Skip to main content
112

Aalisarnermut, Piniarnermut Nunalerinermullu Naalakkersuisoqarfiup Piniarnermut Aallaaniarnermullu Immikkoortortaqarfia AC fuldmægtigi-ssarsiorpoq

Ulloq atorfinitsitaaffissaq tassaavoq kingusinnerpaamik 01. december 2019, imaluunniit isumaqatigiissuteqarnikkut.
 
Aalisarnermut, Piniarnermut Nunalerinermullu Naalakkersuisoqarfimmi Kalaallit Nunaani pisuussutit uumassusillit aqunneqarnerinut tunngasut suliarineqartarput, suliassaqarfiit pingaarnerit makkuusut aallaavigalugit: Aalisarneq, Piniarneq Nunalerinerlu, inuussutissarsiutinut tapiissuteqartarneq, nakkutilliineq misissuinerlu kiisalu inuussutissalerinermut tunngasut. Suliaqarfigisartakkavut politikkikkut eqqumaffigineqartorujussuusarput soqutigisat assigiinngitsut akerleriittullu atuukkajuttarlutik.
 
Naalakkersuisoqarfik 7-nik immikkoortortaqarpoq, Piniarnermut Aallaaniarnermullu immikkoortortaqarfillu immikkoortortaqarfimmi pisortap saniatigut arfineq marlunnik sulisoqarluni.  Immikkoortortaqarfiup suliassai pingaarnerit tassaapput uumasunik nujuartanik uumasunillu nunniussanik aqutsineq, allaffissorneq illersuinerlu, tassunga ilanngullugit nutarterineq, siunnersuineq aammalu piniarnermi aallaaniarnermilu inatsit eqqarsaatigalugu inatsisitigut ikorfartuineq, qeqqussanik katersisarnermi aqutsineq aamma kalaaliminernik atorluaanissaq kiisalu piniarnermut allagartanut qinnuteqaatit. Taakkua saniatigut Naalakkersuisoqarfik aamma tusarniaanermi peqataasarpoq uumasut nujuartat uumaniarfiilu pillugit ilisimatusarnissamut qinnuteqartitsinermi.
 
Atorfik pillugu
Piniarnermut Aallaaniarnermullu Immikkoortortaqarfiup Kalaallit Nunaanni pisuussutinik uumassusilinnik aqutsinermik ingerlatsisuuvoq. Immikkoortortaqarfik Immikkoortortami pisortamut ataatsimut, AC-fuldmægtigi-nut 5-nut aammalu immikkoortumi lederi kiisalu allaffimmi fuldmægtigimik ataatsimik inuttaqarpoq.
 
Immikkoortortaqarfimmi ulluinnarni sulisarneq ilaatigut ulapaarfiusinnaasarpoq pingaartumillu ataatsimiin-nernik ingerlatsisarnerit, Naalakkersuisoqarfinnik/aqutsisoqarfinni, kommunenik, kommissioninik kattuffinnillu suleqateqartarnerit, politiikerinut isummernissamut tunngavissianik suliarinnittarnerit, innuttaasut saaffiginnissutaannik suliarinnittarnerit, suleqatinillu sulianut tunngasutigut siunersioqatigisaqartarnerit kiisalu nammineq suliarisassanik aalajangersimasunik suliaqarfiusarluni.
 
 
Immikkoortortaqarfimmi AC fuldmægtig-itut atorfimmi sammisat ilaatigut makkua ilaapput

  • Piniakkat killilersukkat, taassuma ataani nannunik aavernillu piniarnermi ingerlatsineq allaffissornikkullu aqutsineq,
  • Kommuninut aamma piniartut aalisartullu peqatigiiffiinut attaveqarneq, piniakkat killilersukkat pillugit illugiilluni nunarsuullu immikkoortuinut isumaqatigiissutit pillugit ataatsimiinnernut piareersaaneq peqataaneq kiisalu malittareqqiineq,
  • Piniarneq pillugu Siunnersuisoqatigiit allattoqarfianik isumaginninneq, siunnersuisoqatigiit ataatsimiinnissaanut piareersaaneq, peqataaneq aamma ataatsimeereernerata kingorna suliassanik malittareqqiineq immikkoortortaqarfimmi sulisut sinneri suleqatigalugit,
  • Piniakkat killilersukkat, ilaatigut nannut aarrillu pillugit piujuaannartitsinermik tunngaveqarluni atuinermut tunngasunik paasisitsiniaanerit, immikkoortortaqarfimmi sulisut sinneri qanimut suleqatigalugit.
  • Kalaalimerngit pillugit pinngortitallu pisuussutaanik atorluaanerulernissamut qaammarsaanermi suleqataaneq.

 
Naatsorsuutigaarput, illit:

  • Ingerlatsinermut sammisumik aamma imaluunniit inuit inuiaqatigiillu pissusaannik ilinniagartooq (antropolog) assigisaanilluunniit Kalaallit Nunaannit nunanilluunniit allanniit ilsimatusarfimmi ilinniaraqarsimasoq.
  • Suliffeqarfimmi politikkikkut aqqunneqartumi sulisinnaassuseqartutit
  • Namminersorlutit allanillu suleqateqarsinnaassuteqartutit
  • Ajornartorsiutinut nutaanut piaartumik iluarsinissaannut periataapallassinnaassuseqartutit
  • Immikkoortortaqarfiup suliaqarfiisa iluini suliassanik ingerlatsinissamut piareersimasoq
  • Tamakkununnga tunngasutigut ineriartornernut/pisunut ingerlaavartumik ilisimasaqarniarluar-sinnaasutit.

 
Kissaatigaarput, illit:

  • Allaffissornikkut siusinnerusukkut atorfigisimasamit misilittagalik, ajornanngippat ingerlatsinerup iluani
  • Nunatsinni pissutsinik aammalu/ imaluunniit piniartarnernik ilisimaqarluartutit
  • Qarasaasiakkut paasissutissanik toqqorterivimmik, paasissutissanik misissueqqissaarnermut aammalu digital atorlugu inerisaanissamut ilisimasaqarneq
  • Avataanit attaveqaqatigiittarnermik ilisimasaqarluarneq
  • Oqaatsinut pikkorittutit, kalaallisut, qallunaatut tuluttullu oqalussinnaasutit,
  • Ammasuusutit aammalu quiasaarsinnaasutit.

 
Annertunerusumik paasissutissat
Atorfik pillugu annertunerusumik paasisaqarusukkuit, Amalie Jessen attavigissallugu tikilluaqquneqarputit, oqarasuaat 34 53 04 amalie@nanoq.gl imal. Pollas Lyberth poly@nanoq.gl. Pineqartut peqannginnerani una saaffigineqarsinnaavoq: AC fuldmægtig Nuka Møller Lund, numl@nanoq.gl, tlf. 299 345345.
 
Kalaallit Nunaat aamma Namminersorlutik Oqartussat pillugit annertunerusumik paasisaqarnerorusukkuit www.naalakkersuisut.gl aqqutigalugu Atorfiit ataanni paasisaqarnerusinnaavutit.
 
Atorfinitsitsinissamut oqaloqateqarnissat sapaatip akunnerani 42-mi ingerlanneqarnissaat naatsorsuutigineqarpoq.
 
Kalaallit Nunaanni Namminersorlutik Oqartussat pillugit naatsumik allaaseralugu
Kalaallit Nunaanni Namminersorneq ulloq. 21. juni 2009-mi atuutilerpoq. Namminersorlutik Oqartussat tas-saapput Qitiusumik Allattoqarfik (QA), 650-t missaanik sulisulik naalakkersuisoqarfinnut aqqanilinnut aqu-tsisoqarfinnullu arlalinnut agguataarsimasoq. Katilluta inuit 2500-t sinnerlugit Namminersorlutik Oqartussa-nut atassuteqarpugut.
Qitiusumik Allattoqarfimmi suliassarput pingaarnerpaaq tassaavoq, Naalakkersuisut (Naalakkeruisoqarfiit) aalajangernissaannut tutsuiginartumik tunngavissinnissaat aalajangikkallu piviusungortinnissaat. Suliniuteqarfinnut tunngasutigut pingaartingaarlugu salliutitaq tassa, pisortat sullissineranni innuttaasunik qanimut suleqateqarnissap sanarfinerani, innuttattinnut 57.000-iusunut tamanut anguttussamik siuttuunissarput.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk