Skip to main content
128

Dette jobopslag er udløbet

Aatsitassanut Ikummatissanullu Aqutsisoqarfik annertusaavoq: Teknikkinik allaffissornikkullu ilisarnaatilinnik sulisussarsiorpugut (sulisoq/immikkut siunnersorti/siunnersortaaneq)

Suliassaqarfimmi ineriartupiloortumi unammilligassat piareersimaffigaagit? Taamaappat Aatsitassanut Ikummatissanullu Aqutsisoqarfiup immikkoortortaqarfiinut: Teknikkinut Nakkutilliinermullu Immikkoortortaqarfik kiisalu Pisinnaatitsissutinut Immikkoortortaqarfik, suleqatigiligassatsinnik sulisussarsiorpugut.

Aatsitassanut Ikummatissanullu Aqutsisoqarfik
Aatsitassanut Ikummatissanullu Aqutsisoqarfik Nuummi allaffeqarpoq, 6-nik immikkoortortaqarfinni marlunni agguarsimasunik sulisoqarluni: Teknikkinut Nakkutilliinermullu Immikkoortortaqarfik kiisalu Pisinnaatitsissutinut Immikkoortortaqarfik. Aatsitassanut Ikummatissanullu Aqutsisoqarfik Aatsitassanut Inatsisillu Atuutsinneqarnerannut Naalakkersuisoqarfiup ataani oqartussaavoq.

Ulluinnarni sulinerput inussiarnersumik oqaloriaaseqarluni suleqatigiiffiuvoq aammalu qullersanut qanittumik inissisimalluni angusanut nammineq sunniuteqarsinnaanermut inissaqartitsiviulluni. Atorfik inuttut suliatigullu ineriartornissamut periarfissiilluarpoq. Aallussilluartuni suleqatigiinni suleqataalissaatit, aammalu piffissami sivikitsumi ilikkagarpassuaqartussaallutit misigissavat.

Immikkoortortaqarfinnut piginnaasaqarfinnut ilisarnaatit ataatsimoorussat
Suliassat oqartussat allat suleqatigalugit isumagineqarput, tamatumanilu pisortat ingerlatsineranni, ujarassiornerup, teknikkip avatangiisillu iluanni ileqquusumik suliaqarfiit killissai akimorlugit suleqatigiinnissamut suliniutinillu aqutsinissamut pikkorissunik suleqateqarnissaq pisariaqarpoq. Aqutsisoqarfeeraavugut atituunik suliassaqarfeqartut. Sanilit ikiornissaannut piareersimanissaq, ulluinnarni nuannaarluni sulinissamut pisariaqarpoq.

Ulluinnarni sulinitsinni nunami namminermi nunanilu allani atituumik attaveqarfeqartarpugut. Taamaattumik tuluttut oqaluinnarluni allattariarsorlunilu attaveqaqateqarnermik sungiusimanninnissat aalajangiisuulluinnartumik pingaaruteqarpoq.

Kalaallit oqaasii kulturiallu ilisimasaqarfigigukku annertuumik iluaqutaassaaq. Qinnuteqartunut Kalaallit Nunaata avataanersunut tunngatillugu, sungiusimasamit allaanerusumik kulturikkut atugaqarluni sulinissamut inuunissamullu piginnaaneqarneq, piumassuseqarneq kajumissuseqarnerlu pingaartinneqassaaq.

Immikkoortortaqarfinni maluusuni tamaginni ulluinnarni atituumik isigalugu IT-nut pikkoriffeqarnissaq pisariaqarpoq, pingaartumik office-pakken tassani pineqarluni. Qinnuteqartumut IT-nut pikkoriffeqarluni piukkunnartumut atorfininnerup kingunerisaanik aammattaaq suliassanut IT-mut attuumassuteqartunut Aqutsisoqarfimmi ataqatigiissaarisunngorsinnaavutit, ilanngullugu Aqutsisoqarfiup aamma qitiusumi allaffeqarfiup nalinginnaasumik IT-lerinermut immikkoortortaqarfiata akornanni ataqatigiissitsisartutut sulineq. Suliassami ilaatigut qarasaasiatigut paasissutissaasivitsinni allakkialeriffitsinnilu Aqutsisoqarfimmi atuisuuninngornissamut ilinniartinneqarnissaq ilaatinneqarpoq.

Teknikkinut Nakkutilliinermullu Immikkoortortaqarfik
Teknikkinut Nakkutilliinermullu Immikkoortortaqarfik ingeniøritut, teknikkimik imaluunniit pinngortitalerinermik tunuliaqutaqartunik 1-2-nik suleqatigiligassatsinnik sulisussarsiorpugut. Suliassarissavatit aatsitassarsiornermik ingerlataqarnermut atatillugu suliassanik suliarinninneq nakkutilliinermillu suliaqarneq, tassani aatsitassaatitsinnik aatsitassarsiorluni misissuinerup piiaanerullu isumannaallisaanermut peqqinnissamullu tunngatillugu isumannaatsumik ingerlanneqarnissaannik qulakkeereqataassallutit. Taamaattumik aatsitassarsiorfiutileqatigiiffiit, taamatullu oqartussat teknikkinullu siunnersuisartut arlalippassuit qanimut suleqatigissavatit. Atorfeqarnerup kingunerisaanik nakkutilliinermik suliaqarnermut atatillugu ataatsimiinnerit angalanerillu pisassapput.

Pingaartipparput:

  • teknikkinut imaluunniit pinngortitalerinermik tunuliaqutaqartutit, soorlu assersuutigalugu ingeniøri imaluunniit ujarassiooq
  • illuliortiternermut imaluunniit aatsitassanut inuussutissarsiutinut ilisimasaqartutit
  • suleqatigiinnermik aallussisartutit aaqqissugaasumillu sulisartutit

 Aamma pitsaassaaq:

  • suliassanik suliarinninnermi oqartussallu suliassaanni misilittagaqaruit
  • GIS misilittagaqarfigigukku
  • sullivinni avatangiisinik isumannaallisaanermillu suliaqarneq ilisimasaqarfigigukku

Pisinnaatitsissutinut Immikkoortortaqarfik
Pisinnaatitsissutinut Immikkoortortaqarfik ataatsimik suleqatigiligassamik sulisussarsiorpoq. Pingaarnertut suliassarissavat akuersissutinik tunniussinissamut atatillugu suliassanik suliarinninneq aammalu ingerlatseqatigiiffinnut inuinnarnullu pingaarnertut attaveqaataassallutit. Akuersissutinik akisussaaffigisassarnik suliassaqarfeqalissaatit. Aammattaaq pisut malillugit Aatsitassanut Ikummatissanullu Aqutsisoqarfimmi aalajangersakkanik atugassarititaasunillu nutarterinermi ineriartortitsinermik suliaqarnermi peqataassaatit aammalu Aqutsisoqarfiup paasissutissiisarnermik suliaqarneranut nittarsaassisarneranullu ikiuuttassallutit.

Pingaartipparput:

  • ingerlaqqiffiusumik naleqquttumik ilinniarsimasuunissat, inuiaqatigiilerinerup, inatsisilerinerup imaluunniit pisortat allaffissornerisa iluanniippat pitsaassalluni
  • ingerlatsinermi suliassanik suliaqarnissamut piumassuseqarnissat piginnaaneqarfiginissaallu
  • aaqqissugaasumik sulinissaq pingaartikkit
  • allattariarsornermi oqaaseqatigiiliullaqqissuusutit

Aamma pitsaassaaq:

  • ataasiakkaatigut suliassanik suliarinnittarneq misilittagaqarfigigukku
  • pisortat ingerlatsinerat aamma aaqqissuussaanerit politikkikkut aqunneqartut misilittagaqarfigigukkit
  • aatsitassanut suliassaqarfik imaluunniit pisinnaatitsissutinik allaffissornikkut aqutsinermi suliassaqarfiit allat ilisimasaqarfigigukkit

Aningaasarsianut atorfininnermullu atugassarititaasut
Atorfininnissaq piaartumik pissaaq. Taamaattoq qinnuteqartoq piukkunnartoq utaqqisinnaavarput.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Piffissaq suliffiusoq aallaaviatigut sapaatip akunneranut nalunaaquttap akunnerit 40-t. Aatsitassarsiornermi inuussutissarsiorneq ukiup qanoq ilinera malillugu ingerlanneqartarpoq, aammalu piffissat ilaanni sulinerusarnissaq naatsorsuutigineqarpoq.

Qinnuteqartunut eqqortunik piukkunnaatilinnut immikkut siunnersortitut imaluunniit siunnersortaanertut tapeqarnissamut inassuteqartoqarsinnaassaaq.

Ineqarneq
Atorfiit ilaannut ataatsimut sulisunut inissiamut pisatsersugaanngitsumut, maleruagassat sukkulluunniit atuuttut malillugit innersuussisoqarsinnaavoq. Inunnut sulisunut inissiameereersunut imaluunniit inissiami allami kommunimit imaluunniit Namminersorlutik Oqartussanit pigineqartumi ineqareersunut inissiamik innersuussisoqarsinnaanngilaq. Ineqarnermut akiliut aamma qularnaveeqqut, inissiamut innersuunneqartumut maleruagassat sukkulluunniit atuuttut malillugit akilerneqassapput. Sulisunut inissiaq atorfeqarnermut atatinneqarpoq, aammalu atorfeqarunnaarnermi qimanneqassalluni.

Ineqarnermut akiliut aamma inissiap pitsaassusaa, inissiap pisoqaassusaa, piginnittoqarnera il.il. apeqqutaallutik assigiinngissinnaapput. Ataavartumik sulisunut inissiamut innersuussinissamut utaqqisoqarsinnaavoq, taamaattumik utaqqiisaasumik inissiineq pisinnaalluni, ilanngullugu aamma najugaqaqatigiiffinni minnerusuni imaluunniit akunnittarfiup inissiaataanni, taakkununngalu akitsuusiisoqassaaq. Sulisunut inissiami imaluunniit utaqqiisaasumik inissiami, assersuutigalugu qimmimik imaluunniit qitsummik, anginerusumik uumasuuteqartoqarsinnaanngilaq.

Paasissutissat annertunerusut
Teknikkinut Nakkutilliinermullu Immikkoortortaqarfimmi atorfik pillugu annertunerusunik paasisaqarusukkuit, Kim Zinck Jørgensen, Teknikkinut Nakkutilliinermullu Immikkoortortaqarfimmi immikkoortortaqarfimmut pisortaq attaveqarfigisinaavat, oqarasuaammut (+299) 346848 imaluunniit e-mail kizi@nanoq.gl.

Pisinnaatitsissutinut Immikkoortortaqarfimmi atorfik pillugu annertunerusunik paasisaqarusukkuit, Rannvá Clementsen, Aqutsisoqarfimmut pisortaq attavigisinnaavat, oqarasuaammut: (+299) 283799 imaluunniit e-mail racn@nanoq.gl.

Kalaallit Nunaat aamma Namminersorlutik Oqartussat pillugit annertunerusumik paasisaqarnerorusukkuit www.naalakkersuisut.gl, aqqutigalugu Atorfiit ataanni paasisaqarnerusinnaavutit. Kalaallit Nunaanni aatsitassanut suliassaqarfik pillugu paasissutissat nittartakkatsinni uani www.govmin.gl nassaarisinnaavatit

Qinnuteqarneq
Qinnuteqarnissamut killigititaavoq ulloq 11. oktober 2022 nal. 12:00.

Atorfinitsitsinissamut oqaloqateqarnissat ingerlaavartumik ingerlanneqassasut naatsorsuutigineqarpoq.

Qinnuteqaat, CV, ilinniarsimanermut pikkorissarsimanermullu uppernarsaatit, kiisalu uppernarsaatit allat attuumassutillit nassiutikkit ”Qinnuteqaat nassiuguk” toorlugu. E-mailikkut qinnuteqaatinik tigusaqartanngilagut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk