Skip to main content
90

Dette jobopslag er udløbet

Inatsisit tunngaviusussat pillugit Isumalioqatigiissitat Allattoqarfiat inatsisilerinermi fuldmægtigimik/immikkut siunnersortimik pissarsiorpoq

Inatsisinik tunngaviusussanik suliaqarnermik soqutiginnittumik inatsisilerinermi fuldmægtigimik/immikkut siunnersortimik marluinnik oqaaseqartumik 1. oktober 2019, imaluunniit immikkut isumaqatigiissuteqarnikkut, atorfinittussamik Allattoqarfik pissarsiorpoq. Atorfik pineqartoq killilimmik piffissaligaavoq sivitsorneqarsinnaaneranik periarfissaqarluni.
  
Allattoqarfiup akisussaaffigaa Inatsisit tunngaviusussat pillugit Isumalioqatigiissitanik Kalaallit Nunaata inatsisigiligassaanik tunngaviusunik missingersuusiortussanik sulissussineq siunnersuinerlu. Taamatut sulinermi innuttaasunik peqataatitsinissaq isumalioqatigiissitat annertuumik pingaartippaat.

Atorfik atorneqassaaq inatsisinik tunngaviusussanik piareersaateqarnerup inatsisilerinikkut piginnaasaqartumit ikiorserneqarnissaanut. Kalallit Nunaata inatsisigiligassaani tunngaviusussani oqaasertaliussanut taakkununngalu atasunik aalajangersagaalerumaartunut tigussaasunut missingersuusiornissamut atatillugu inatsisilerinermi fuldmægtig/immikkut siunnersorti apeqqutinik inatsisinut tunngaviusunut tunngassuteqartunik immikkut sammisaqassaaq. Tamatuma saniatigut isumalioqatigiissitat ataanni ataatsimiititalianik assigiinngitsunik sulissussinerup siunnersuinerullu allattoqarfiup piginnaasaanik inatsisilerinermi fuldmægtig/immikkut siunnersorti nakussassaataassaaq.

Suliassat pingaarnerit

Atuuffinnik makkuninnga pingaarnerusunik inatsisilerinermi fuldmægtigeq/immikkut siunnersorti suliaqassaaq:

  • inatsisilerinermi atituumik ikiortaanissaq
  • isumalioqatigiissitanik allattoqarfimmillu siunnersuineq siunersiuinerlu
  • isumalioqatigiissitat suleqatigiissitaliaannik allatsitut sulissussineq
  • inatsisinik tunngaviusussanik suliaqarnermi inatsisinut tunngasunik suliarinninneq
  • inatsisitut tunngaviusussatut missingersuusiornermut atatillugu inatsisilerinermi nassuiaasiortarnissaq
  • taaguutinik inatsisinut tunngaviusunut tunngassuteqartunik pingaarutilinnik nassuiaasiortarnissaq, nalilersuisarnissaq isumasiuisarnissarlu
  • oqallisissianik, nassuiaatinik, inatsisinut tunngaviusussanut missingersuummik, isumaliutissiissummik il.il. suliarinninnermut atatillugu inatsisilerinermi suliaqartarneq
  • inatsisilerinermi inatsiseqarnermilu ajornartorsiutit ukkataralugit sammisanik inatsisinut tunngaviusunut tunngassuteqartunik allatigut suliaqartarneq.

Piukkunnaatit piginnaasallu

  • ilinniagartuutut attuumassutilimmik ilinniagaqarneq (assersuutigalugu cand.jur.)
  • pisortat ingerlatsinerannik misilittagaqarneq
  • misissueqqissaarnermut aaqqissuussilluarnermullu piginnaasaqarluarneq
  • oqaluttarissatigut allattarissatigullu oqaasertaliornermut piginnaasaqarluarneq
  • kalaallit kulturiannik inuiaqatigiinnillu kalaallinik ilisimasaqarneq
  • inatsisinik tunngaviusunik suliaqarnermut, taakkuninnga sanarfinermut il.il. atatillugu pissutsinik assigiinngisitaartunik annertuumik soqutiginninneq, kiisalu
  • suleqatigiinnermut attaveqaatinillu pilersitsinermut piginnaasaqarluarneq.

Allattoqarfik pillugu

Inatsisit tunngaviusussat pillugit Isumalioqatigiissitat Allattoqarfiat suliffeqarfiuvoq sulerusussuseqarfiusoq. Suliffeqarfimmi persuarsiorfiunngitsumi suliamut piginnaasaqarluarneq suleqatigiinnerlu pingaartippagut. Suliffeqarfik anginngilaq maannakkorpiaq arfinilinnik sulisoqartoq.

Allattoqarfiup isumagai allaffissorneq, aningaasaqarneq, missingersuutit, pilersaarusiorneq, ataatsimiititalianik isumalioqatigiissitanillu sullissineq, inunnik qaammarsaaneq, attaveqatigiinneq aamma paasissutissiisarneq, innuttaasunik peqataatitsineq tusarniaanerillu Kalaallit Nunaata inatsisigiligassai tunngaviusut missingersuusiorfigineqarnissaat siunertaralugu.

Piffinni aalajangersimasuni ulapaarnissaq naatsorsuutigineqassaaq, taamaammat eqaassuseqarnissaq akimullu suleqatigiinnissamut piumassuseqarnissaq piumasarineqarpoq.

Suliffimmi atugassarititaasut pitsaasut aammalu avatangiisit persuarsiorfiunngitsut assigiinngisitaarnermut isumassarsiorluarnermullu inissaqartitsiviusut neqeroorutigaagut.

Naatsorsuutigaarput sapaatip akunnerani 40-mi oqaloqateqarnissat ingerlatissallugit.

Atorfininnissamut ulloq tassaavoq 1. oktober 2019 imaluunniit piaarnerpaamik isumaqatigiissuteqarnikkut.

Qinnuteqarnissamut piffissaliussap qaangiuteqqammernerani atorfinitsitsinissamut oqaloqatiginninnerit ingerlanneqarnissaat naatsorsuutigineqarpoq.

Paasissutissat sukumiinerusut
Annertunerusumik atorfik pillugu paasisaqarusukkuit tikilluaqquneqarputit attavigissallugu allattoqarfimmi pisortaq Johan Lund Olsen, oqa. +299 34 66 64, mobilip normua +299 55 54 85 mail-ikkulluunniit jolo@nanoq.gl.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk