Skip to main content
115

Dette jobopslag er udløbet

Qullersanut Ineriartortitsinermullu Allattoqarfimmut Suliniutinut aqutsisoq

Pisariillisaaviginninnerit ineriartortitsisarnerit, suleriaatsinillu pitsanngorsaanerit salliutillugit suliniutinik aqutsisuunissamik soqutigisaqarpit – Kalaallit Nunaanni ineriartortitsinissamut inuaqatigiit isumalluutaannik tunniussinissamut ilanngusserusuppit - taava ilinnut atorfiniffissaqartitsivugut.

Aningaasaqarnermut Sulisoqarnermullu Aqutsisoqarfimmi Qullersanut Ineriartortitsinermullu Allattoqarfia suliniutinut aqutsisussarsiorpoq, aqutsisoqarfimmi suleriaatsinik pitsaanerulersitsinissamik samminerullugu ineriartortitsinernik suliniutinik suliaqartunut suleqatigiinnut ilannguttussamik. Anguniagarput tassaavoq suleriaatsinik pitsaasunik qulakkeerinninnissaq pilersitsinissarlu, taakkununnga ilaallutik isumalluutinik piginnaasanillu pigineqartunik pitsaanerusumik atuinissap qulakkeerneqarnissaa – taakkununnga ilaapput atortulersuutit inuillu. Inunnik atortunillu aaqqissuussisarnerit naapiffianni pitsanngorsaanernik suliaqartarpugut.

Suliniutit suliarisartakkagut annertunerusumik Aningaasaqarnermut Sulisoqarnermullu Aqutsisoqarfiup akisussaaffiinut tunngasunut tunngasuupput, taamaattumillu pisortaqarfinni allaffissornerup iluani qitiusumik suliassanik ineriartortitsinernik ikorfartuinernillu suliaqartarnernut ilanngutissaatit, soorlu akissarsialerinernut naatsorsuuserinernullu. Aqutsisoqarfiup pingaarnertut anguniagaanut ilanngussissaatit tassaasoq suut tamaasa eqqarsaatigalugit piuminartunik pilersitsinissamut Kalaallit Nunaanni ineriartortitsinissamut inuaqatigiit isumalluutaannik tunniussinissaq. 

Suliassatit
Suliniuterpassuaqartarpugut – aallartereersut pilersaarutigineqartullu, maannangaarlu assersuutigalugu nittartakkamik nutaamik saqqummiussassamik suliaqarpugut akissarsianullu aaqqissuussamik pitsanngorsaavugut. Piginnaasatit soqutigisatillu aalajangeeqataassapput, pilersaarutit sorliit akisussaasutut peqataaffigissaneritit, kisiannili suliassatit pingaarnerusumik makkununnga tunngasuussapput:

  • Ineriartuutaasumik suliniutinik ingerlatsineq aqutsinerlu.
  • Avataanit soqutiginnittut suleqatillu peqatigalugit maannakkut periutsinik atuuttunik unammillernerit periarfissarsiortarnerillu
  • Misissuinernut atatillugu periarfissarsiornermut tunngatillugu aaqqiissutissanik ilusilersueqataaneq.
  • Suleriaatsinik sakkunillu nutaanik atulersitsineq – suliffiup iluani avataanilu
  • Sulinerup pitsanngorsarneqarnera
  • Aqutsissutinik suleriaatsinillu allannguinernut atatillugu aarlerinaatinik misissueqqissaarneq
  • Aqutsisoqarfimmi akimut suleqatigiinne

Ilinnut tunngasut

  • Suliniutinik aqutsinernik suliniutinillu ingerlatsisarnernik misilittagaqartuuvutit.
  • Ingerlataqarusuttuuvutit misissuillaqqissuuvutit peqqissaarusuttuuvutit aaqqiissuteqarusuttumillu eqqarsartariaaseqartuuvutit.
  • Tamakkiisumik isiginnillaqqissuussasutit aammattaaq ajornartorsiutaasinnaasunik imaannaanngitsunik.
  • Ineriartortitsinernik allannguinernillu suliaqarusussuseqarputit.
  • Suliffiup iluani avataanilu aaqqissugaaneq akimorlugu ingerlatsinernik suliassatigullu ineriartortitsisarnernik ingerlatsinissaq nuannarisuuat.
  • Inuttut annikitsualunnik takunnissinnaassuseqarputit, aaqqissuussillaqqipputit, ataqatigiissaarillaqqipputit kiisalu pitsaassutsinik ilisimaarinnilluartuullutit.
  • Allattariarsornikkut oqaatsitigullu paasiuminarsaallaqqissuuvutit.
  • Kalaallisut danskisullu piginnaasaqaruit iluaqutaassaaq.


Allattoqarfik pillugu
Allattoqarfik piffissaq tamakkerlugu sulisartunik pingasunik aammalu ilinniartunik ikiortinik pingasunik sulisoqarpoq. Allattoqarfik aqutsisoqarfimmi pisortamut innersuussisarpoq ineriartortitsinertigut suliniutinut atatillugu aqutsisunik ikorfartuisarput.  Allattoqarfik suliatigut aqutsisoqarpoq ulluinnarni ataqatigiissaarinernik suliassanillu agguaassisarnernik ingerlatsisartoq. Aqutsisoqarfimmi susassaqarfiit akimorlugit suliaqartartussaassaatit taamaasillutillu ASA-mi aqutsisunik siammasissumik attuumassuteqarsinnaallutit. 

Suleqatigiinnut ilanngutissaatit nutaaliornikkut aaqqiinerit siunersiueqatigiinnerillu ulluinnarni sulinerup ilagigai. Suleqatigiinneq inussiarnersumik ingerlasoq suliassallu naammassiniartarnerannut sunniuteqarnissannut periarfissaqarpoq.

Sapaatip akunneranut 40 tiimit suliffiussapput.

Akissarsiat atorfininnermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqanngilaq. Qinnuteqartulli Namminersorlutik Oqartussani atorfeqarnini aqqutigalugu sulisutut ineqareersimaguni sulisunut inissiamik innersuussiffigineqarsinnaanini attatiinnassavaa. Atorfimmut atatillugu inigisaq atorfeqarnermut tunngavoq atorfeqarunnaarnermilu qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mailikkut qinnuteqaatinik tigusineq ajorpugut.

Atorfik pillugu paasisaqarnerorusukkuit Mark Hvistendahl oqarasuaat 345827 imaluunniit mail mahv@nanoq.gl aqqutigalugit saaffigisinnaavat.

Aningaasaqarnermut Sulisoqarnermut Aqutsisoqarfik
Namminersorlutik Oqartussat Qitiusumik Allaffeqarfiat suliffeqarfiuvoq pissanganartoq assigiinngitsunillu suliaqarfiusoq. Aaqqissugaanermiipput naalakkersuisoqarfiit arlallit kiisalu aqutsisoqarfiit tamarmik immikkut suliassaqarfiusut.

Qullersanut Ineriartortitsinermullu Allattoqarfimmi, Aningaasaqarnermut Naalakkersuisoqarfiup ataaniittumi Aningaasaqarnermut Sulisoqarnermullu Aqutsisoqarfimmi inissisimasumi sulilissaatit.

Aningaasaqarnermut Sulisoqarnermullu Aqutsisoqarfimmi ataatsimoortumik naleqartitat:
ASA-p tunngavia tassaavoq ASA pisortani oqartussaaffiusoq uppernassusilik takussaasorlu. ASA immikkoortortaqarfiit, suliffeqarfiit innuttaasullu suleqatigiinnerat ineriartortinniarlugu sulissuteqarpoq.” Tamanna isumaqarpoq ASA suliassanut qitiusunut ersarissunik anguniagaqartoq, ASA piginnaasanik ineriartortitsinissaq pingaartitsisoq kiisalu ASA pisortat suliassaqarfiinik pisariillisaasoq.

ASA-p pingaartitai pingasut tassaapput:

  • Akisussaaffik - Qanoq iliuuseqarnivut, suliassavut sullitavullu eqqarsaatigalugit akisussaaffeqarpugut
  • Suleqatigiinneq - Suleqatigut sullitavullu pitsaasumik suleqatigaavut
  • Isumassuineq - Ikiuukkumatuujuvugut akunnitsinnilu paareqatigiilluta

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk