Skip to main content
78

Dette jobopslag er udløbet

Suliassanut pissanganartunut tamatigoortunullu immikkut siunnersorti/inatsisilerinermullu fuldmægtigi

Misittagalinnik suleqateqarlutit immikkoortortarmi pissanganartunik suliaqarfiusumi suleqataarusuppit, taava suliffissaqartippatsigit.
 
Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik inatsisilerinermut immikkoortortaqarfimmut inatsisilerinermik fuldmægtigimik sulisussarsiorpoq. Qinnuteqartumut uppernarsarneqarsinnaasunik piginnaanilimmut atorfik immikkut siunnersortitut neqeroorutigineqarsinnaavoq.
 
Naalakkersuisoqarfimmi suliassaqarfimmi politikkikkut anguniakkat piviusunngortinnissaat suliarisarparput. Inatsisiliorneq, matumani naalagaaffimmi inatsisit Kalaallit Nunaannut atuuttussat, nunat tamat akornanni isumaqatigiissutit, periusissiat aamma suliniutit ilanngullugit. Isumaginninnikkut oqartussaaffik ilaqarpoq meeqqat inuusuttullu sumiginnakkat, inersimasut sumiginnakkat, utoqqaat inuillu innarluutillit atugarisaat inatsisitigut nukittorsarnissaat. Inatsisinik atuutsitsinermi suliaqarnermi susassaqarfinni suli Kalaallit Nunaannut nuunneqanngitsuni qallunaat oqartussaasut qanimut suleqatigisarpagut. Suleqatigiinnermi siunertaavoq inatsisinik atuutsitsinermut suliassaqarfimmi Naalakkersuisup Inatsisinik atuutsitsinermut suliassaqarfimmi periusissatut suliniutissanullu pilersaarutaanut naapertuuttumik ineriartortitsinissaq.  Taassuma saniatigut naalakkersuisoqarfik Nakkutilliinermik ingerlatsiveqarpoq, taanna Naalakkersuisoqarfimmi arlaannaannulluunniit attuumassuteqarani immikkoortortaqarfiuvoq, ilaatigut Kalaallit Nunaanni kommunit isumaginninnermi malittarisassanik ingerlatsinerannik nakkutilliisartoq, ilaatigullu isumaginninnermi ulloq unnuarlu paaqqinniffiit perorsaanerannik, ingerlatsinerannik aningaasaqarnerannillu nakkutilliisarluni.
 
Naalakkersuisoqarfimmi inatsisilerituut isumaginninnerup iluani inatsisissanut nalunaarutissanullu siunnersuutit piareersarlugillu suliarisarpaat, aamma naalagaaffimmi ilaqutariinnut inatsisinillu atuutsitsinermut suliassaqarfimmi inatsisit pillugit naalagaaffimmi oqartussaasut suleqatigisarlugit.
 
Taassuma saniatigut suliassaat ilaat tassaapput politikerinik sullissineq aamma politikerinit, innuttaasunit, kommuninit oqartussaasunillu allanit saaffiginnissutit akissuteqarfiginissaat. Tamatumani pineqarsinnaapput inatsisit nassuiarnissaannik soorlu aamma nalinginnaasumik inatsisilerinermut tunngatillugu apeqqutit.
 
Suliassat tamatigoortuupput piumasaqaataavorlu suliarisat assigiinngitsut kulturillu akornanni suleqateqarsinnaaneq aamma nammineq suliassaqarfigisanut namminerisamik akisussaassuseqarsinnaaneq.
 
Nakkutilliinermik ingerlatsivimmi inatsisilerituutut nakkutilliinissat aaqqissuunneqarneranni kalerriutigineqarnerannilu peqataasussaassaatit, kiisalu nakkutilliinermut atatillugu paasissutissanik katerseqataasassallutit.  Kommunit ingerlatsivii aamma isumaginninnermi suliffeqarfii pulaartartussaassavatit aamma nakkutilliinermit nalunaarusianik suliaqartassallutit aamma nakkutilliinermut atatillugu peqqussuteqarnissat qisuariaatillu allat pillugit innersuussuteqarnissat suliarisassallugit.  Angalasoqangaatsiartarnissaa naatsorsuutigineqassaaq.
 
Ima neqeroorfigisinnaavatsigit:

  • Suliffik, nammineersinnaanerup aalajangiisinnaassuseqarnerullu annertuumik pingaartinneqarfigisaat
  • Suliffik, tunniusimasunik pikkorissunillu immikkoortortaqarfimmi sulisulik
  • Suliffik ammasumik pissusilersorfiusoq, sulisullu ataasiakkaat piginnaasaannik ataqqinniffiusoq
  • Suliffik ulapaarfiusinnaasoq, kisianni aamma unammilligassaqartoq pissanganartorlu


Ilimagisagut

  • Cand.jur.-itut imaluunniit cand.merc.jur-itut ilinniagaqarputit
  • Inatsisiliornermik misilittagaqarputit, ajornanngippat inunnik isumaginninnermut inatsisitigullu pisortat ingerlanneqarnerannut suliassaqarfinninngaanniit
  • Suliffimmi politikkikkut aqunneqartumi sulinermik misilittagaqarputit (
  • Nammineerlutit akisussaaffik tigusinnaavat, nammineerlutillu sulisinnaallutit
  • Suleqatigiinnermi sunneqatigiittarneq oqartussaasoqarfiillu assigiinngitsunik suliallit akornanni suleqatigiinneq pingaartippatit
  • Suliannut suleqatinnullu ammasumik inussiarnersumillu pissuseqarputit
  • Ilusilersorluakkamik suleriaaseqarputit, aamma tunniussivissatut killiffiliussat pitsaassuserlu ukkatarivatit
  • Allannguinissamut piareersimavutit suleqatikkuminartuullutillu


Kalaallit Nunaanni inuiaqatigiinni pissutsinik kulturimillu ilisimasaqarneq iluaqutaassaaq, piumasaqaataananili.
 
Naalakkersuisoqarfimmi inatsisilerituutut suleqatitit inatsisinut tunngasutigut siunnersorsinnaassavatit, taamaammallu isumaginninnermut tunngasutigut malittarisassat atuuttut pillugit ilisimasaqarluartariaqarlutit, taamatullu pisortani ingerlatsinermi inatsisit ilisimasariaqarlugit. Qinnuteqartup eqqortup toqqarniarnerani inuttut inerisimassutsit sulinikkullu misilittakkatit pingaartinneqassapput.
 
Piffissaq suliffissaq tassaavoq sapaatip-akunneranut nalunaaquttap-akunneri 40-t.
 
Ulloq atorfiniffissaq
1. septembari 2020, imaluunniit tamatuma kingunitsiannguatigut.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasisaqarnerorusukkuit inatsisilerinermik immikkoortortaqarfimmi pisortaq Trine Foldager, tlf. 54 66 47 imaluunniit Nakkutilliinermik ingerlatsivimmi pisortaq Johan Lund Olsen tlf. 55 54 84 attavigikkit.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu
paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk