Skip to main content
115

Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik inatsilerituumik sulisussarsiorpoq

Naalakkersuisoqarfimmi atorfilittaqatigiinnut inatsisilerituunik pikkorissumik sulisussarsiorpoq. Atorfiit piaartumik inuttalerneqarnissaat kissaatigineqarpoq.

Inuussutissarsiornermut. Nukissiuuteqarnermut Ilisimatusarnermullu Naalakkersuisoqarfik pillugu
Naalakkersuisoqarfik Namminersorlutik Oqartussat qitiusumik allaffeqarfianut ilaavoq, suliassaqarfiillu, soorlu inuutissarsiornermik siuarsaaneq, takornariaqarnerup, ilisimatusarnerup, nukissiuuteqarnerup, niuernerup pilersuinerullu, kiisalu Kalaallit Nunaata pilerissaarutiginerata iluani pisortaqarfittut suliassanik isumaginnittuuvoq. Kalaallit Nunaanni kulbrintinik suliarisanut Naalakkersuisoqarfik suliassaqarfigisamut akisussaasuuvoq. Naalakkersuisoqarfiup suliassaqarfigisaasa ilagaat Atuisartunut Unammilleqatigiinnermullu Aqutsisoqarfik aammalu nukissiuuteqarnermik ingerlatsivik Nukissiorfiit.

Atorfik pillugu
Naalakkersuisoqarfimmi atorfilittaqatigiit ataani Naalakkersuisoqarfimmi pisortap ataaniittussatut inississaatit. Suleqatissatit qaninnerpaat suleqatitut siunersiueqatigilluartagassatit tassaassapput inatsisilerituut marluk. Ulluinnarni sulineq naalakkersuisunut aamma inuiaqatigiinnut qanimut attaveqarnermik sunnersimaneqarluarpoq. Ulluinnarni piaartumik iliuuseqapallassinnaaneq eqqarsapallassinnaanerlu suliffissiginissaanut piareersimasuussaatit. Aammattaarlu piareersimafigissavat sukumiisumik eqqumaffigisassartalinnik isumaliuteqarfigisassalinnillu inatsisissatut siunnersuutinik allattarnissat. Naalakkersuisoqarfik persuarsiorfiunngitsumik pissuseqarfiusumik suliffeqarfiuvoq, suliniutillu pingaartinneqarlutillu tapersersorneqartarput.

Qitiusumik atorfilittaqatigiit pillugit
Naalakkersuisoqarfiup suliassaqarfinnut immikkoortoqarfii pingasut suleqatigalugit atorfilittaqatigiit suliarisarpaat inatsisissatut siunnersuutit, naalagaaffiup inatsisaanit peqqussutit aalajangersarneqartut, aamma inatsisinik malittarisassianillu allaffissornikkut atuutitsilerneq. Aammattaaq naalakkersuisoqarfimmi immikkoortoqarfinnut tamanut inatsisilerinikkut siunnersuisarnermik suliassanilu iluarsiisarneq atorfilittaqatigiit isumagisarpaat, ilanngullugit naalakkersuisoqarfimmi pisortaqatigiinnik siunnersuisarneq suleqateqartarnerlu. Qitiusumik atorfilittaqatigiit Inatsisartut ukiumut marloriarluni ataatsimiittarnerisa ingerlanneqarnerannut atatillugu naalakkersuisoqarfimmi ataqatigiissaarisutut inissisimaffeqarput.

Atorfilittaqatigiit Danmarkimi pisortaqarfinnut attaveqartarlutillu suleqateqartarput, matumani ilaallutik Nunanut allanut Ministereqarfik, Inuussutissarsiornermut Ministereqarfik, Inuussutissarsiornermut Ingerlatseqatigiiffinnullu Aqutsisoqarfik aamma Finanstilsyni.

Nunani tamalaani isumaqatigiissutinut aamma kattuffinnut arlalinnut atorfilittaqatigiit attaveqartarnermut qitiupput, ilaatigut makkununnga IAEA, Kimberley Processen, EU il.il.

Suliassaqarfiit tungaatigut immikkoortoqarfik naalakkersuisoqarfimmi pisortap ataaniippoq, allaffissornermullu tunngasuni Aningaasaqarnermut Nukissiuuteqarnermullu Immikkoortoqarfiup pisortaata ataaniilluni.

Suut ilinnit naatsorsuutigaagut?
Naalakkersuinikkut aqunneqartutut aaqqissuugaasumit, kommunimit, naalakkersuisoqarfimmit assingusumilluunniit ukiualunnit misilittagaqartutit takorloorparput. Akisussaaffimmik tigusisinnaanissat, aamma suliassannik suliffiup iluani avataanilu ingerlatsisinnaanissat qitiulluinnarpoq.

Pisinnaasanik piginnaaneqarnernillu kissaatigisat

  • Suliassaqarfinnut piginnaasaqarluarluni inatsisilerituutut (cand. jur.) ilinniagaqarsimaneq
  • Suliassatigut siammasissunik suliaqarnermik nuannarisaqarneq, ajornartorsiutinillu nutaanik paasinnipallattarneq
  • Attaveqaqatigilluartarneq, oqaluttariarsornikkut allattariarsornikkullu
  • Tuluit oqaasiinik piginnaasaqarluarneq
  • Suliniutinut sammxmisunik nammineersinnaassusilimmik sulilluartuuneq
  • Suliassat naammassinissaanut akisussaaffeqarluartuunermik takutitsineq
  • Kalaallit Nunaanni pissutsinik ilisimasaqarneq, imaluunniit tamakku pillugit paasiniaaanissamut sapiissuseqarlunilu piumassuseqarneq.


Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsi- taanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Ukiuni arlalinni attuumassuteqartutut misilittagalimmut qinnuteqartumut piginnaasalimmut eqqortumut piviusumik nalilersuinerup kingornatigut specialkonsulentitut atugassarisatigut atorfininneq pisinnaassaaq. Ilinniakkaminnik naammassinneqqammersut, aamma qinnuteqartut annikinnerusumik misilittagaqartut aamma atorfinitsitaasinnaapput, fuldmægtigitullu atorfinitsitaassallutik.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisumut inissiamik pequsersorsimanngitsumik innersuussisoqarsinnaavoq.   Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Annertunerusumik paasissutissat chefkonsulent Jens Hesseldahl attaveqarfigalugu pissarsiarineqarsinnaapput, makkunatigut: jhes@nanoq.gl oqarasuaallu (+299) 34 56 98. Kalaallit Nunaata aamma Danmarkip akornanni nalunaaqqutap assiginngissutaa nal. ak. sisamaanerat maluginiaruk.


Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk