Skip to main content
89

Dette jobopslag er udløbet

IT-mi suliniutinut assigiinngitsunut suliniutinik aqutsisoq

IT-mi suliniutinut assigiinngitsunut suliniutinik aqutsisoq angusaqarluarniartoq
Immikkut suliassaqarfinni assigiinngitsuni suliamut atatillugu aqutsinermik misileerusuppit?
IT-mut suliassaqarfimmi ineriartortitsinermik suliniuterpassuatsinnik ingerlatseqataarusuttoq ujartorparput.

Uagut pilluta
Akileraartarnermut Aqutsisoqarfik 125-nik sulisoqarpoq  Nuummi, Qaqortumi, Maniitsumi, Sisimiuni, Ilulissani kiisalu Danmarkimi allaffinnut agguataarsimasunik.

Aqutsisoqatigiiffiup pingaarnertut suliassai ilaatigut tassaapput Akileraartarnermut Aqutsisoqarfiup aqutsisoqatigiivinik, Aningaasaqarnermut Naalakkersuisoqarfimmik kiisalu naalakkersuinermik suliaqartunik siunnersuisarnerit.  Tamakku saniatigut Akileraartarnermut Aqutsisoqarfiup sulianut tunngasutigut immikkoortortaqarfiit sinnerinik kiffartuussisarpugut.

Suliffik persuarsiorfiunngitsumik ammasumillu sulinermi atugassaqarfiusoq, assigiinngiiaartunik suliassaqarfiusoq, suliakkiisartunut qanittumik inissisimasoq sulilluartunillu sulisulik neqeroorutigaarput. Suliffeqarfiuvugut isummersoqatigiittarnertigut suliatigullu immikkoortortaqarfiit ineriartortinnissaannut pitsaasunik periarfissaqarluta.

Aaqqissuussaanikkut inissisimaneq
Atorfik pingaarnertut allaffimmi Nuummi Akileraartarnermut Aqutsisoqarfiup aqutsisoqatigiivini inissisimavoq. Aqutsisoqatigiit qulingiluaapput suleqatigiinnut marlunnut avissimallutik: Aningaasaqarneq & Inatsisilerineq kiisalu Ineriartortitsineq & Nunanut tamalaanut attaveqarnerit. Atorfik Ineriartortitsineq & Nunanut tamalaanut attaveqarnerni inissisimavoq.

Aqutsisoqatigiinni allaffimmi pisortamut attaveqartassaatit suliassaqarfinnulli allanut tunngatillugu suliniutini arlalinni suliassaqarfimmi aqutsisunut toqqaannartumik attaveqartassaatit.

Suliassat
Qullersaqarfittut ingerlatsivik eqqartorneqarpoq assigiinngitsorpassuarnik suliassaqarfiusoq.  Akileraartarnermut Aqutsisoqarfimmi IT-mi suliniutit pingaarnertut aallunneqassapput.  Ataqatigiissaarinermik kiisalu suliniutit timitalerneranni sulisup peqataasarneranik atorfik nassataqarpoq.

Sulisunut akisussaaneq atorfimmut atanngilaq, atorfilli suliatigut akisussaaffimmik aammalu aqutsisoqarfik akimorlugu sulisut akornanni suliassanik agguataarisarnermi sunniuteqaqataasarnermik annertuumik atorfik nassataqarpoq.

Suliassat pingaarnertut tassaapput:

  • Aqutsisunik siunnersuineq
  • Aqutsisoqatigiinni aqutsisoqarfimmilu sulianut immikkoortortaqarfinni allani suleqatinik siunersiueqatigisaqartarneq
  • Naalakkersuisunut Inatsisartunullu il.il., pingaartumik Inatsisartut ataatsimiinneranni allakkianik, tusarniaanernut akissutinik atortussanillu suliaqartarneq
  • Akileraartarnermut Aqutsisoqarfiup immikkoortortaqarfii kiisalu Qitiusumik Allaffeqarfik akimorlugit suliniutinik aqutsineq
    • Suliniutip ineriartornissaanut akisussaaffeqarneq
    • Suliffeqarfiup iluani avataanilu soqutiginnittunik ataqatigiissaarineq soqutiginnittunillu paasissutissanik pissarsiniarneq
    • Suliniutinik aqutsinermi atortunik attuumassuteqartunik, assersuutigalugu sulinermi malitassanik, piumasaqaatinut nassuiaatinik, piffissanut pilersaarutinik il.il. suliaqarnermik qulakkeerinninneq
    • Aqutsisoqarfiup missingersuutaanut nalunaarusiorneq
    • Pisariaqartitsineq naapertorlugu neqeroortitsineq
    • Suliffimmi suleriaatsinik, malittarisassanik, ilitsersuutinik il.il. suliaqarneq
    • Suliassat suliniutillu nukinginnartut


Ilinnut tunngasut
Sulianut tunngasutigut piginnaasat

  • Ilinniagaqarnikkut misilittagaqarnikkulluunniit IT-lerinermik pikkorissoq. Ajornanngippat tamaasa.
  • Suliniutinik aqutsinermik ilisimasaqarluartoq, ajornanngippat naleqquttumik ilinniarsimaneq.
  • Suliatigut kulturikkullu assigiinngitsunik tunuliaqutalinnik inunnik sullissinermik misilittagalik.
  • Isumaqatigiissutinik aqutsinermik misilittagalik.
  • Oqallorinneq allallaqqinnerlu, ajornanngippat kalaallisut danskisullu
  • Ajornanngippat pisortat ingerlatsiviini misilittagaqarneq naalakkersuinikkullu aqutaasumi sulisimaneq.
  • Systemimi allagaatit il.il. danskisut allassimakkajummata suliamut tunngatillugu tuluttut atuarsinnaanissaq pisariaqarpoq.
  • Kalaallit oqaasiinik, kulturiannik, inuiaqatigiinnilu pissutsinik ilisimasaqarneq iluaqutaassaaq.
  • Kalaallit Nunaata avataaniit qinnuteqartunut tunngatillugu avatangiisini nutaani sulinermik misilittagaqarnissaq pingaartinneqarumaarpoq.


Inuttut piginnaasat

  • Ilakkuminartoq, avatangiisinik ilanngussinissamik piumassuseqartoq piginnaasaqartorlu.
  • Attaveqaqateqallaqqissoq, suleqateqalernissamut suleqatigisanillu attassiinnarnissamut immikkut piginnaasalik.
  • Ullormi suliffimmi qaleriiaanik piffissalerneqartunik suliniuterpassuarnik saniatigut suliaqarnissamut aaqqissuussillaqqissoq, pingaarnersiueqqissaarnissap qulakkeerneqarnissaanut piginnaasaqartoq sapiissuseqartorlu.


Aningaasarsiat atorfinitsitaanermilu atugassarititaasut
Atorfininnissaq piaarnerpaamik pissaaq.  Kisiannili atorfimmut piukkunnaatilik eqqortoq utaqqisinnaavarput.

Piffissaq suliffiusoq aallaavittut sapaatip akunneranut nalunaaquttap akunnerinik 40-nik sivisussuseqarpoq.

Qinnuteqartumut eqqortumut naleqquttumik misilittagalimmut pissutsit malillugit immikkut siunnersortimut- imaluunniit siunnersortaanertut tapinik tunniussisoqarsinnaavoq.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit pissapput.

Kalaallit Nunaanni Namminersorlutik Oqartussat isumaqatigiissutaat uani takukkit: http://naalakkersuisut.gl/da/Naalakkersuisut/Job/Overenskomster-og-aftaler

Ineqarneq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Qinnuteqartorli Namminersorlutik Oqartussani atorfeqarnini aqqutigalugu sulisutut ineqareersimaguni sulisunut inissiamik innersuussiffigineqarsinnaanini attatiinnassavaa.

Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusia nikerarsinnaapput inissiap qanga sananeqarsimanera, piginnittua il.il. apeqqutaallutik. Sulisutut ataavartumik initaarnissaq utaqqinarsinnaavoq, taamaammat utaqqiisaasumik inissiisoqarsinnaasarpoq, matumani aamma najugaqatigiiffiit minnerusut imaluunniit akunnittarfinni inissiat pineqarput, taakkulu akileraarusersorneqassallutik.

Danmarkimi sulinngiffeqarnissamut periarfissat:
Naalagaaffimmi atorfillit aamma AC-mi isumaqatigiissutit arlallit malillugit sulisut Namminersorlutik Oqartussani atorfinitsinneqarnerminnut atatillugu aningaasarsiaqaratik sulinngiffeqarsinnaatitaapput. Aammattaaq Nunamullu namminermut Ministeriaqarfiup Kalaallit Nunaanni Namminersorlutik Oqartussani atorfinitsitaanerminnut atatillugu akissarsiaqaratik sulinngiffeqarallarnissamik qinnuteqaateqartunut akuersaartumik pissusilersortoqassasoq kommuninut nunallu immikkoortortaanut inassutigisimavaa.  Sulinngiffeqarallarnissaq pillugu aalajangersakkat Kalaallit Nunaanni Namminersorlutik Oqartussani inuit atorfinitsinneqartut uiinut nuliaannut/ aappaannut aamma atuupput.

Paasissutissat sukumiinerusut
Atorfik pillugu annertunerusumik paasisaqarusukkuit, piumaguit attavigisinnaavat aqutsisoqatigiinni allaffimmi pisortaq Rannvá Clementsen, oqarasuaat 346579 imaluunniit e-mail ranv@nanoq.gl.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. E-mailikkut qinnuteqaatinik tigusineq ajorpugut.

Qinnuteqarnissamut killigititaq: 4. februar 2020.

Atorfinitsitsinissamut oqaloqateqarnissat qinnuteqarnissamut killigititap naanerata kingunitsianngua ingerlanneqassasut naatsorsuutigineqarpoq.

Akileraartarnermut Aqutsisoqarfiup oqaloqatigiinnissamut aggeqqullutit toqqarpagu tulliusutullu qinnuteqaativit ingerlannera ingerlateqqissallugu, Akileraartarnermut Aqutsisoqarfiup pineqaatissinneqarsimannginnermik uppernarsaativit nuutinneranik qinnuigissavaatit. Pineqaatissinneqarsimannginnermik uppernarsaateqarnissat saneqqunneqarsinnaanngitsumik piumasaqaataavoq.

 

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk