ujarassiornermut Immikkoortortaqarfimmut ujarassiooq’ aammalu ilinniagaqarsimaneq aamma siusinnerusukkut suliffigisimasat pillugit paasissutissanik imaqassalluni, aammalu soraarummeersimanermut uppernarsaatit assilineri, innersuussutit il.i. ilanngunneqassallutik.

Atorfininnissamut oqaloqateqarnerit naatsorsuutigineqarpoq sapaatit akunneranni 44-imi ingerlanneqassasut.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk