Skip to main content
88

Dette jobopslag er udløbet

Kalaallit Nunaanni Peqqinnissaqarfimmut Pisortaq

Kalaallit Nunaanni Peqqinnissaqarfimmik aqutsinissaq soqutigisaqarfigaajuk, kajumilersitsisinnaasuullutillu suliassanik piviusunngortitsisinnaavit? Taava immaqa illit aqutsisortaarissavatsigit.
Peqqissutsimut Naalakkersuisoqarfik Kalaallit Nunaanni Peqqinnissaqarfimmut Pisortamik nutaamik 1. Oktober 2020-mi imaluunniit tamatuma kingorna piaarnerpaamik aallartittussamik pissarsiorpoq.
Peqqinnissaqarfiup pisortaata peqqissaasut qullersaat aamma nakorsat qullersaat peqatigalugit peqqinnissaqarfimmi ataatsimoorussamik suliassanik isumaginninneq, ingerlatsineq, ineriartortitsineq, ataqatigiissaarineq aningaasaqarnerlu akisussaaffigaat. Peqqissutsimut Naalakkersuisoqarfimmi Naalakkersuisoqarfiup pisortaanut toqqaannartumik attaveqartassaatit.
Kalaallit Nunaanni Peqqinnissaqarfiup Nuna Tamakkerlugu napparsimmavissuaq (Nuummi Dronning Ingridip napparsimmavia), nunap immikkoortuini qitiusumik napparsimaveqarfiit sisamat, peqqissaaviit aqqaneq marluk kiisalu nakorsiartitsiviit/nunaqarfinnilu nakorsiartarfiit 55-it ingerlatarai. Katillugit inuit 1600-t missaat atorfeqartinneqarput, taakkulu peqqissutsikkut suliassat assigiinngitsut 72-it isumagisarpaat. Peqqinnissaqarfik ukiumut katillugit 1,5 mia. kr.-t missaannik missingersuuteqarpoq.
Peqqinnissaqarfik Nunap immikkoortuini peqqinnissaqarfinnut tallimanut agguarsimavoq, taamatuttaarlu misissuiffinnut qulingiluanut aammalu sulisunut pisortaqarfinnut arfineq-marlunnut agguarsimalluni, tamarmik immikkut namminersortunik aqutsisoqarput Peqqinnissaqarfimmi aqutsisoqarfimmut attaveqartartunik.
Akisussaaffiit paasiuminarnerusumik aaqqissuunneqarnissaat anguniarlugu maanna peqqinnissaqarfimmi suliamik ingerlasoqarpoq. Aaqqissuussinerup ilusaa imatut inissinniarneqarpoq: peqqinnissaqarfiup ingerlatsineq aallutarissavaa, Peqqissutsimullu Naalakkersuisoqarfik pingaarnertut pilersaarusiorneq naalakkersuinikkullu sullissineq isumagissallugit. Suliaq taanna Peqqinnissaq pillugu ataatsimiititaliarsuaq, Naalakkersuisut pilersitaat, peqatigalugu ingerlanneqarpoq.

Akisussaaffeqarfiit
Kalaallit Nunaanni Peqqinnissaqarfiup Pisortaata ilaatigut makku akisussaaffigai:

  • Napparsimasup salliutinneqartarnissaata assigiinngitsutigullu peqataatinneqartarnissaata nukittorneqarnissaa ineriartortittuaannarnissaalu
  • Kalaallit Nunaanni Peqqinnissaqarfiup periusissiaat, anguniagaat, angusai, pingaartitaallu pillugit attaveqartarnissaq
  • Pitsaassuseq, sullissineq suliaqarnerlu eqqarsaatigalugit pisortat allat suleqatigalugit ataavartumik malitseqartitsisarnermik ineriartitsinermillu qulakkeerinninneq, tamatumanilu pisariaqaraangat anguniakkat tulleriiaarinerillu pillugit erseqqissuuneq
  • Peqqinnissaqarfimmi ingerlatsinermut missingersuut aammalu pilersaarutit, missingersuutit, aaqqissuutereerlugit anguniakkat angusallu aningaasatigut atugassarititaasut iluini naammassissallugit.
  • Peqqinnissaqarfiup suliffeqarfittut piukkunnartuunissaa, suliffiullu pitsaasuunissaata piginnaassutsikkullu ineriartortitsineq aallutarineqarnissaanik qulakkeerinninneq
  • Qitiusumik oqartussaasunut aammalu nunatsinni nunanilu allani suleqatinut peqqinnissaqarfimmut sinniisuunissaq
  • Steno Diabetes Center Grønland-ip atulersinneqarnera aamma sanaartornermi suliassat allat.


Inuttut malunnaateqarneq misilittagaqarluarnerlu
Tamakkiisumik akisussaaffeqartumik siunnerfeqarluni aqutsisinnaanermik misilittagaqarnissat naatsorsuutigaarput, taamatuttaaq peqqinnissaqarfimmi suliarineqartartut misilittagaqarfiginissaat naalakkersuinikkullu qanimut suleqateqarnermik misilittagaqarnissat naatsorsuutigaarput. Suliamut attuumassutilimmik ilinniagaqqortuutut assigisaanilluunniit tunuliaquteqassaatit, aammalu aqutsisutut atorfimmullu attuumassuteqartumik ilinniagaqaqqissimanissat kissaatiginarpoq. Inuttut annertuumik oqaasissaqartuunissat, attaveqaqatigiinnermi piginnaaneqarluarnissat aammalu attaveqaatinik pilersitsisinnaasuunissat pingaartinneqassapput. Aqutsisutut ammasumik kajumissaasumillu pissuseqarputit, aammalu oqaloqatigiinneq akuutinneqarnerlu aqqutigalugit suliffeqarfimmik ineriartortitsisinnaallutit. Kalaallit, danskit tuluillu oqaasiinik piginnaasaqarneq aammalu kalaallit oqaasiinik, kulturiannik inuiaqatigiinnilu pissutsinik ilisimasaqarneq atorfininniarnermi pingaartinneqassapput. Piumasaqaatit taakkua suliamut aqutsinermullu tunngasutigut pisinnaasaqartuunissamut piumasaqaatit assigalugit pingaartinneqassapput.
Piginnaassuseqarfigisariakkatit:

  • Aqutsisaqatigiippassuarnik kajumissaarisinnaalluartuullutillu sunniisinnaassuseqarluartutit aammalu tapersersuisumik nutaanillu iluarusunnartunik pilersitsisinnaallutit allanillu anguniakkanik saqqummiussanik malitsitsinissamut kaammattuisinnaallutit.
  • Naalakkersuinikkut allaffissornikkullu assigiinngitsutigut unammilligassaqaraluarluni suleqatigiilluarnikkut angusaqarsinnaaneq.
  • Ajornaquteqanngitsumik inuit naapissinnaallugit periarfissanillu nutaanik ujaasinissamut aammalu pitsaassutsinik qaffasissunik angusaqarnissamut kajumissuseqartilerlugit.
  • Sulinikkut pissutsini uummaarillunilu pitsaaliuinissaq, suliassallu suliaripallattarniartarlugit peqatigisaanillu suliassarpassuit suliarisinnaassallugit.
  • Nunatsinni inuiaqatigiinni piginnaanngorsaanikkut ineriartortitsinissamik soqutiginninnissaq.
  • Kingullertut minnerunngitsumillu malunnaatilimmik tatiginassuseqassallutillu uppernassuseqassallutit politikerinik aammalu aqutsisoqatitillu sunniiveqatigalugit.


Aningaasarsianut atorfininnermullu tunngasut

Atorfinitsitsineq sivitsorneqarsinnaanngorlugu ukiuni sisamani atuutissaaq. 

Atorfik akissaateqarfimmi LR 39/40-mi maanna inissisimavoq.

1. april 2020 LR 39-mi akissarsiat imak isumaqagitiissutigineqarnikuupput qaamammut  Kr. 80.363,- ukiumullu Kr. 964.357,-

Aallaavittut atorfinitsitsinermi isumaqatigiissut aallaaviussoq, qinnuteqartorlu tjenestemand-tut atorfeqareersimaguni nunatsinni Oqartussat kommuninilu tjenestemandit pillugu Inatsisartut inatsisissaat malillugu atorfinitsitineq tjenestemanditut atugassarititaasut naapertorlugit atorfinitsitaasoqarsinnaavoq.

Naalagaafiup ataanni atorfeqartut isumaqatigiissutaasimasut naapertorlugit aningaasarsiaqarnatit sulinngiffeqarnissamut periarfissinneqarnikuupput, Tjenestemand-itut isumaqatigiissulluniit naapertorlugu atorfeqaruni soorlulusooq kattuffik AC isumaqatigiissutigisimasaaniitut soorlu DJØF Finansministeriap akornani isumaqatigiissut.  Qallunaat nunaanni nunap iluani pissutsinut Naalakkersuisoqarfiusoq innersuussutigivaa Kalaallit Nunaanni Namminersorlutik Oqartussat ataanni atorfininnikkumallutit qinnuteqartut sapinngisamik akimisaarfigineqassanngitut akissarsiaqarnatik sulinngiffeqarniarlutit qinnueqarpata, sulinngiffeqarnissamut isumaqatigiissutit qinnuteqartup inooqataanuttaaq assingusumik atuutsitaapput.

Aallaaviusumik sapaatip akunnerani suliffiuvoq akunneri 40-t, atorfimmullu atuuppoq qaanngiuttornermusiaqarsinnaanginneq aammattaaq ulloq sulinngiffiusussaasoq annaagaani ajunngitorsiassaqarfiunngilaq.

Akissarsiatigut aamma atorfeqartitaanermi atugassarititaasut, taakkununga ilanngullugit atorfinikkiartorluni soraarlunilu angalasinnaatitaanermut aamma pequtit nuunneqarsinnaanerat akiliunne-qartarneq, Namminersorlutik Oqartussat aamma pineqartup kattuffiata isumaqatiginninniarsinnaa-titaasup akornanni atorfinitsitaanermi piffissami atuuttumi isumaqatigiissutaasa/sulisunut isumaqatigiissutaat naapertorlugit ingerlanneqartarput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.


Qinnuteqarneq attaveqarnerlu
Kingusinnerpaamik qinnuteqarfissaq ulloq 17. Juli 2020. Atorfinitsitsinissamut oqaloqateqarnissaq siulleq august qaammataani ingerlanneqassasoq naatsorsuutigineqarpoq. Atorfinitsitsinissamut oqaloqateqarnissat sapaatip akunnerani 32 aamma 33-imi ingerlanneqarnissaat naatsorsuutigineqarpoq.
Qinnuteqarnermi CV, ilinniarsimanermut uppernarsaatit kiisalu inuit attavissat pingasut pillugit paasissutissat ilanngunneqassapput.
Atorfik pillugu paasisaqarnerorusukkuit tikilluaqqusaavutit uunga saaffiginninnissamut, naalakkersuisoqarfimmi pisortaq Tina Pars oqarasuaat +299 34 66 25 imaluunniit e-mail: tine@nanoq.gl. Aammattaaq nittartakkamut www.peqqik.gl-imut innersuussisoqassaaq aamma http://sundhedd4info/D4Doc/Book/DSIDdokument.asp?DokID=27053&sText=organisationsplan

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk